Ka nau hian tum khat chu fiamthuin, “English ho chuan Lift an tia, American ho chuan Elevator an tia, Mizo chuan Millennium Centre kan ti,”a tih hi ka rilruah a cham reng mai a. Khawlai titi na ah chuan, “An van thing tak. Lift-ah te an chuang luai luai a,” an tih hi ka hre bawk a.

Kan ram dinhmun min thlir thui tir hle mai- heng tawngkam kan hriat te hian. Han ti ve khanglang ila, kan intihhlimna neih chhun te hi a lo la sang lo hle mai! Changkan hi a la hlat hmel angreng thin e. Ram danga Cinema hall te, Amusement park te hi, hui ha… rualawh a na duh hle mai!!

Zokhaw naupang leh thalai tam tak Aizawl ringawt pawh an tana kal harsa te tan te, tin, khawpui lama thalaite han intih thawvenna tur hi enge kan ngaihtuah ang le? tih hi ka ngaihtuah ve mai mai thin a, tun anga hun kan hmang chho reng anih chuan thalai te nun chep lutuk puak keh hi kan tuar zo ang em? tih te ka ngaihtuah mai mai bawk a, kan ram nghahfakte an ni si a.

Khawvel a changkang tawhin thiamnate a sang a, tin, khawsak pawh a sang telh telh mai, chutih rual chuan mihring nun dan pawh a dang telh telh a, khawvel inher dnglam zelah hian kan fate, kan naute, kan u te hlawhtlin tir kan duh chuan kum 1996 ni lovin kum 2008 nun dana kan nun thiam a tul hian ka hre ve mai mai thin.

Inhriatthiamtawnna hi a bul tana han ni ta se, mimal ngaihdan niloin, pawl pakhat ngaihdan bik pawh ni loin, kan zavaia nawmna tur leh thatna tur, Pa emaw Nu chauh emaw hamthatna ni lo, tu fa emaw, tu chhungte bik emaw nilo, changkan duhna avanga inhriatthiam tawnna hi.

Nawmsak ringawt ngaihtuah min ti mai thei, mahse, ka ni lo. Mihring hi phuar emaw hren emaw a a awm chuan, chhuah chakin a rum a rum thin a, a inphelhtumna lamah a inhliam nual thei tlat, chu chu kan mizo thalai te dinhmun a ni em aw, ka ti mai mai.

A Pahnihnaah chuan duhthlanna inzahsak tawnna ni ta se, entirnan- naupang pakhat kan zir duh zir châk lo nei ta sela, phal loh bur ai chuan han phal sak chin sela, amah-erawhchu enthlatu tha tak nu leh pa awm ta se. “Hmanah kan tleirawl laiin kan ti vek tawh, a sawt lo” tih ai chuan anmahni khan han ti sual ve chin se, an thil tawn chuan a ti fing sawt law’ng maw. Chutih rual chuan an tluk nat loh nan lo ti ve tawh thin, lo tuar tawh te chuan veng ta chauh zawk sela. Naute chaw barh a, “Ei rawh, ei suh” tih hian kan thalai te a ti fing sawt ang nge, a ti mawl tut ang tih hi ka ngaihtuah chawk bawk.

A pathumnaah chuan, a sawi tam aiin a tih lamah han chak ta ila, kei ngei pawh hi, a ziah lam aiin han thawk chak zawk bawk ila, kan hma chu a eng uar ka ring tlat. ‘Tumna a awm chuan kawng a awm’ tih kha maw le sap thufing chuan, chuvang chuan khawnge, sumdawng pawhin a hlawk nan a sumdawng a, Kristian paw’n Vanram luh nan kawng leiah a sial a, Zoram mipuite paw’n Zoram kan za vaia tana a nawm nan leh a changkan nan kan bei ve dawn lawm ni.

Tin, tu tih tur bikah bur bun lo ila, kei leh ka chhungte, kei leh ka thiltihte chu ka mawhphurhna ti vek thei dinhmunah puitling takin han ding ngam ta vek ila, tu sawrkar, tu pawl mah kan ngaih ka ring bik lo.

A tawp ber atan chuan- luak chuak khawpa thil tih erawh a awm, lu leh mawng hre hrang lek lo khawpa khawsak erawh tunlai “Changkanna” an tih ah hian a tel ve lo. Hetiang ching mi hi chu lo tel ve lo mai se, amaherawhchu keini Mizo tlemte zingah hian zilh fin theih loh khawpa mawl kan awm in ka hre lo, mahse a zilh tu ten tihdan phung tha tak an neih erawh a tul hle thung.

Hetiang a kan ram dinhmun alo nih hunah chuan, ram hmangaihtu dik tak leh dik lo pawh thlitfim a awl viau tawh ka ring tlat a ni.
Thulakna: wWw.zOrImAwI.blogspot.com
Bonus atan— Kar Hla Di