Buannel: A zaithiam em avanga ‘Zoawi Lelte’ tia hriat Vanlalruati chu May 7 dar 7:24 khan Cancer avangin New Life Hospital-ah a thi a, vawiin khan Vankhama building-ah thlahna hun hmangin Chawnpui venga Vankhama Mualah zalh a ni ta.
Vanlalruati hi Mizo hla kungpui Pu Vankhama leh Pi laldengi te inkara fa tlum ber niin Jan 1, 1955 ah Aizawl Dawrpui venga an inah a lo piang a, unau 14 zinga 11-na niin a unaunu Vanhlupuii chu amah ang bawka zaithiam lar, AIR Top Graded Artiste tlemte zinga tel pha a ni.
Ruati hi naupang mai ala nih lai atangin a zai tan a, pawl 7 a zir kumin Mizoram High School tan bika Non-Athletis Competition ah Govt. Mizo High School hmingin malzaiah lawmman pakhatna a dawng a, Recitation ah 1-na a dawng bawk a, chutiang chuan 1969 ah te dawnglehin 1968 Inter High School Singing Competition a lawmman pakhatna a lak avangin AIR in hla record turin a sawm a, hemi tuma a hla record a hit hmasa ber chu ‘Enga’n ka lo tawn che’ tih hla tuna kan Education Minister ni mek Pu lalsawta phuah hi a ni nghe nghe a. Chutiang chuan Pu Sawta hla leh hla dangte a record chho ta zel a. Kum 1985 kum khan a u Vanhlupuii nen USA tour neiin hemi tum hian album ‘Zoawi Lelte’ tih hla 10 awmna, USA recording a rawn siam chhuak a, 1986 ah a album pahnihna Pu C.Dinthanga hla phuah ‘Tuaiduh lawmlai valte’ tih thupui hmangin ‘Van Recording Studio ah a buatsaih leh a, 1995 ah Krismas albuma tichhuak leh a ni.
Kum 1993 khan a u Vanhlupuii nen an pa Vankhama Hlate album pakhatah siamin lelte in alo produce sak tawh a. Jan 30, 2003 khan a pasal Ngurbiakthanga chuan thisen sang vangin a boral san a ni. Zai lamah hian sulhnu a ngah hle a, hla 20 vel a phuah bawk a, hla leh rimawi lamah Awards siam hmasak Ainawn Teenagers Weekly buatsaih ‘Ainawn Pick Your Pop’ tihah Ruati hian award a dawng tluan vek a, a hnuah Lelte Award leh leh Rimawi Khawvel Award ah te pawh award chihrang hrang a hui a, Larsap AR Kohli pawhin Appreciation Trophy a pe hial a ni. Ruati hla hit zingah hian ‘Mim ang kan piang hmun ve ta si lo’, ‘Lungduh di then chu’, ‘Hmangaihna Vanduai’ Tawnthar di Valmawia’ ‘I chul tur hi’, Tawnmang Lasi, ‘Tunge Ruati I ngaihzawng’ tih leh Autograph te chu a larpui hle a ni.
Kum 2009 kumtir lam atangin a insawisel tan a, a tirah TB angin an enkawl a, mahse a that chak loh avangin doctor an rawn leh a, October thla tirah Doctor a rawn chuan thin cancer niin a hria a, October 22 ah TATA a pan a, Cancer ani tih finfiah ani ta a, a chawkawng dawt leh pumpui lamah thawkin a thin chu alo kai ve chauh tih hmuhchhuah a ni. He a natna hi chel taka tuarin a inenkawl chho a, chemo te a khai thin a, mahse a chaklo chho telh telh a, nizan May 7 zan dar 7: 20 khan a inenkawl mekna hmun New Life Hospital ah a chatuan hmun a pan ta a ni.
