U Thein Sein, President-Burma: Biangbiakna

tahantimes: Politics leh Economics lam siam that hna a thawhnaa ram chhung mai ni lo, international level pawha ‘mi ropui’ tia fak hlawh Myanmar ram hruaitu President Thein Sein leh Germany-a chanchinbu hmingthang Suddeutsche Zeitung-a chanchinbu mi senior tak Stefan Klein te inkawmna a ni a. U Thein Sein hian zawhna te zawt hmasain a sawrkar hmalakna leh a harsatna tawhte history behchhanin Sap tawngin a sawi hmasa zet a, chu mi hnuah chanchinbu mi zawhna chu uluk tak leh rilru sei takin a chhang a. He interview thu hi ‘Suddeutsche Zeitung-ah German tawnga tarlan a nih hnuah Stefan Klein hian Sap tawngin a ziak a, Kawl tawng atanga lehlin ve leh a ni.

Z. Mr. President. President-in ram siam tha tura hma i lak danah khawvel lawm i hlawh hle a. Siam that hna thawktu ropui emaw, Myanmar te ‘Gorbachev’ tiin ko ta che sela, engtin nge i ngaih ang?

Ch. Ka sawi tawh ang khan kan sawrkar hi mipui thlan sawrkar kan ni a. Chu vangin mipui duh dan leh ngaihdan tihlawhtling tura thawh hi kan mawhphurhna a ni a, mipui duh danin kan kal mek a ni a. Mipuiin ka lakah rinna an nghat a, ka mawhphurhna chu hlen ka tum mek a ni. Mipuite duh tihlawhtling tura mawhphurtu pakhatah ka inngai mai.

Z. Mr. President, Mipui duh dan tihlawhtling turin kan bei i ti a, 1990-ah khan mipuiten an duh dan chu an tilang daih tawh a. Engah nge tun chauha tihhlawhtlin in tum? Khang hun lai khan engah nge bul in tan mai loh?

Ch. Khang hun lai khan kan ramah tun anga remna leh muanna a awm loh vang a ni. Mipuite khan remna leh muanna kara an duh dan tilang an ni lo. An duhzawng, ni se an tih kha an pho lang mai a ni. Khatih lai khan remna leh muanna tak tak awm turin Tatmadaw kutah mawhphurhna a awm liau liau a. Tak takah chuan Tatmadaw sawrkarin kum 20 chhung ram tana mawhphurhna a lak chhung zawng khan Myanmar democracy lungphun phum thu hi fiah leh chiang takin ngaihdan a nei daih tawh a. Tatmadaw sawrkar khan democracy ram din tumna a nei daih tawh a ni.

Engpawh nise, khang hun lai khan Taingyintha-ho karah lungrualna a la awm lo va. Ram pawh a la insawh nghet tha lo. A la changkang lo bawk. Tih tak takah chuan ‘siam that leh thlak danglam’ hna hi tun chauha tih tan mai a ni bik lo. 2003 atang khan bul tan a ni daih tawh. Khami kum khan Tatmadaw sawrkar khan democracy tundin nana ke pen dan tur, ‘Road Map’ a ziak a, kal dan tur chhawng sarih a duang a, chumi ang chuan a tah-tawlin kan kal chho ta a ni tih i hriat ka ring. Road map angina kan kal zel a, a tawpna-ah democracy takin mipuiten sawrkar thar kan din ta a ni.

Z. Ka hriat dan a sual loh chuan tuna siam that leh thlak danglam hna kal mek hi Tatmadaw sawrkar hruaitu U Than Shwe (interview-tu sawi dan) ruahman sa kawng thui taka a bung then khat tihna a ni mai em?

