CWI: Irrawaddy delta a chhanhimna pawl chuan tanpuina— ei-leh-in tur tlem an dawn thu an sawi a. Marawhchu, Emergency tanpuina dang a lo thlen thuai loh erawh chuan mihring sangtel nunna hi chhanhim anih dawn loh thu an sawi. Thuneitu Sipai hian Internatioanl atanga tanpuina lo kal tur hi an thlahlel em em nachungin tanpuina rawn sem tura inpuahchah ho erawh ram chhung luhphalna an la pe lo a ni.
Thilchhia(Cyclone)-in a tleh chhiatna ber Irrawaddy division ah tanpuina thahnem tak a thleng lo anih chuan ruahthamloh khawpin chhiatna a thleng zui ngei dawn tih chu International Rescue Committee-a thawk Greg Beck-a’n a sawi a. He thlichhia nghawng atanga invenna nasat taka kan thawk lo a nih chuan natna hrang hrang, kawthalo, tuihri, santen, etc. chhuak thei a ni a. Tin, hetiang natna hi kar lova awlsam taka inkaichhawn theih a nih avangin Internationala Aid Agency chuan mihring 1.5 million aia tamin nunna an chan phah thei a ni, an ti.
Cyclone Nargis avanga nunna chan 23,350 leh mitthi ruang la hmuh theih loh 37,019 an ni, tia sipai sorkarin a puan laiin US ram palai, Yangon khawpuia awm ho chuan mihring 100,000 chuan nunna hlauh anih an rinthu an sawi. Sipai sokar hian vanduaina tawk chhunglehkuate hi ei-lehin, damdawi lam, mutbu leh chakkhai dang dang pein an tanpui ang tih hi rinngam chiah ni lo mah nise, UN chuan Buram ram tana tanpui tur hian khawvel ram hrang hrang hnenah tanpuina US$187 Million pe turin a ngen sak a. World Food Programme chuan vawin (Sunday)-a an sawi dan chuan tanpuina thehkhat ho chu Labutta ah Truck Motor nen an phurh tawh thu an sawi. Australia ramin vawin (11.05.08)-ah Burma thlichhe tuar ho tanpuina atan A$ 25 Million ( $ 23.4 million) a puih dawn thu a sawi a ni.
Vawin thleng hian UK, chuan $ 10 million, Norway in $ 2 million, Canada in $ 2 million dawn dawn, US in $ 3 million, Indonesia in $ 1 million, Spain in WFP hnen ah $ 775,000, Germany chuan anmahni ram Aid Organization hnenah tanpuina tur $ 775,000 an pe a, China pawhin chengfaiin $ 500,000 bakah chenna tur bukte khawhna, blanket leh ei-leh-in tur a phurh sak a ni. Tin, New Zealand ramin $ 394,000 zet chu UN kaltlangin a pui a ni. France ram pawhin $ 320,000. Greece in $ 300,000 leh thlawhtheihna phur khat zetin a tanpui a. Japan ramin Emergency Aid $ 267,570 UN kaltangin Aid Supply dang dang nen a tanpui a.
Tin, Singapore pawhin $ 200,000 Humanitarian Aid hnenah a pe bawk a. Thailand pawhin $ 100,000 chu Burma sipai hnenah direct-in an pek bakah ei-leh-in tur leh damdawi inenkawlna tur thlawhtheihna nen a phurh sak mek a ni. S. Korea ram hian $ 2.1 million man zet innghahna tur thlam, damdawi lam, water purifying chemicals nen tanpuina a pe a, Chengfaiin an pe lo thung a ni. Czech Republic hian a tirah $ 165,000-a an tanpui hnuah $ 165,000 bawkin tanpuina an pekbelh leh a ni. Sri Lanka hian $ 25,000 Burma sipai kutah direct in an pe bawk. Sweden ramin Generator leh thildang emergency equipment an pe. India in ei-lehin, inbawkna tur thlam, blanket, thuamhnaw leh damdawi inenkawlna tur Lawngpui 2 khatthah chu Yangon ah an thawn tawh a ni. May, 14, Nilaini hian thlawhtheihnain ei-leh-in tur dan a phurh sak belh dawn a ni. A chunga kan tarlan sum-leh-pai nena tanpuina tur khi UN kaltlanga an pek te a ni.
WFP hian vawin thleng hian thlawhtheihna 7 khat tanpuina an phurh sak tawh a. A tum 8 na atan pawh vawin hian Yangon ah an phurh sak leh dawn a ni.
Hetianga a ram mipuiten vanduaina nasatak a tawrh lai hian Burma sipai sarkar chuan thuneihna an chan zel theihna turin dan bulpui thar an duan chhinna chu niminah mipui nenngheh tir tura vote thlakna chu an tan mek a. Sorkar TV ah Than Shwe-a leh a nupi chuan dan bulpui thar an duanna chungchanga vote an thlak lai leh, sipai hotu dang hovin Cyclone tuartute UN atanga tanpuina chu an mahni hming chuan tiring tawnpuina an sem lai leh thlavang hauhna chu TV ah chhuahin an lan tir awn awn a nih chu.
US Military Transport Aircraft pakhat chuan vawinah tanpuina tur phurin Burmaah a thlawh luhtheih a inbeisei a. Tin, US sorkar chuan Lockheed C-130 Hercules tum theihna atana permission an hmuh tawh thu a sawi bawk a, nak tukah pawh thlawhtheihna 2 a thlah lehtur thu pawh a sawi.
