TUINGO KHUA-AH LUNG SATEL MAK

By B. Zosangliana, Tahan
Tahan khawpui atanga KM 20 vel hlaa khaw nuam tak, Tuingo, ‘B’ Group-a awm Pu Zunglianvela chuan Satel mak tak mai a kawl a, ni tin mi thahnem takin an en thin. Lei tuma ente, thil mak a nih avanga ente, chanchinbua chhuah atana ente an ni nuk a, Pastor leh evangelist-te pawh an tel nual.

He Satel hi nunna nei Satel chu a ni lo na a, a kal sawn thei a, thlai, buh leh rannung a ei thei a ni. Satel pangngai ang chiahin a tial a, a dulah pawh a mawng leh a ke ni awma lang zia a nei.

Kum sarih kal ta khan; Kan Gyi khuaa U Htun Aung-a’n he lung Satel hi Bungchaung (Sakhangyi) luiah a chhar a, a danglam em avangin mak a ti a, a hawn ta a. Pu Zunglianvela hi Kan Gyi-ah in sain a inhlawh thin a, thil man to tak nia a hriat avangin Pu Vela chuan a hmuh veleh Ks. 5000/-a lei a dil a; mahse, an phal lo va. A ai sang deuhva lei te pawh a dil zel a, an phal chuang lo va. A dawnna man a tihsan deuh takah chuan 2012 February ni 23 khan Ks.100,000/-in a leisak ta a, a lei lai hian a chhartu hi a boral tawh nghe nghe.

He lung Satel hi buk 7.5 vela rit a ni a, a phêk hlai lai bera tehin inch 11 a ni a, a sânna lai ber pawh inch 5.5 a ni. A thang chak ve hle a, an chhar hlim aiin a lian zawk fe tawh a ni. Nunna nei angin a chêt sawn theih leh theih loh a neitupa hian a chhin a, tui inch 2 vela chhah dahna bêl darah a dah a, a hmalam leh a sir lamah inch 1.5 zetin a tawlh sawn a, sangha an dah chu a mei leh a rilte a lo ei a, kuangkuah hnah an dah pawh hîp betin a lo ei thin a ni tih a hmuna enfiah; Zo Rûn palaite chu Pu Vela hian a lo hrilh a ni. Lung Satel hi a e ve thin a, a êk chu a rimchhe hle a, a khât tâwkin tui an thlâksak reng thu a sawi bawk. Chengkawl pawh bêl chhungah chuan a dah a, nung reng siin a che sawn thei reng reng lo.

A mak leh em emna pakhat chu; ni saa an dah pawhin tuia dah ang maiin a vawt thlur reng a ni. A tiapui lung chu hetiang hian a rit thei lo tih chu mi pangngai tan chuan hai rual a ni lo. Pu Vela sawi dan chuan he lung Satel hian hlutna riau a nei a, diamond emaw, rangkachak emaw a tichhuak (ei chhuak) theia ngaih a ni. Lung lam chinchang hria mi eng emaw zatin an en tawh a, Mandalay-ah keng thlain Kachin-a mi hausa pakhat pawhin a ensak tawh a, cheng nuai 5000-a lei a duh na a, an state-ah buaina a chhuah avangin a leisak thei ta lo niin a sawi. Tahan-a pa pakhat pawhin nuai 200-a lei a dil a; mahse, a phal rih lo niin a insawi bawk.

He lung Satel hi a danglam em avang leh hlutna riau neia miten an hriat avangin a neitu Pu Zunglianvela chuan a roh hle, zanah a mutpui hial thin a, mut tui loh phah nan pawh a hmang zauh zauh thin. Tunah hian cheng nuai 2000 vela lei duh an awm chuan hralh a phal thu Pu Zunglianvela chuan kar tin chhuak; Zo Rûn chanchinbu a hrilh a ni.