Ch. A inang lo. Tatmadaw sawrkar khan democracy tundin theihna turin a bei a. Kan sawrkar hi mipui thlan tlin democracy sawrkar a ni a, ram chhunga democracy system a din theih nan, mipui duh dante tihhlawhtlina a awm theih nan, remna leh muanna leh mipuite socio-economics a insawhnghehna turin theih tawpin kan bei a ni. I chian theih nan tihian sawi ila. ‘Tatmadaw’ sawkarin democracy lungphum phum thei turin a lo bei a. Keini sawrkar hian democracy system puitling ni turin kan bei a ni.

Z. Mr. President. A nih chuan President hian Tatmadaw sawrkar duh dan tipuitling turin a tha thei ang berin i bei tihna em ni? Tuna ‘siam that leh thlak danglam’ tih zawng zawngte nen hian a inzawm vek em ni?

Ch. Ni lo. Thil thuhmun lo a ni. Thil chi hnih a ni a. Tatmadaw sawrkar khan democracy ram a lo nih theih nan, lungphum phum a nih theih nan a lo bei a. Keini lam thung chuan democracy system puitling taka ding turin kan bei a ni. A fiah em?

Z. Mr. President hian ‘He siam that leh thlak danglam hna hi kawng zim tak a ni a, hnunglama hawi kir theih a ni lo.” tiin i sawi tawh a. Ram mipuite zawng zawng hian i kawng sial hi an zawh thlap thlap ang tih I chiang em? Zui duh lova tang tlatte an awm em?

Ch. Kan siam that leh thlak danglam hna hi hnung lama kir leh tur a ni lo. Kan kawng zawh kalsana hnung lama kawi let tumna kan nei lo. Chu vangin tunah hian democracy kawng dik tak kan zawh mek a tih theih a. Hmalam panin kan kal zel ang. Hnung lama let leh tumna kan nei lo va, hma lam pan chauhin kan kal ngar ngar dawn a ni.”

 Z. Mahse, ‘sawrkar leh sipai-ah hnung lama let leh duh, pau khauh deuh deuh an awm,’ ti an awm a. A nih chuan in ‘siam that leh thlak danglam’ tumna hian dodaltu, kalhtu a nei em ni ka’n ti teh ang?

Ch. Chiang taka ka hrilh duh che chu kan sawrkar chhungah hian ‘inthlak danglam’ duh lo pakhat mah an awm lo tih hi a ni. I sawi anga sawiho khan an rinhlelh thu an sawi mai a ni. Kan sawrkar hian siam that leh thlak danglam hna a rualin kan thawk chhunzawm zel ang tiin kan lungrual thap a. Tatmadaw chungchang tlem han sawi ila. Tatmadaw chu insawhnghet tak a ni a, thu pek zawm thlap thlap thin an ni tih i hriat ka ring.

Tatmadaw hian Commander in Chief of Defense Services thupek hi an zawm vek thin a. Dan pui ang thlapa Commanderin Chief of Defense Services hi President-in a ruat a ni. Chu vangin tatmadaw-ah hian siam that leh thlak danglam hna kalpui dodal an awm lo reng reng. Tatmadaw hi Administration lamah a inrawlh lo. Dik taka sawi chuan democracy tundin hna hian ram chhungah eng dodalna mah a nei lo. Ram pawn atang zawk hian economics- a hrekna te, financial hrekna te leh politics thila innawr luihnate a awm zawk a ni. Ram chhungah thil awm a awm lo.

 Z. Thailand ram Bangkok-ah ‘Siam that leh thlak danglam’ chungchang Daw Aung San Suu Kyi an zawt a, ani khan, ‘ngaihtuah chik lem lova a tha lam hlir thlir lutuk lo’ turin a hrilh a, ‘ring ngam tawp rih lo tur’ khan a chah a, kha thu-a Mr. President ngaih dan kha ka hre duh a.

