By: Lalrampana, Japan
Kan ram (Burma) atanga chanchin ka dawn danin, a tum thumna atana TCYF Icon 2009 chu kumin November 24-27 zanah Tahan EFC Hall puiah ropui taka buatsaih theih lehtumin a buatsaihtu tur Tahan Christian Youth Fellowship EC te chuan hmawr an bawk tan ta. Kumin Icon thlanna turah pawh hian tumah thliarbik nei lovin, eng Kohhran atang pawhin hming pek luh theih a ni, tiin ka thudawnna chuan a sawi.

TCYF Icon thlanna hmasa ber kan buatsaih dawn a, ka rilru ti hahtu ber chu mipui lamin min hlutpui a ngem? tih chu dah that, zai intihsiak tura hming peluttu hi kan nei a ngem! tih hian ka rilru kha a luah hle a. Mahse, kan han tan chiah chu ka rin piah lamah kan thangtharte ti kan lo tiza a, Kohhran hrang hrang atanga an zaithiamten hming an rawn pe malh malh mai a, a hlim awm ngei mai.

Tin, ram chhunga mipuite’n min hlutpui a ngem tih khan ka rilru kha a luah hle bawk a, mahse ram chhung sawi loh ram dang atanga kan thawm hria kan u leh nau te pawn min rawn hlutpui hle a, kan lawmman sem tur thleng te khan min rawn tum sak vek mai a, a ropui ka ti hle. Icon buatsaih tur puala kan tawngtaina Pathianin min chhang tih loh rual a ni lo a, mimal takin ka lawm tak zet a ni, tiin ka thudawnna hian a tuihnih bawk a. Ka han ngaihtuahpui a, kan ram dinhmunah inrelbawl dan a harsat teh reng nen hetianga rinngamna kaltlanga function lian tham tak mai hmanga TCYF hruaituten rawngbawlna ropui tak an nei thei thin hi ka fakin, a ropui pawh ka ti a ni.

A sawi zelnaah chuan; Kumin Icon thlanna turah hian pawmlai nei tawh hmeichhia hming pek theih a ni lo, a tel tur te chu kum 15 atanga kum 35 upa chin tan hming pek luh theih a ni a. Tin, intihsiakna atana hla pawh hla 30 lai thlan fel tawh a ni bawk a, a duh apiang tan a cassette leh application form-te pawh “D’ Recording,Tahan ‘A’ Group-ah lei theih tawh a ni, a ti.

— Lawmman pek dan tura an ruahman dan te ka zawt zel a, a hnuaia mi ang hian min chhang. Hetiang hian:-
- Icon : Ks.150,000/-
- First runner-up : Ks.100,000/-
- Second runner-up : Ks. 50,000/-
- Hei bakah sub-title chi hrang hrangah lawmman tih tham zet a hlan lehdawn a ni.

##2009 TCYF Icon thlanna puala Lawmman kan tarlan ang khian a tumsak theitu mi tlawmngai kan awm anih chuan englaipawhin TCYF hruaitute contact address inhriattir theih reng a ni, tiin 2009 TCYF Icon thlanna neih a nih dawn thu ka hriat dan ang ang ka han thehchhuak a ni.
******************************************************************************

Nikum, 2008 TCYF Icon thlanaa Huivalenthiam (ZOIN) palai Pu Lalhmangaiha leh Nl. Mahlimiten hlutpuina thu an sawi lai thlalak a niin a hnuai lamah groupmail lama report an rawn ziah pawh lung an ti leng em a, kan han tarlang a ni. Eds.

Dear Huiva lenrualte u,
Kumin zet chu a thawm a na ngei mai! Form theh lut mi (93) zet zingah intihsiaknaa tel thei mi (70) chuang lai an nih avangin zan thum tura tih kha zan li a awh ta a ni. Tahan leh a chheh vel bakah Kabaw lam atang pawhin tel an thahnem hle.

In tihsiakna hi endikna chi hrang hrang: Expression & Technique, Performance & Discipline, Pronunciation and Timing-te endik a ni a. Endiktute chu: Pu Hmingliana(Vulmawi) , Pu Zairemthanga leh Pu Rawngbawlliana
te an ni. An endik dan pawh a zahawm hle a ni. November ni 17 khan TCYF Icon 2008 chu kan tiak ta!