Vanlalruati hi vawiin chhun dar 12 khan Vankhama Building, Dawrpui Aizawl ah thlahna inkhawm hman a ni a, pastor Saizika Sailo in thlamuanna thuchah sawiin chhungkaw lam atangin Pu Vanhmingliana leh Pi Vanhlupuii ten thu an sawi a, ama zai ‘Damlai tuipuiah ka thlarau a vakvai’ tih a sak chu ngaihthlak a niin a thlahnan Zaimiten ‘Zoawi lelte’ tih hla live music in an rem a, hemi hnu hian Chawnpui venga a Inah a ruang hi chawlhtir zawk a ni a, Chawnpui venga a pa Pu Vankhama ram, a naute pahnih lo phum tawhna hmunah zalh a ni a, Pastor PL Biakchhawna’n thlahna hnuhnung a hmang a ni.
@Upuite…”ka nuam ve e” a lawm. Aizawl T.Melody concert-a Pantei zai kha a ni lawm mi i sawi chu…
A pawi thin hle mai..kan Artist ropui tak takten min boral san thin hi…..ka vahan ui tak em
Buta(vulmawi) hla “Ka nuam e” tih pawh hi Vanlalruati sak kha ka hriat hmasak ber a ni.
Chhingkhual len mawi’n mual min liam san leh ta chu a va’n uiawm tak emmmmmm!!
khai aw… ka lunglen min hnem tute zing a mi a nia sin….pamhmai khawp mai……
Puitea’n a rawn comment meuh chuan kan phuisui ta hle mai. In in kawm ve viau thin kha an tia,..kei ni ai an u deih a, kan kawm pha ve lova. Nang chuan in naupan lai chanchin vel pawh sawi tur i hre nual lo maw?
Mizo zaithiamah chuan ” BER ” ka lo tih ve thin a ni.
An unau ( Vanhlupuii ) nen hian Mizo khawvelah chuan a thawh hlawk ber pawl an nih ka ring. A pa Vankhama lah Mizo hla phuah thiam zingah pawh ber zinga mi a ni bawk.
” tleitirah Tleitiri ” tih leh “Autograph” phei hi chu a ni tluk hian tuma’n an la thawh mawi lovin ka hria.
” Zoawi lelte timaia i chul tur hi…”
A va uiawm tak ve aw. Nimin ka in leng Nguntei hnenah a dam loh thu ka lo sawi zo chiah a sin ma le. A hla te hi Bawihtetea te ang em chuan ka tuipui hman pha ve chiah lo nain a lar zual deuh te hi chu ka ngaithla ve thina “min ang kan piang dun ve ta si lo & Tawnmang Lasi & Autograph” te hi chu ka ngaina ve viau mai. Hla kungpui mual chang pha Pu Vankhama fanu a ni tih ka lo hria lo reng reng bawk a. A ui awm tak meuh ve, zofa te awi lunglengtu ‘lalte’ kan suna a kiu ri erawh zofate benga chamin a nung reng tho ang.
“Hmangaihna vanduai” tih hla kha a thluk nalh ka ti em em a, thiam ka tiin a sa run bawk a, a phuahchhan te an sawi phei chuan a lainatawm zual a. Amah Pi. Vanlalruati pawh hi zaithiam ka tih zawng tak a ni. Tunhnaia “Tawnthar Di” tih a rawn thlawh nawn leh phei kha chu ka ngaithla ngun hle bawk. Ti maia kan han chan ta hi channa nasa tak a tling a ni.
A hla ngaithla pahin ka rawn lut leh e, a aw hi a no nalhin a tham mawi em a sin. A tluk ka la hre lo mizo zaithiam zingah, ka uar deuh a nih pawhin min ngaithiam a niang chu. A han thluk kual kawi velte hi a thiamin, a aw hi cial tak a ni. Zoawi Lelte, Mangtha mai le. RIP
Uiawm ve aw.. lung a ti leng hle mai.
A va han uihawm tak em! Mizo zaithiam te zinga ka ngaihsan ber berte zinga mi Vanlalruati chu ka va ui tak em! Zai a thiam dan hi a thiam chiang bik em a ni.
Vanlalruati hi chu a zai hi a no bawk si, a dam bawk si, a zang haih mai bawk a. A thiam hi ka van ti tak em…! Kan tleirawl chhuah vel khan, ui kan talh hian a hla hi kan play tlangpui a, kan sek ve dap dap thin. Hetia a boral mai hi a uihawm hle mai. Pathian in lusun chhungte hnem zel rawh se :(