By: C. Zaithankunga, Tokyo-Zawlbuk
Ka theih leh ngam vanga ka sualthluk emaw ka lo tih thin, hriselna chuan min kiansan ta emaw chu ka ti hman hial mai! A nia sin, kan ngam vangte leh sum leh pai neih vang ni hauh lova, a thlawna Lalpa min pek hriselna hi kan lo hlamchhiah palh mai ang tih hi ka hlau ngawt thin.
Kei, tlai chaw ei dawna (thil) duh ve tak poh ka chesawlh na sa. Tuipuiral, chhungkhat laina hnai awm lohna hmunah theih vang ni hauh lo, Pu Zawnte duhsakna vang liau liauin, chawrno lo zetin ka chhuak ve a. Oze (Japaness) tawng kawi khat mah thiam lo keini ang duang tan chuan, hrilh a hai lunglen a zual. Amaherawhchu, tawn loh loh tur/tawn ngei tur zawk? VANTIRHKOH ka tawn phah ta.
Kan veng Ichikawa rail station atanga dam leh hrisel taka ka chhuak chu minutes (40) ka tlan hnu mai chuan thlanfimin min leih/bual huh vek a. Ka lu a hai muai muai a, ka kut leh ke te pawn chakna thahrui reng an nei ta lo. Aw!! khawiah nge ka chaknate, ka theih vena thin zawng zawngte kha? Ka tah a chhuak a, ka mitsulh mai bawk a. Mi chhiarsen loh ten min kal pel suau suau a. ‘ka ui, ka ar ‘ min titu reng reng an awm si lo.
Beidawng leh mangang em emin, Rail st.-ah ka thu sawp hnawk a.Chhantu ka ngai, puitu an awm hlawl si lo. Chutia ka thi tlaw mai tur chu Lalpa’n phal bik lovin, A VANTIRHKOH hmel duhawm tak a rawn tir ta!! Thianpa Hlimpuia chuan min rawn hmufuh hlauh mai. A ni, Japanese tawng thiam leh an zeizia lo man tawh chuan, awlsam takin dam lo phurhna motor (Ambulance) a va ko thuai a. Hospital lamah min phur phei ta vawn vawn mai. Mite tan chauha an siam emaw ka lo tih thin (Ambulance) chu ka tana siam a lo ni ve rang nia.
Mizopa diktak leh Tlawmngai, kei ka tana hmuh theih Vantirhkoh Puia chu awm lo nase zawng, ka chan khan maian chan poh a tluk hauh lo vang le. Minute khat chauh pawh hna tlai phal lohna ramah Mizopa Tlawmngaihna chuan, Darkarfe mai min han buaipui ta a nih kha. Ka zak ngawih ngawih a, ka lawm viau lawi si. Khawi hmunah pawh awm ila, ‘Mizopa Tlawmngaihna zawng a par vul zel a nih hi’ ka ti rilrua. Lalpa, ‘Mizoa min lo siam hi ka lawm e’ tiin, rilru chhungin ka tawngtai mawlh mawlh bawk a.
Aw!! Vnatirhkoh dang Pastor Pu Joseph-a a rawn thleng phei ta hlawl mai. Thianpa Puia chuan loh theih lohna avangin min chhuahsan a. Pastor Pu Jospeh-a ten darkar hnih zet min awmpui hnu chuan kei paw’n ngai ka awhchho leh bawk a. Lawm takin Hospital chu kan chhuahsan ta. Mel sawm chuang fea awm kan in (Tokyo Zawlbuk) kawtkai thleng an motor-a min thlah chu ka lawm zia thu maiin ka sawi seng lo. Lalpa’n a let za tamin malsawm mawlh rawh se.
Sap thufingin,“Healht is wealth” an lo tih hi hrethiam turin Lalpa’n min zirtir a nih hi ka ti rilru neuh neuh a. A nia sin, damlohna te, thihna te hi total prohibition puan khum ka va han nap tak em!! Chhiartu duh tak, zuk leh hmuam ilo lakah i fimkhur zual sauh ang u.
Zaia, i chanchin rilru khawi tak mai i rawn ziaka a lawm awm hle mai.
Sum leh paiin a lei zawh loh Tlawmngaihna thinlung putu Mizo nih hi a nuam a ni.
“He rilru Isua Krista pawha awm bawk kha nangmahniah awm rawh se.”