Ch. Kha kha chu Daw Aung San Suu Kyi mimal thlir dan a ni ka ti duh a. Mipuite hian kan ramah ram dang atanga sum dawnna investment an rawn tih hi an hmu chak a. Investment a lo awm chuan mi tam tak tan hna kan siamsak thei dawn a ni. Daw Aung San Suu Kyi mimal hmuh dan ka han tih kha, a mimal thlir dan chu zalen taka sawi theihna ‘zalenna’ a nei alawm. Khatianga a sawi kha ‘buaina’-ah ka ngai lo. Politics-ah chuan ‘inan lohna, danglamna’ kan nei thei theuh a, kan inanna laiah kan thawk dun a ni.

Z. Kum 10 bi-in sawi ta ila. Myanmar hi kum 10 chhungin eng tiangin nge a awm i rin Thailand ang nge? Indonesia ang nge? Khawthlang democracy ram ang nge a rawn nih ang?

Ch. Hei hi thil tam takah a innghat ang a. Entir nan, Politics lamah tluang takin kal ta ila, buaina engmah awm lovin khawthlang ramten hrekna dan te leh politics-a inrawlhna te nei tawh hauh lo ta se, kan ram chu economics-ah a thang duang ang a, ram hausa a lo ni chho ngeiin ka ring a. Tunah chuan ram changkang leh hmasawn ni tura bulthut tha a neihna tur kawl a eng tan niin ka hria.

Z. Rohingya te telin taingyintha-ho inrem taka chenhona federal ram ang a ni chho ang em?

Ch. Ram Danpui nei kan ram hi ramri bial chin neiin taingyintha-te chenhona Union pakhat a ni a. Danpuia inziak ang khan State pasarih a awm a. Union level sawrkar a awm a, state level sawrkar a awm bawk a. Anmahni theuh hian Administrative Power an nei theuh a ni.

Z. Tuna Myanmar ram politics-ah hian sipai lam huvang a na hle a. Hluttaw palai seat zaa sawmhnih panga sipai tan ruat sa a ni. In Ram Danpui hian sipaite chan a pe vawng tha hle mai. Hei hi democracy kalphung kalh a ni lo maw? ‘Engtikah emaw chuan sipaite hi an ‘barrack’-ah kir leh awm an ni,’ tih hi Mr President ngaihdan a ni em?

Ch. Kan rama Tatmadaw te dinhmun hi ram dang a ang lova, danglam bikna riau a nei a. Tatmadaw hi kan national politics hruai hnaah a hnarkaitu a ni thin a. Chu vangin politics khawvel atanga Tatmadaw hi lak hran theih a ni lo. Tatmadaw hi remna leh muanna a ngheh theih nana a hnarkaitu a ni thin. Khaikhin ta ila, Indonesia leh South Korea ramah te pawh politics tualzawlah an Tatmadaw-te a hma hruaitua an tan thu kan hmu a. Khawthlang ram thenkhatah pawh parliament-ah thlan ni lo va, seat luah palai an awm tho va. Kan ram hi ram dang ang lo, danglamna bik riau nei a nih avangin Tatmadaw hi ram politics-ah loh theih lohin an tel a tul a ni. Kan dinhmunah chuan kan tum tihlawhtling tur hian Tatmadaw nen kan thawho ngei ngei a ngai. Tichuan kan tum kan tihhlawhtling thei chauh ang.

Z. Mr. President, Nichin khan Indonesia ram kha i sawi ri a. Tunah hian Indonesia sipaite chu politics tualzawlah an tla ve tawh lo asin. Mr. President hian anni ang deuha kal I tum em?

Ch. An ram an tundin lai khan Indonesia leh South Korea-ah Tatmadaw kha a pawimawh leh langsar lai laiah an ramtang a. Mahse an ramah democracy system a lo dingchang ta tihah tatmadaw-te chuan an inhnukdawk hret hret a, an inrawlh tlem tial tial a. Kam ram pawh hi chutiang deuh tho chu zawi zawiin a la ni ang. Hma lam penin kan kal zel ang a, ram hi democracy puitling ram a lo ni telh telh anga heng ram pahnih te ang hi kan la ni mai ang.

