By: Dika, Calgary
Vawin Easter Sunday hi kan Fellowship chuan tlailamah ruaipui nen hunpui urhsunna kan nei dawn a, kan EC te pawh nimin atang khan, ruai tur ngaihtuahin an buai mup mup tawh a. Tin, hunserh hmanna tura chanvo nei te lahin inpuahchahna tha tawk nei turin hun an pe a, kan thalai rualte pawhin fakna hla rem turin Inrin tlaiah an zir ho mup mup bawk a. Hunpui hman tur a nghahhlelh awm hle mai. Tin, keini ang tho hian hmuntina rinna kawnga kan unaute pawhin mahni khaw dinhmun angziazelin he kan NIPUI tan hian inpuahchahna urhsun takin an nei ngei ang.
A ni, Krista THAWHLEHNA NI hi khawvelmite tan luhai buaina ni a nih laiin a pian thu leh a thih thuah erawh mihring nihphung tiin an pawmzam mai a, an dodal hek lo. Ama’rawhchu thihna hneha a thawhlehna Ni chanchin erawh hi chuan khawvelmite lu a ti hai a, an dodal a, vawin thleng hian an la hnialkalh fan a ni. Keini, amah ringtute tan erawh a thawhlehna Ni hi kan damna Ni a ni thung a. Ziaktupakhat pawhin, “Kristiante chhinchhiahna hi Kraws lem ni lovin, thlan ruak lem hi ni zawk awm tak a ni” tiin Krista thawhlehna avanga thlan lo ruak ta pawimawhzia hi hahipin a lo sawi a. A dik hmel khawp mai.
Lal Isua, thihna hneha a thawhlehna thu hi Kristian thurin vawrtawp a nih rualin a innghahna bulpui pawh a ni a. Tirhkoh Paula pawhin Krista thawhlehna tel lo chuan kan thurin te, kan thuhrilte hi engmah lo a nih thu a lo tlangaupui a. Hetiang hian “Krista kha kaihthawhin a awm loh chuan kan thuhril hi engmah lo a ni ang a, in rin pawh engmah lo a ni bawk ang(1Kor. 15:14). tiin. Tin, Krista thuhretute pawhin an thu hriatpui ber kha “Krista thawhlehna thu” bawk hi a ni a. Khatia, Thlarau thianghlim an zinga a lo thlen hnu a, an thupuanchhuah hmasa ber pawh “In khenbeha kha thihna chelh hlen rual lohin a tho leh ta! Chu chu a hretute kan ni e” tiin.
Hun inherdanglam zelin tunlai hriatna leh zirbingna sang zelah Kristiante zingah ngei pawh Krista thawhlehna chhut bova, ring thei lo an la awm mek zel tih pawh chhutmite auchhuahpuina atangin kan hre thei a. Hengmite hian thawhlehna thiltihtheihna an chang pha lo va, an hmu phak bawk hek lo. Chungmite chuan Kristaah zar zo tur reng an nei lo a, an nun chu a thihnaah a tawp a ni.
Krista thawhlehna ringtute chuan thawhlehnain a ken tel, thiltihtheihna chu changin khawvel leh thlan anchhia chu hlau lovin “Tih Dam kan Ni Ta, Aw… Haleluiah……” tiin an auchhuahpui hawm hawm ta zawk a nih hi. A nih, Thawhlehna thiltihtheihnain a ken tel zinga thil ropui tak tak hi a changtu i ni ve em?
1.Krista thawhlehna chuan thlamuanna min pe.
2.Krista thawhlehna chuan beiseina nung min siamsak.
3.Krista thawhlehna chuan min ti huaisen.
4.Krista thawhlehna chuan chatuana nunna min pe……etc….
Awle, kan khua (Fellowship) chuan he hla ropui tak hmang hian vawin tlaiah kan Haleluiah hawm hawm dawn a ni.
