THINLUNG THAWNTHU

By: Denbawihi, UAE
Ka thiante u, ka buai rukna ka han hrilh ang che u. Ka taksa bung hranghrangah hian ngei deuh mai pakhat ka nei a, chu thil chu ka control theih loh leh ka thu awi lo tak, ka THINLUNG hi a ni. Mi/thil pakhat a hmangaih em avangin ka rilru a ti mangangin a ti rum thin na. Chu mi a hmangaih luat avang bawkin ka vanglaini zawngte’n zamual min liam san ta. Ka hmelma ber chu he ka thinlung hi a lo ni. Eng vang tehlul nge ni ang he ti fakauva a lo hmangaih hi le!!

He ka thinlung hian a hmangaih tlat pakhat vangin ka thlarau pawh a ti chauvin a ti ngui zo va. Naupang ianga tapin banzai reng ka rel thei lo. Aw…..ka thinlung, “nang hi hmelma nunrawng tak I lo nih hi le” tiin ka au chhuak leh ringawt.

He ka taksa peng hrang hranga hmun laili ber luah tur hian ka phal tawh lo’ng che; nang ka hmelma tan hian tiin khandaih hriam hmangin chu ka thinlung chu ka phawrh chhuak a, hreawm tinreng ka tawrhtir a, ka sawisak hrep hnuin thlanmualah ka phum liam ta a; ka awm a nuam deuh mahna tiin.

Chu ka thinlung ngei, thlanmuala ka phumliam tawh a chu ka hringnun ti buaitu ber a ni tih in hria a, thawh leh zai rel tawh loa’n amawi a sin!! Mahse thlan thim a ta lo tho lehin a hmangaihtak kephah hmaah chuan a lo va kunnn leh s a. Ka va han beidawng tak em! He ka thinlung hi Hmelma chimawm ber leh nunrawng ber a lo ni e, kei ka tan chuan.
Ka dang thei lo, a duh ang a piang ti turin thu ka pe ta a, he ka thinlung vanga hreawm tinreng ka tawrhte chu luaithlihnul chungin tuar zel mai nang e! tih chu kan inhnem theihna awm chhun ber a lo ni ta.

A chunga ka rawn sawi takte khi T-Melody Album pakhata an album hming putu “Thinlung Thawnthu” tih hla a ni. A phuahtu hi The Rengs (Lalrengpuia) a ni a, hetianga hla danglam tak mai a phuah thiam hi, a ropuiin a fak awm hle a ni ka ti lo thei lo. A hla satu, Lalnunsanga lah in a sa urhsun thiam em em mai chauh ni lovin a hlathu nena inmil taka awpek a thiam avangin min hneh em em mai a ni. Thianten in lo ngaithla liam mai mai palh ang tih ka hlau hle a, hla thu chiang taka kan hriata kan ngaihthlak hian a manhla leh zual thin. A hla thu leh a thluk pawh hi a in hmehin a inchawih em em mai a, a ropui a ni tawp mai, I lo la hrengai lo a nih chuan han play nghal teh ang aw “Thinlung Thawnthu”

THINLUNG THAWNTHU

He ka thinlung, Hmangaihtu che vang hian,
Aw ka rilru, Mangang(in) a rum thin;
Nang hmangaih che vangin, hlimlai zawngten..Aw zamual min liamsan ta,
Hmelma hlauhawm ber a lo ni..He ka thinlung hi!!

He ka thinlung, Hmangaihtu che vang hian,
Aw ka thlarau, Chauvin a ngui thin;
Nang hmangaih che vang hian, senlai nau anga tahlai ban zai rel a har ngei,
Hmelma nun rawng ber a lo ni..He ka thinlung hi!!

Tanglaia run rem tir ka phal nem maw..hmelma tan,
Khandaih hriamin aw…ka hmelma chu, fam ka chantir a;
Hreawm tin tawrh tirin, thlanthim hnuai a zal turin, ka hnawl liam ta,
Hmelma hnawksak ber a lo ni…, He ka thinlung hi!!

Chu ka thinlung, famkhaw lawi hnu ngei chu,
Thawh leh zai rel, renga’n a mawi lo;
Nang hmangaih che vang hian, thawh zai relin, I kephah hmaa’n a kun leh si/maw,
Hmelma chimawm ber a lo ni.., He ka thinlung hi!!

***T-melody zofaten kan chhuang hle a che u. Thangtharte’n in hnung kan rawn zui zel e.***