Read More @ Tahan Times Vol.1 No.24. PDF
Tahan Times hian kum khat hmel a hmu chu a ni ve ta mai a. Editorial pawh hi kan ziak ve ta nual a, mahse chhiartute hnenah Tahan Times kalhmang leh kan rilru put dan te tlang taka sawina kan lo la nei miah lo va. Chhiartute nen kan inpawhtlan lehzual zawk theih nan, thian 
thenkhatte min zawh thin zawhna tlem chu hetah hian chhang pahin sawi duh dangte pawh han zep tel nghal ila a tha awm e.
A hmasa berin Tahan Times hian sum leh pai zawngin hlep kan la nei miah lo tih hi han hre ve phawt teh u.Hlep a hnekin sen belh kan la nei reng zawk a. Amaherawhchu, chumi avang chuan zam kan tum lo va, ‘hlep um lovin duhsaknain’ tih kual vel pawh kan tum hek lo. A nihna takah chuan kan tuina zawng kan ti a nihna piahah sumdawng kan ni a, hlawkna tel te chu kan chak ve chiang alawm. Mahse, tunah hi chuan kan ziaawm ve tawh e, kan han ti thei ve ta deuh na a, kan dam-khaw-chhuak tawk tawk rih chu a la ni ber mai. Tawp erawh chu kan tum lo nasa mai a, kan la kal zel dawn.
Thian thenkhatin fakna (ads) a va tel tam thei deuh em, tia min zawh thin erawh chu tuna kan sawi khan a chhang fel thei mai ang a, kan dam-khaw-chhuah nan fakna hi kan rin rawlah kan neih lo thei lo a ni. Chu chu min han hriatpui phawt ula. Hnam dang tawng leh hnam dang hming kan ziah dan chungchang tlem han sawi leh ila. A hmasain, hnam dang hming ziah danah hian kei-mahni pawh kan rual thin lo. Hnam dang hming hnungah -i leh -a belh chang leh belh loh chang kan nei a, kan thuziak a rualkhai vak thin lo.
Tunah chuan inremna kan siam tawh a, hnam dang hming hmawr reng rengah, anmahni ngeiin -i leh -a an belh sa te a nih ngawt loh bakah a tul hle a nih loh chuan kan belh tawh lo vang kan ti. A tih pawh kan han ti chhin a, keini chuan kan thu a mam ta zawkin kan hria. Nang engnge i ngaih ve dan le?
Sap tawng thumal tin pawh hi lehlin luih kan tum lem lo. Kawl hian sap thumal tin hi an tawnga neih kim ve vek an tum a, hlawhtlin pawh an hlawh-tling thawkhat. Mahse, thumal an neih kim a lamah sap thumal tlanglawn pangngai tak pawh hi lehkhathiam ho zingah pawh, mi nawlpuiin an hriat loh phah ve tlat. Chuvangin, a sap thumal, a nihna ang anga kan hriat mai atana tha tur zawka kan ngaih te chu kan dah tawp mai.
Thangthar zawkte’n awlsam leh hriat loh hlana thumal an lo khawl khawm theih nan pawh a tha zawk ang kan ti. Kawl tawng erawh chu hman loh hram kan tum. A chhan chu, mizo hi khawvel hmun hrang hrangah kan awm a, kan vaiin kawl tawng kan hre vek tlat lo a ni.
Pakhat leh. Kan news te hi a tharhlam ber ber an nih loh chungchangah duhsaktuten tan la turin min hrilh fo thin. Nitin chanchinbu chhiar thinte tan chuan kan news te hi chanchinthar ni lovin chanchin hlui an ni hman thin tih kan hria. Tahan Times hi thla khata vawi hnih chhuak, kar hnih dana in chhiar chauh thin a nih avangin news lamah chuan kan hnufual lo thei lo. Kar hnih chhunga thil thleng zinga pawimawh zual deuhva kan hriatte chu uluk takin kan thlang ve thung a, chanchin khaikhawmna anga min ngaih sak a ngai a ni e. Tahan Times hi nitin chanchinbu a ni lo va, journal a ni zawk tih hi hre nawn leh fo ila, nitin chanchinbu chhuak a awm hunah chanchin tharlam leh bengverh chhiar tur kan la nei ngei ang.
Tin, chanchin kan lak khawm fel vek hnu-ah a rem khawm, chumi zawhah Mandalay-ah chhuttir tura thawn thlak a ni leh a. Hei hian ni thum chu a awh leh ngei ngei. Hengte pawh hi chanchin a tharlam theih lohna chhan pakhat a ni tih min hriatpui kan duh. Hetia a chhuah nghal mai theih loh avang hian chanchin tam tak hi chu kan hlawi ta law law thin a ni.
Tahan Times hian a chhiartute tana chanchin tangkai tur lam a theih chen chen kan ngaihven reng a. Kan huam zau si a, chanchin lawr kim thiam a awl lo hle a, mahse thawktute hian theih tawp chhuah zel kan tum.Tahan Times a kal tluan zel theih nan chhiartute pawhin a man pek chungchangah kan agent-te theih tawp chhuaha in lo puih ve kan beisei bawk a ni. Thurawn tha tak tak min petute lakah kan lawm khawp mai.
a lawm awm tawp,mahni tawnga chan chin chhiar tur kan nei hi a tha tawp,