THUMAL PAWIMAWH BER BERTE

Lalremzauva , Kawlkulh (Myanmar)

Thuhma: Mizo tawnga thumal (word) tih chu hawrawp (Alphabet) te te awmze neia remkhawm hi a ni mai a. Mahse thumal chuan thil a ti theiin a thawk hlawk thei em em a, mihring inlaichinna atan hmanraw pawimawh tak a ni. Tun tumah hian chung thumalte chu kan sawi kim seng lo vang a. Kan sawi hmain thumal pawimawh lo ber chu ‘keimah’ tih hi hre hmasa ila a tha awm e.

1. Ka tisual tih ka pha lo
Miin thil an tihsualin emaw, tih fel hlehin emaw phatna tur an zawng chamchi. Chu chuan mahni thiam a inchan a, inlaichinna nun a tichhe bawk, a pawi em em a ni. Chuvangin kan tisual emaw tisual lo emaw pawh ni se, kan nihna dik tak kha zep lovin huaisen takin kan sawi tur a ni. Chu chu puitlingte zia a ni ngai! mi puitlingte chuan an dikna leh an thiamnaah pawh, “keima thiam loh a ni,” an ti thin.

2. I hna i thawk tha
Fakna tel lo, sawiselna leh zilhhauna chuan mi a siamtha ngai lo. Chuvangin, i thawhpui chu a tih sualah sawisel lovin tanpui la, a tih thatin fak thin la, tichuan i kianga rawngbawl nuam a ti ang a, kum tluanin in lo thawk dun thei dawn zuk nia.

3. Eng nge i ngaih dan?
Mahni duh dan leh ngaih dan chauh tha ti hruaitu chu an chimawm duh hle. Chuvangin, kan duh dan leh ngaih dan a nih loh pawhin lungawi dan zir thiamin, thawhpuite ngaih dan ngaichang thiamtu nih tumin tan la ila, tichuan, pheikhai rual takin hma kan la dawn nia.

4. I theih chuan
Sawmna aw mawi, tawngkam hawihhawm hmante hi a lo dawngtu tan a lawmawm chungchuang. Kan thawhpuite chaklohna hriat thiampui leh an thiamthil te, an theih zawng te, huaisen taka an chetchhuahpui theih nan kawng zawna kawhhmuh hi kan tih tur a ni. Chutah chuan hawihhawm takin ‘I theih chuan’ chanvo tantu, solo…adt…i nei a nia emaw hnatlang min rawn ho dawn nia aw! tiin.

5. Ka lawm e
Naupangte miin thil an pekin ‘ka lawm e’ ti rawh, tiin kan hrilh thin a. Mahse, a hrilhtute hian he thumal hi kan hmang hreh tlat ni hian ka hre thin a, a pawi hle! Hnampui zawkten he thumal hi kan hriat angin an hmang nasa hle. Keini pawhin kan inlaichinna a lo that deuh theih nan he thumal hi i hmang uar sauh ang u.

6. Keimahni / kan
Kan sawi tawh angin thumal pawimawh lo ber chu ‘kaimah’ tih kha a ni a. A inti hrang a, a huap zim hle. Keimahni / kan tih erawh chuan a huap zau va, pawlho zawng zawng kha a huap a ni. Department pakhat, pawlho thawhhona zinga mi kan nih chuan thawhhona leh thiltih tur eng emaw a lo awmin kan tel rem chang thei lo a nih pawhin, kan ti tha em? emaw kan kal tha em? tiin. Chu chuan kan thawhhozia te, kan inpumkhatzia te, kan lungrual ziate a tilang a, pawlho nun inzawmna a
tinghet thin a ni.

Tlangkawmna
Famkim lohna khawvela cheng nafam chu kan hriatna, kan thiamnate hi a famkim tawk thin lo a nih hi. Chutiang chuan tunah pawh famkim lo takin duhtawk zai kan lo rel dawn chu a ni a. Tawng upain, “Tawngkam thain sial a man,” a ti a. Chutiang tak chuan kan chunga miin ti se kan duh ang chu kan thawhpui, rawngbawlpuite leh kan thiante chungah pawh duhsakna i hlan ve ang u hmiang!!!