ZU

By: Dr. Lianhlupuii (Puitei)
Zofaten Zu kan tih mai Alcohol hi mihring tan damdawi lama a thatna a tlem teh lul nen, taksa leh thluak lam a khawih pawi theih em avangin fimkhur a tul a. “Beer te chu Zu a ni hlei nem”, kan han tithla ngawt mai thin hi a dik lo a ni.

Zu kan tih Alcohol hi Beer-ah 3-6 %, Wine-ah 10%, Port-ah 20% leh Spirit-ah 40-50% a tel a. International level-a, taksa tan pawilo tawk zu in duh chuan Pure Ethanol an tih chi mipain 60g leh hmeichhiain 30g aia tam lo in theih a ni.

Keini Zofate zingah hian Zu thatna hi sawi han tum chiam mah ila, taksa a khawih pawizia leh khawtlang a tihbuai em avang hian fak a hlawh lo khawp mai. Zu-in mihring a khawih pawi dante han thlir ila:

Thluak lamah (Central nervous system effect):
Zu in chuan rilru a phur ve mai a. Mahse, zu chuan thil chik duhna, rorel thiamna, ngaihtuah thiamna leh tih tang tang duhnate a tibo vek thei a. Thisen chhunga zu a tam lutuk chuan taksa a tizawiin thil hlauh rukna thinlung a thlen/pe a; Patling, nutling pawh hi zu vangin nikhaw hre lova leh der a awl hle. Rilru control theihna a neih loh avangin zu hian thikthu chhiatna, dawt sawi duhna te, zahmawh sawi hreh lohna te a thlen thei bawk.

Zu hi Nula, hang ngaihno bei tak ang mai hian zun a ngah em avangin ngawlvei a awl hle. Hei tak hi a ni Zu hlauhawmna chu. Zu ngawlvei chuan chhiatna tinreng leh thihna hial a hmabak reng mai zu nia. Thluak a tibuai a, mi-aa ah a chhuah thei bawk a ni.

Lung lamah (Cardio vascular system):
Taksa chhung lam a tihsat thin avangin thlan a tichhuak a, taksa pawn lam a vawt si a, Zu in awmduhdahte phei chu chu tiang atang chuan lung hamda vung natna leh lung natna chi dang dangte an vei thin.

Kawchhung lamah (Gastro-intestinal system)
Pentawng ho chu zingah an luak chhuah avangin an uak nasa thin, pumpui natna an vei thin bawk. Luak nasat chuan hrawka thisen kawng a ti thler thei a, thi-in an luak duh bawk. (Melory Wig’s Syndrom) Thin vung leh thinro natna tam zawk hi zu vang a ni. Thin chaklo tan chuan zu hi “tur” a ni. Thisen mur var hian natna hrik a do thin a, Thisen mur var hnathawh Zu-in a dan thin avangin Zu in mi chu natna hrikin a zuam riau va, thisen sang pawh a tisang zual a ni.

Kal lamah(Renal system)
Zu hian zun ti tam hle mahse zunna Urate(Urea a chhuah thei) chhuak tur a dan avangin kal natna a thlen a ni.

Sex lamah
“Alcohol provokes the desire and takes away the performance” tiin Shakespare chuan a sawi a, chakna (desire) chuah nei a, a tak ram thleng zo tawh lo tihna a ni. Zu in pa nupui chu mi rethei ber a ni thin a, a tawpah hmeichhia chu a ching thei hial a ni.

Zu, kan tih Alcohol that ve nate
1. Damdawi siam nan leh zan mut theih nan
2. Pem, pan, hliam vel hrik dangtu leh tithianghlimtu atan,
3. Tha-na chiu reh nan(Neuralgia effect)
4. Chhul in sang tur a dan avangin a hun lova naupai tur a veng a ni.

Zu hi a thatna aiin a thatlohna a tam zawk avang leh a ngawlvei mai a hlauhawm avangin, in ngai lote tan chhin loh law law, in thin te tan sim tum, ngawlvei te tan ban thak tura inenkawl a pawimawh a ni. Zu ngawlvei rehna damdawi tha tak chu Aisulfiram (Artabuse) hi a ni.

“Hruaitu Arsi—Quaterly Magazine, Vol. 1, No. 2 atanga lakchhawn a ni. Ed.