Thu Tharhlam

Alexander Kirilov, 44, chuan zu rui chung hian ramsa, Raccon a hmuh chu mutpui a tum a, vanduai thlak takin chu ramsa chuan a serh chu a lo seh bun sak hlauh mai a, Moscow clinic pakhata doctorte chu a tibuai phili hle a ni.

“Raccon ka hmu a, mutpui ka tum a, min lo seh a lawm maw le”, tiin Alexander hian doctorte hnenah a inpuang a. A serh chu zawm sak leh theih a nih thu Mosco doctorte chuan an lo hrilh mial a, mahse ramsain a seh thlaksakna lai erawh chu thuisak ngaihna an hriat loh thu an lo hrilh a ni.
======mizokhawvel=====

Thawhtan zing 3 : 30, mipuite mut reh lai takin Italy khawpui pakhat, L’AQUILA chu lir nghingin a nuai a , mi 92 an thi a. He lirnghing, 6.3 mag.. hian khaw 26 lai a hrut a, L’AQUILA khawpui laihawla building lian tawk phei chu a sawi chim hial a, sang tam takin chenna in an hloh bakah mi 1,500 chuangin hliam an tuar a, building chim hian mi tam tak chu a delh mek bawk a, mithi zat pawh hi a pun zel an hlau thawng hle a ni. Italy official ten an report dan chuan he lirnghing hian, in 10,000 atanga 15,000 hial a sawi chhia niin an ring a.

Greece sawrkar chuan Italy a vanduaina tuar mekte tanpui turin damlo bawisawmtu pawlho a tir chhuak a, tin, khawvel hruaitu tam tak leh President Obama pawhin an tawrhpuina an lantir bawk.
=====mizokhawvel=====

North Korea-in thla lem a kah chhuah avanga hrek rawtna chu UN Security Council-ah a tlang zo ta lo. US, Japan leh South Korea-ten North Korea hrek tura UN Security Council na taka an nawr chungin, Security Council member ram zingah inlungrualna a awm thei lova, hemi avang hian, North Korea-in thla lem a kah chhuah avanga hmanhmawh taka thu khawm, UN Security Council chu thu tlukna siam lovin an tin ta rih a, Japan sawrkar nawrna avanga thukhawm, Security Council hian North Korea chungchang la sawho chu an remti tlang a, mahse US rawt anga sum leh paia North Korea puihna tihtawp leh an hnena ralthuam hralh tihtawp erawh chu he inkhawm hian a hnawl ta rih a ni. US rawtna hi Russia, China leh ram dang pathumte chuan na takin an hnial a, North Korea in Ballistic Missile a en chhin khap tura US rawtna pawh heng ramte hian an pawmpui duh lo a ni. US, Japan, China leh South Korea-te dodalna leh vauna karah North Korea hian nimin khan thla lem a kap chhuak lui a ni.
———–

Kum 15 kal ta-a Rwanda mite suatna rapthlak taka thi te ruhro chu Uganda-ah phum that tum a ni. Uganda-a Rwanda palai, Ignatius Kamali chuan heng ruhrote hi a vuina inkhawm buatsaih hnuah thlan lian tak pathumah phum khawm an remti tih a sawi. He chibing suatna-ah hian Rwanda mi nuai 8 zet tihhlum an ni a, thi zinga tam tak ruang chu Rwanda luiah paih a ni a, luia paih loh ruang sing 1 leh sang 1 dawn lai a huhova phumna hmun chu, Uganda-a Lake Victoria bulah helaia chengte hian an hmu chhuak a, heng ruhrote hi Uganda sawrkar remtihna in an ram chhungah vek phum that a ni dawn ta a ni.
———-

US-a Washington State-a pa pakhat chu a fate panga a kah hlum hnu-ah amah a inkaphlum. Police sawi danin, he pa, kum 34 mi, James Harrison hi a nupuiin a chhuahsan a, hemi avanga a thinrim chuan, an chenna Trailer House-a a awmpui, a fate panga chu a kap hlum a, hemi hnu hian amah a inkaphlum ve nghal a ni. Naupang thi-te hi kum 7 atanga kum 16 mi an ni a, heng naupangte hi an nu in a chhuahsan hnu lawkah an pa hian a kap hlum ni-a rin a ni. Naupang pali hi khuma an mu lai, an lu-ah kah an ni a, pakhat dang chu Bual in-ah kah hlum a ni a, a kap hlumtu nia hriat, an pa hi a fate kah hlumna atana a hman, Rifle hmangin pawna a Car chhungah a inkap hlum a, a ruang an hmuh thleng hian a chuanna Car engine chu a la nung a ni.
————

