Zaithiam Sung Tin Pari Biangbiakna

By: Lalrampana, ZOIN Secretary, 2008
Burma ram zaithiam hmingthang, Sung Tin Par, Zaw Win Htut leh L. Saizi te’n tunhnai khan Japan-ah Concert an rawn nei a. An concert-a an sum hmuh atang hian kumin May thla tira Nargis-in a nuai chhiat tam tak zinga School Chhia din thatlehna atan tanpuina an hlan dawn a ni. An rawn kal chhanin a zir bawk a, Japan rama Burmamite lawm an hlawh hle.

Tin, ICHIKAWA venga khawsa Chinmite’n Zaithiam Sung Tin Pari chawimawina hunpui te buatsiahin inkawmhona neih a ni a, a hlimawm hle.

Tichuan, Sung Tin Pari puala hunpui hmannaah chuan tuna-hma atanga ZOIN hminga kawm kan tum thin te ka hrechhuakin kan hruaitute hnenah ZOIN hminga interviewna hun tlem ka dil a, rem min lo tih sakin leh amah Sing Tin Pari pawhin hawihhawm takin ka dilna chu min amen pui a, a hnuaia tarlan ang hian inkawmna hun zalen takin kan nei ta a ni. Hetiang hian:

—Lalrampana=ZOIN
—Sungtinpari=STP

ZOIN: Unau pianpui engzatnge I neih? tiin zawhna ka han tan chawt e.

STP: Unau 6 kan ni a, U mipa pahnih leh hmeichhia pathum ka nei, kei hi a naupang ber ka ni.

ZOIN: Thu inzawh nuam leh inchhan nuam a ni lo nachungin, I kum zat hi hre chak tam tak an awm tih ka hria a, khawngaihin mi hrilh thei em?

STP: “Dawn lom ni” ( Phur takin a sawi a) , December thla hian kum 29 ka tling ang.

ZOIN: Ka lawm e. E khai, ualau takin in zawt zel ila. Hei, pasal neih te pawh i hun tawh si a, ngaihzawng teh i nei tawh em? Tin, Pasal atan hian Chin mi kher kher neih i tum em? Nge, hnam dang Eg: Kawl , Sap, etc.. te hi I pasal atan an rem thei tho em?.

STP: Ni e, Pasal neih chu ka hun tawh ( khi vur vur chungin). Mahse, ngaihzawng ka la nei lo. Ka pasal atan hian a pakhatnaah Chin mi ngei hi ni thei se tih hi ka duhdan a ni. Mahse, Chin tlangvalin min la rawn bem hrih loh avangin kum 29 lai ka tling ta a nih hi. Pasal atan chuan Hnam dang chu dah tha hrih mai ila, Tunah chuan Japan-ah ka hmu tawh. (A nui nasa)

ZOIN: Fanu tleirawl nei tawh mah ni ila, ka han zawt hram ang che. Hei, i hmel te hi a tha a, i thawmhnaw inbel apiang mai hian I inchawih mawi zelin leh i kimtlang te hi a mawi si a. I inchei-ah hian mahniin nge I inchei mai thin? Nge, midang I ruai thin?

STP: I mi fakderna pawh ni se, Ka lawm e. Concert kan neihna ang chiah hi chuan keimahin ka inchei mai thin a. Mahse, Video kan lak thinnaah erawh chuan “December Hnin (snow)”te hian min chei thin. (min buaipui thin)

ZOIN: A nih leh hei, I larna hi a rei ta hle mai a, mahni pualin VCD, Audio CD,?// engzat lai nge i siam tawh? Tin, Gospel hla nge, Love Song hi I sak tam zawk ang ? Hla engzat lai nge I sak tawh tih pawh hi hre chak tam tak kan awm ka ring a, khawngaihin min hrilh thei em?

