TUN HI HUN LAWMAWM A NI

By: Lalthuamliana, Tahan
“Ngai teh u, tun hi hun lawmawm chu a ni” (2Kor. 6:2b)
Hun leh Nun: Hun leh nun hi inzawm tlat, then hran theih hauh loh an ni a. Nunna
awm lohnaah hunin awmzia a nei lo. Hun ti-hun-tu chu nunna a ni. Tun hun hmangtu zawng zawngten kan hman theih chhan chu kan la nun vang a ni a, chumi hrethiamtu tan chuan tun hi hun lawmawm chu a va ni teh lul em! Chutichuan, hun chu nunna tluka hlu a lo ni reng mai.

Nunna petu Pathian chu hun vawngtu a ni a, hun leh nunna chu amah atanga lo chhuak an ni. Hun chu Pathian kutah a awm a, hun pum pui chu “chatuan” tia koh a ni. Chumi chhungah chuan lei mihringten kan
nunna-in a tlin tawk hun tlemte hi kan chang ve a. Chu kan hun tlemte chan ve chhun chu kum, thla, chawlhkar, ni, darkar, minute leh second tiin kan lo then ve a. Chu kan hun thendan mil chuan kan nun kan hmang a, khawsak kan rel a, ke chheh kan rem a, ruahmanna kan insiam thin. Chung zawng zawng kan tih theih chhan chu kan lei nun hi lei hunbi lak ata lak hrana a la awm loh vang a ni a, nunna leh hun vawngtu Pathian hnena lawmthu sawi nan kan hman a phu hliah hliah a ni.

He kan lei nun hi Pathian hun “chatuan” chhungah hian khualzin cham rei lo ang maiin a lo zin ve zawk a, chatuan chhungah vek a kir leh thuai thin. He leilung khawvela a lo lan chhung rei lote hi chatuana a awm dan tur hriltu a nih avangin a pawimawh hle thung. Sam ziaktu chuan lei hringnunin a chan ve chhun he hun tawizia leh pawimawh sizia hriat hi finna a nih thu ti hian a lo sawi a: “Kan dam chhung ni tlemzia min zirtir la, kan fing deuh sawt mahna” (Sam 90:12) tiin. Pathian ngaiha mifing chuan a lei nun chhung tawi te hi Pathian
thilpek hlu tak mai chu a ni tih a hai lova, hun lawmawm chu a lo ni ngei mai tih hriaiin chatuan daih turin a hmang a. Mi a^ erawh chuan a hun neih chu engmah lovah a khawh ral a, a hnuah hunin a nun chu a khawh ral sak ve leh thin a ni.

Chutichuan, hun leh nun chu thenhran theih a nih loh avangin hun khawhraltu chuan a nun pawh a khawh ral tel nghal thin a ni.

Hman leh nakin chu romei ang
Mihringin kan chan ve chhun hun tawi te hi hman, tun, leh nakin tiin kan hman ral dan zuiin kan then leh a. Kan hun hman tawh chu hman, hman mek chu tun, la hman loh chu nakin tiin. Chung zingah chuan tun hi a pawimawh ber a, hman leh nakin chu a tak hmuh tur awm lo, hlimthla mai a ni. Hmana thil thleng tawhte chu a chhia a thain an lo kir leh tawh ngai dawn lo va, ngaia auh kir leh theih a ni lova, inchhir avanga tihdanglam theih a ni bawk hek lo. Hmana kan buaina leh lungngaihna, kan hlimna leh lawmnate chu an liam tawh a, an lo kir leh ngai tawh lovang. Nakin hun pawh hi tun hun a awm avanga awmze nei ve thei chauh a ni. Nakin lama thil lo la thleng turte chuan a tak ramah min la thlen chilh rih loh avangin hmana thleng daih tawh thilte nen
an hlat dan a inang reng a, “tun” chauh lo chuan kan tan awmzia an nei tak tak lo. “Tun” hun i hman dan azirin i “hman” leh “nakin” te chu a hlimawmin a hlimawm lo thei a. Chumi hretuten “tun” hi hun lawmawm a
ni tih an hai ngai lo. “Tun” hi hun lawmawm a ni tia lawm thiam apiangte chu “hman” chuan lawm takin a thlah liam ang a, “nakin” chuan lawm takin a lo hmuak ngei bawk dawn a ni.

Nakin hun lungkham manganna avanga tun hun lawm thei lotute chu mi vanduai an ni. Hmana thilte avanga lungngaihna leh nakin lungkham buaina hian tumah a tanpui ngai lo. Tanpui ahnekin hmai a tichuar a, sam a tituak thin mai zawk a ni. US President 30-na Calvin Coolidge khan, “Harsatna chi sawm lo kala min rawn pan ka hmuh pawhin ngawi rengin ka lo ding a, ka lo nghak mai a ni. Ka hnen an lo thlen hmain sawma pakua chu an thep bo dawn tih ka hre tlat,” a ti nia.