US President, Barack Obama chuan ni 2 cham turin Turkey khawpui, Ankara a lut a, Turkey-in European Union (EU) zawm a tumna chu a thlawp tih sawiin Mosolman ram Turkey-in EU a zawm chuan, Mosolman ram dangte tan inngaihtuah tharna a siam a beisei tih a sawi. Obama hian zanin hian Istanbul khawpui a tlawh dawn avangin veng himtu police 9,000 duty tir an ni a, hetiang karah hian, US ngai thei lo pawl thenkhat chuan lungawi lohna lantirin kawng an zawh lui a ni. Turkey-a luh hma hian Praque-ah thu sawiin Obama chuan, EU leh US chuan Mosolman ramte chu unau ram anga an kawmngeih pawimawh a tih thu a sawi a, Mosolman ramte nen, inhriatthiamna thuk tak nei chungin, tharum thawhna leh dik lohna hrang hrang a do tlan theih tih a ni a ti a, khawvel pumah remna leh inunauna a awm theih nan, Nuclear ralthuam la siam lo ramten an siam ve lohna tur leh a nei tawhten an tihchhiat theih nan hmalak ho a pawimawh tawh takzet a ni a ti bawk.
————

US sipai hotu lian ber pakhat lo ni thin, General David H. Petraeus-a Adviser hlui, David Kilcullen chuan, Pakistan rama mi firfiakte chet dan enin, he ram hi thla ruk vel chhunga chhe vek thei dinhmunah a ding niin a sawi a, Pakistan ram hi nuclear ralthuam leh Al Qaeda awm kawpna ram a nih miau avangin, helna leh a firfiaka chetna-in a la hnuk thlu thei mai dawn niin a sawi. General David H. Petraeus-a ngei pawh hian hetiang thu deuh chiah hi kar hmasa khan America ram rorel khawl hma-ah a lo sawi tawh a, Kilcullen-a hian, tunlai hian Pakistan ramah tun hma zawng aia nasa zawka mi firfiakte chet thar tak avangin, anmahni, Pakistan ram leh America mi thiamte pawhin he ram hmabak, hrilh lawkna ang hial an sawi tan ta niin a sawi. New York Times chanchinbu pawhin, President Barack Obama-a’n Pakistan rama a firfiaka chetna hneh tur hian ruahmanna nei mah se, a hlawhtlin a rinawm tehchiam lo niin a sawi a, Pakistan mite lah hian India hi an hmelma lian berah an ngai reng bawk si a, Pakistan hmabak hi a thim hle niin a sawi. President Obama-a inphalna hi Pakistan sorkar chuan, sum a hmuh theihna tur a ni tih hriain, a lang a pau chuan lawmawm a sawi na a, thil awm dan hre chinte chuan, he America tangka hian awmzia tehchiam a neih an ring lo niin New York Times chuan a sawi.
————-

Indonesia ram sipai thlawhna pakhat chu vawiin khan Bandung airport-ah a chesual a, a mi phurh, 24 chu an thi vek nia hriat a ni. He thlawhna, Fokker 27 hian sipai, special force trainee, parachute hman zirlaite a phur a, khaw chhe tak hnuaiah Bandung khawpui pawnah hian a chesual a ni. Air force thupuangtu, Bambang Sulistyo chuan thite zingah hian thlawhnaa thawk mi 6, instructor pakhat leh sipai training lai 17 an tel tih a sawi. Indonesia sipai thlawhnate hi a hlui tawh hlawm avangin an chesual fova, vawiina thlawhna chesual pawh hi kum 30 chuang an hmang tawh a ni.
—————-

Nimin, Pathianni khan Pakistan, Punjab province-a Shia Muslim biak ina thih chilh bomb puakah mi 22 an thi a, mi dang 40 chuang an hliam. He pawi khawihna hi US Special Representative, Richard C. Holbrooke-a’n Pakistan a tlawh dawn ni chiaha thleng a ni a, bomb tipuaktu, mipa naupang, kum 15 vel mi nia hriat hian a bomb pai ruk chu he biak in, mi sang khat chuang pun khawmna Gate-a sipaiten an lo tihdin laiin hian a tipuak a ni. Shia Muslim te hi bomb hmanga beih fo an nih avangin an biak in pawh an veng ngun hle a, he hmun hi lo neitu hausa tak takte tamna, Lahore panna kawnga awm ni mah se, tun hma chuan khaw ralmuang tak a ni thin a ni. He biak in Gate hi uluk tak leh a him thei ang ber tura siam a ni a, bomb kengtu hi biak in hung chhungah lut hman phei sela chuan, hei aia tam daih hi an thi ngei dawn a ni.
=====zonet=====