STP: Singel in pathuam ka siam tawh a, tunah hian lai hlaa chhuak tur ka siam zo tawh a, rei loah a chhuah theih mai ka beisei. Kawl hla hi 40-50 vel ka sa tawh a. Tin, Gospel hla hi love song aiin ka sa tam mah zawk, a vaiin hla hi 120-130 vel ka sa tawh.

ZOIN: Ka la zawt dawn chauh che a nia, lo ning mai suh aw. Hei, Zo (Chin) hnahthlak hi chi-leh-kuang peng tam tak kan awmin kan darh deuh nuai mai si a, “ Zofate Insuihkhawm Zai I Rel Ang U” tih hawia thuziakte hi a tam hle tawh a. Hengte avang hian keiniho hi kan Innsuihkhawm theih hi i ring em? Insuihkhawmna tur hawi hian hmalakna te i nei ngai tawh em?

STP: I duh duh min zawt zel rawh, hun a awm a lom. Kan Insuihkhawm theih chu ka ring. Mahse, keimah chuan engtia hmalak tur nge tih erawh ka hre ve mai lo a. Kan rual u zawk te leh kan mithiamte’n hma an lak zel chuan insuihkhawm theih hun chu a la awm ngei ka ring tlat a ni. Chuan, keimahah hian Halkha, Falam, Tedim etc….tihah te hian thliarhranna rilru hi ka nei lo a, an thiltihnaa min sawm thintute sawmna hi ka hun neih dan nen a inmil chuan ka tel zelin leh ka tlin tawkin ka inhmang ve thin. Hei, kan unau Asho Chin te pawh hi Kawl tawng hmang, Budist Sakhaw bia ni hlawm tlangpui mah se, Chin nihnaah an chiang em em a, Asho Calendar an siamah pawh Halkha thuama incheiin Calendar tan ka laksak ngai tawh.

ZOIN: I rilru put dan a zauvin kawm i nuam hle mai. Han zawt ta deih che ila, 2004 leh 2005 kuma YZTP Sweet December Concert-ah khan i zai dawn tih te kan lo hria a. Mahse, i rawn tel ta lo kha engvangnge ni ber le, khawngaihin min hrilh thei em? Tin, kumina YZTP ten Sweet December Concert an buatsaih turah teh hian sawmna i dawngin leh telpui theih i tum em?

STP: Aw, a ni tak e. Kumin pawh YZTP atangin sawmna chu ka dawng tak a sin!!! 2004 leh 2005 kum kha tel ka tum nasa a. Mahse, kan zinchhuah lai nen a in-nan-chin avang leh vanduai thlak takin ka haw hun turah motor/thlawhtheihna seat te a remchan loh hlauh avanga tel thei lo kha ka ni. Chuan, ka tel theih lohna chan kawng dang pakhat leh chu e, November thla atanga April thla thleng hi Kawl ho Puai neih hun hi a tamin sawmna hma takah ka dawn thin vang te a ni a, hun tawnin a zir thin loh vang te hian min sawmna tam tak hi tihhlawhtlin loh chang ka nei thin a, pawi ka ti thei khawp mai. Kumina YZTP ten min sawmna pawh hi tel chu ka duh, tel pawh ka tel ngei ka ring.

ZOIN: Dilchhut takin ka zawt zel dawn che nia. Hei, zai hi i thiam em em a, a hranpa taka zirna teh hi i nei em? Tin, he ti khawp hian i lar ta si a, i vahchhuah chang te hian harsatnate i tawk ngai em? I lar hma hun nen tehin i mimal zalen dan a inthlau em?