Elevation round neih a nih hnuin first round neih a ni a. Chumi zawhah top 20, top 10, top 5 thlengin thlitfim a nih hnuah final result puan a ni a. Top 3-te hian lawman cheng fai bakah trophy an dawng a ni. Top 5 te chu:

1st C.Lallawmpuii (Satawm), Icon
2nd K.C. Lalruatdika (Tahan), 1st runner up
3rd Zomuanpuii (Khampat), 2nd runner up
4th L.C. Sangi (Myohla)
5th Lalnunpuii (Tahan)

Sub-title lawmman chi hrang hrang sem a ni a. Heng mite hnenah hian hlan a ni:
Top People’s Choice - Joseph Lalruatkima, Tahan(Hei hi a hmuna en mipuiin vote kan thlak atang result a ni)
Future Bright - B. Malsawmsanga, Tahan
Inchei thiam (Mipa) – Vanlalchhanchhuahfe la, Tahan
Inchei thiam (Hmeichhia) – Lalnunpuii, Tahan
Zai tunlai ber - Zoramthanga, Kawlkulh
Icon rawn kalna hla ber – Lalbiakmawia, Moekok.
Heng sub-title endiktu hi a hranin an inruat a.

Trophy dawng Top 3-te hi an khua theuh vah an thlah a, Khampat lamah pawh anva kal hlawm a, Top 10 dangte pawh’n an tawiawm zel a. Kumin Icon meuh chu tawiawmtu an awm ta nuk mai! Host zawhna mawi tak leh mipuite tihlim em em tu, Top People’s choice lawmman dawngtu Tv. Joseph Lalruatkima tawngkam i han tarlang zuai teh ang. Top 3 te chu interview a hranpaa neih a ni a, kan neih hmasak berah kan la tarlang dawn nia.

Host: Tunlai thalaiten inkhawm leh lenkhawm kan intlahdah chhan han sawi teh?
Josepha : 1. Tlawmngaihna kan ngei nep sawt 2. Kan taima lo 3. Korea film kan en vang.

Tin, top 20 zinga Pinkhung tlangval J.M.Davida’n sam sei a dah avangin zawhna an zawt na sa a, a tawp bera a chhanna mipui lawm em em chu, “Sam sei te hi an fel phian ve tho a nia aw..” tih hi a ni. Tahan Christian Youth Fellowship hawihawt gospel hla hmanga Icon an buatsaihah hian Huivalenthiam ( Zoin) kan tel ve a, kan hotute rawn sawi ang hian… Tin, a hmunah khual lian nihna Pu Lalhmangaiha nen kan chang ve a. Kan Chairman Pu Zawma lehkhathawn mipui hmaah a chhiar a. Nikum lam atanga mipui lo hmelhriat Zoin chu hrechiang duh ten zawhna min zawh fo leh mipui hmaa Huivalenthiam (Zoin) rawngbawlna leh hmalakna sawi turin min phut avangin rei lo te thu ka sawi chhunzawm a. “Insuihkhawm zai i rel ang” tih Icon hlapui, Pu Rawngbawlliana’ n nalh taka a phuah leh Huivalenthiam (Zoin) thupui “Zofate insuihkhawm zai i rel ang u” tih hmangin mipuite chona thu tlem kan zep tel bawk. “khua leh kohhran, ram indaidanna bang pelin Zoin chuan keini hnenah insuihkhawmna thu an rawn keng a. Kan memberte hi mi rama inhlawh chawp te te an ni a. An thingpui in aia kan ram leh kan hnam tan an rawn thawh hlawm a…….Lungrual taka kan insuihkhawman rah a ni….He Iconin a a huap zawng zawngte hnenah Insuihkhawm zai i rel ang u an rawn ti a. Keini pawh’n Icon buatsaihna atanga chhuak sawi neuh neuh te, kohhran leh khua tia ram ri kham runtu kha sawi thatin ‘insuihkhawm zai i rel ang u’ ……. Hawh u!! insuihkhawm zai hi i rel tak tak teh ang u..He Icon hian thawmmawi tak rawn richhuak mawlh rawh se………” tiin.

(Aw le..hei a hun takah kan rawn tilang vat hman lo va, pawi kan ti hle. A chhan chu thlalak dah tel kan duh a, Icon hmunah camera kan lo keng lo va, midang lak kan nghak a, a computer filein min pe phal lo va, scan a tul zui….. chung zawng zawng chu kan han ti zet a, Top 10 thlalak kawltu kan la zawng mek a, a theih ve leh kan rawn thawn leh dawn nia.)

Aw le.. tawngkam hi ka tlachham ve khawp a, ka han report thiam ang tawk chuan ka han ti ve e.

Hlim takin leng ula..

Mahlimipuii,
Tahan.
Huivalenthiam: Dated: Saturday, November 29, 2008 7:24 AM