Z. Mr. President hian Daw Aung San Suu Kyi kha Nay Pyi Taw-a kal turin i sawm a, rin loh takin boruak danglam tak i siam ta a, engvanga khatia ti nge i nih?

Ch. Daw Aung San Suu Kyi hi kan hnam pa, Bogyoke Aung San fanu a ni a. Chu vangin ani hi kan politics huang pawn lama hnutchhiah theih a ni lo. Hmanah khan ani hian Tatmadaw sawrkar kha a hmu sirhe a. Mahse ram tana mawhphurhna ka lak hnuah ani nen inhmachhawnin ‘dialogue’ kan nei a. Ka sawi tawh ang khan kan inkar-ah inan lohna nei nual mah ila inanna lai kan nei teuh tho va. Kan ram leh mipuite tana thil tha ti turin kan inanna lai hmangin thawhhona tha kan nei thei ta a ni.

Z. Europe ram mipuite chuan 2015-a President inthlanna-ah Daw Aung San Suu Kyi hi a in-candidate ve thei ang em tih zawhna an siam a. A nih loh leh in Constitution Dan Pui hian in-candidate ve thei lo turin a hnawl ang em ti te-in zawhna an siam a…

 Ch. He zawhna hi chu Administrative lam thil a ni lo va. Judicial (Dan) lam thil a ni zawk a, mi tam zawkin rem an tih tlan te chuan Dan Pui chu a siam that theih alawm. Chu vangin hei hi chu Hluttaw thu a ni ang a. Kei pawhin ka’n zawt teh ang che. Daw Aung San Suu Kyi hi kan ram president atan i duh em?

 Stefan Klein: A…hei chu Myanmar mipuite duh dan dan a ni ang chu. Kei chu foreigner ka ni a. Europe-a a zin khan Daw Aung San Suu Kyi chu VIP, mi pawimawh lutuk angin an lo lawmin an lo chawimawi a. Westminster- ah meuh pawh Parliament palaite hmaah thusawina hun tha tak an pe nghe nghe a. Khang thilah te khan Mr. President hian ngaih dan thlir dan i nei em?

Ch. Europe a zin kual velnaah Daw Aung San Suu Kyi mi pawimawh lutuk anga an lo cheibawl kha ka lawm tak tak a. Amaherawh chu President a nih leh nih loh tur thu hi chu Constitution, Dan Pui-ah a innghat ang.

 Z. Mr. President, Myanmar hi economics leh financial lamah an hreh che u a. Tha I ti nge ti lo?

 Ch. ‘Hrekna dan’ that leh that loh thuah chuan kan ram an hrek hi a tha nge tha lo tih a ni a, nangman chhang zawk mai teh. (Nui chungin) Nangma chhan tur zawk a ni.

 Z. Khawthlang ramte hian Mr. President hmalakna-ah te hian an thlawp vat vat che-in i hria em? Nge, tun aia nasa hian an rawn chet I phut em?

 Ch. Kan ram foreign policy chu khawvel ram zawng zawngte nen inunauna tha tak neih a ni. Khawvel hi chhungkua angin kan awm tawh a. Chu vangin kan ram min hrek hian ram hmasawnna tur than a tithu a, mipuiten kan tuar a ni. Tunah hian khawthlang ram thenkhatte

hian hreknate chu chawlh lai lawk, phelh dul deuh ti te-in an tiziaawm tan deuh chauh a. Kan duh dan tak chuan mipuite tana tangkai tak tak tura hreknate a vaia hlih fihlima ni.

 Z. Zawhna hnuhnung ber: Mr. President, hmalakna ‘Siam that leh thlak danglam’ hna hi a hlawhtlinna number 100-ah dah ta ila. Tunah hian eng chen nge thawk tawha i inngaih? 100-ah 5, 10, a nih loh leh 20 em ni ang?

 Ch. Tunah hi chuan ‘siam that, thlak danglam’ hna a chhawng khatna kan tan chauh a la ni ber e.