STP: Zaithiam pawh ka ni lo. Engkim mai hi Pathian malsawma ka dawn a ni. Ka pa hi sorkar hna thawk a nih angin Irawady Division Chawngkung-a kan awm lai atangin Biak Inah hian ka zai ve thin a. Tichuan, ka puitlin deuh hnuah pawh Biak Inah ka zai chho zel a, vanneih thlak takin kan Sayama te hi zai an lo thiam a, anni ho chuan duhsak takin zai hi min zirtir ve thin a. Tin e, Biak Ina ka zaiah te chuan chutianga zaithiam hranpa pawh ka ni ngai lo a. Zai hi ka tuia ka zai chho ve zel a, tun dinhmun ka thleng ta a ni ber mai, hei tak hi Pathian malsawmna chu a ni. Tin, ka u mipa Bawiminlian-a hi zaithiama chhuak zawk tura kan rin (an rin zawk) hi a niin Chin hlate hi tunhma atangin a sa na sa thin a. Mahse, ani chu kan rin angin a rawn ni chho lo. Tin, ka vah chhuah chang chuan tlem harsana chu a awm a. Mahse, chu tiluk chu a ni hran lo. Kei chu zaithiam (A-su daw) ka nih avangin engmah chuan hreh ka nei lo a, Reksaw chuan te, Kea kal vel te pawh hi tunhma ang thoin a remchan dan danin ka kal mai thin.

ZOIN: A nih le, Burma ram zaithiam lar zing atangin thiam i tih fal bik, Mipaah pathum, Hmeichhiaah pathuam-in min hrilh thei em?.

STP: Nia, hetia zawhna i siam takah chuan Hmeichhe zaithiam ka tih te chu; Ya Tana Oo a ni a, ani hi eng ang hla pawh hi a zaithiam vek a, a aw pawh a tha. Chuan a pahnihnaah Zam Nu a ni a, Zam Nu hi Sap hla a hneh hle a, ram dang Asian zaithiam ho zingah pawh Sap hlaah ngat chuani a duai lo ka ti. A pathumnaah chuan Chaw Su Khin a niin ka sawi chuang mai ang a, Zathiam Tin Zar Maw pawh hi thiam ka ti emem a ni. Mipa ah chuan, Lay Phu, Zaw Win Htut leh Myo Gyi te an ni.

ZOIN: Burma ram zaithiam thenkhatin Copy hla an sak thin teh hi engnge i hmuhdan?

STP: Copy hla sak hi hnamdang /Ramdangin min hriat chuan min nuihzat ang. Mahse, min nuih pawh nise kan ramin a phak tawk a la ni miau si a. Chutihlaiin Naw Naw pawhin Hla copy ni lo, amah phuah ngat hla sain a intodelh a, a thiam lutuk tlat. Hunin a rawn hrilh zel ang a, nakinah chuan hla copy sak hi a reh ve tial tialin ka ring.

ZOIN: Awle, hun kan hmang rei ta hle a, zawh duh tam tak che la nei mah ila, a lehpek tan khek mai ila. Hei, tuna kan inkawm hi kan website ZOIN hminga inkawm kan ni a, kan inkawmna thukhawchang hi website lamah dah i rem tiin thla te pawh lakpui kan duh che a, harsatna a awm em?

STP: Hun kan la ngah a sin, i duh duh min zawt zel rawh a pawi lo a nia. Thla min lakpui duh te chuan harsatna a awm lovin, in website ZOIN lama kan inkawmna thukhawchang dah pawh remchan-lohna a awm lo.

ZOIN: I hun hlu tak min pek avangin ka lawm e.

STP: Keipawh ka lawm e.
***********************************
Hetiang hian Thla kan la ho vel a.

************************

PS:::Kan Secretary-in a hun chep tak karah hetianga Zaithiam Sungtinpari ZOIN hminga kawmna a rawn nei thei hi a lawmawm tak zet zet a ni. Tin, Sungtinpari pawhin ZOIN hminga inkawmna hun a lo pe thei hi a lawmawm hle bawk a. Pu Pana sawi ang khian, Rangoon lama kan memberpuite kaltlanga Sung Tin Pari kawm hi kan tum tawh thin a, mahse hun neih dan a inan thin loh avangin interview-na hi neih remchan loh thin a ni zel. Tuntum Japan rama Concert an neih zarah khitiang khian Sungtinpari thukhawchang chu kan Secretary zarah kan rawn auchhuahpui ve ta a nih hi. Ed.