Ni, hman leh nakin chu thal romei anga lung tileng thlawn mai an ni a, a taka kan chen mekna tun hun chauh hi kan innghahna atan tling zo awm chhun chu a ni. Hmanlai hun thlah liam dan leh nakin hun hmachhawn dan tha ber mai chu tun hun hman that hi a lo ni. Tun hi hun lawmawm chu a ni si a.

Tun hi hun tha leh lawmawm?
Tunlai khawvel thil awmzia thlirin mi tam takin tun hi hun tha leh lawmawm niin an ngai thei lova. Indo thuthang leh harsatna chi hrang hrang lo chhuak mekte avangin leilung hunbi hian chhiatnaah min hruai
lut mek zel niin an ngai. A ni lah tak a! Kum zabi 21-na kan thlen meuh chuan khawvel sik leh sa awmdan a mumal hlei thei tawh lova, boruak inlumleh dan maksak tak tak a lo thleng ta. Leilung luahtu mihringte lah chu kan pung chak em em a. Tun kum zabi laihawl velah khian mihring awm zat hi billion 8.9 vel han ni chho tura ngaih a ni a. Chutiang a nih chuan mihring mamawh eibar leh chakna (energy) te chu kan chenna leilungin a siam chhuah theih phak bak kan mamawh tawh dawn a ni. Tun apangin luitui tam tak a lo kang chat tan ta a, thlai chinna tur tui inchuh avanga indona hial pawh a lo la thleng thuai mai thei a ni.

Tuifinriat chhunga rannungte an thi nasa em em a. Mihring tana ei chi sangha leh kaikuangte chu tuichhung rannung za-a sawm chiah an lo ni ta. Chu pawh chu a la tla hniam zel zawk a ni. Thlaler a lo zau deuh
deuh a, tun hmaa thlai chinna lei tha te pawh thlaler an lo chang ta zel mai. Khawvel huapin tlang hrileng mak tak tak a lo awm leh zel bawk a. Tui thianghlim leh thlifimte pawh an kiam zel a ni. Ralthuam huaisar leh hlauhawm lutukte hmanga mihring zawng zawng hi mitkhap kar leka tihchimih mai theih dinhmunah kan ding ta. Heng thil awm dan zawng zawng en hian tun hi hun lawmawm kan la ti thei cheu ang em le?

Pathian fate chhanna chu “Tun hi hun lawmawm a ni” tih a la ni reng. Enganga hun khirh leh harsa pawh hmachhawn ila, chutiang hun hmang thei tura nunna nei mihring zinga chhiar tel kan nih chhung chuan “Tun
hi hun lawmawm a ni” tih hi a bang ngai lovang. Tumahin kan thlan leh dil avanga tun hun hi hmang kan ni lova, hun vawngtu Pathian khawngaihna thilthlawnpek liau liau a ni. Hmangaihte aw ri hre thei a, rimawi chi hrang hrang ngaithla thei leh khawvel mawina hmu thei tura tun hun i hmang thei hi chhut chiang ve la, “Tun hi hun lawmawm a ni” tiin i au chhuak ngei ang. Chumi hriat chianna atang chuan tun hun ropuina leh hlutna hi chiang takin kan hmufiah thin a ni.

Tunah hian
Kan naupan laiin school zirlaiah kan chhiar thin: “Fu hi a zik no lam atanga feh nge tha a, a bul lam atangin?” tih zawhna chhandan chihnih kha. Chhanna pakhatnaah chuan nakina thlum tial tial tura a zik no lam atanga feh tan tur a ni. Chhanna pahnihna thung chu a thlum lai ber, a bul lam atanga feh tan tur a ni; chutilochuan, a thlumna feh thlen hmain mihring nunna hi mitkhap kar lek chhunga boral mai thei a ni si a.

He chhanna chihnihah hian eng zawk hi nge tun hun hman dan tur atan tha zawk ang le? Chhanna pahnihna hi a ni ngei ang. Mitdawivaih ang maia bo thut thin he hringnun, tun hun tawite ah hian a tha ber zel hi
kan thehchhuak tur a ni. Amah P.L.Liandinga tawngkam hawh ila: A tha ber hi nakin atan kan khek tur a ni lo. Nakin hi a lo thlen dawn leh dawn loh kan hre hlei nem. Tunah ngei hian nun dan tha ber leh ngilnei bera nun kan tum ang a, nakin chu amahin a la inrel fel mai ang. Tunah hian a tha ber thlang chhuak ila, a tha ber ngei mai chu i hlimpui teh ang u. Tun hi hun lawmawm chu a ni si a.

He khawvel kan khualzinna hi tum khat chauh kan paltlang dawn a. Thil tha emaw, ngilneihna emaw, duhsakna emaw, midang chunga kan lantir theih chu tunah hian ngaihthah lovin i ti nghal ang u. Tun, tun ngei
mai hi hun lawmawm chu a ni si a.

Thuziak rawnte:
1. P.L.Liandinga, Heile vawiin
2. Rev. C. Rosiama, Dam chhung ni chhiar dan (Article)
3. James Martin, The Meaning of the 21st century.