SuahBuah

By: Zalianthanga, Tahan
He tawngkam hi Mizo tawng-lerh (slang) chi khat zinga mi a ni a. A awmzia erawh chu sawifiah dawt theih a ni lo, a hnam a zau va, zalen taka hman theih a ni mah zawk. A lam dan thuah chua ‘Ar ek’ tia lam angin he ‘suahbuah’ hi lam tur a ni. He tawngkam hi thianpa Biaktluanga’n Zotlang (Champhai) khua atanga a rawn pai haw a ni a, tha riau a ka hriat avangin a hman dan thu hlaah chi hrang hrangin kan han suahbuah ve dawn a ni. Fuh tak maw!

Ni-khua-lo
I ni khua lo em mai! tia hman theih a ni. Mipa ni ve lem sia perek pakhat pawh chhu tlum thei lo, chhu per nawlh nawlh ang chi hi ‘I suahbuah em mai!’ tia hman theih a ni. Thil eng emaw han tih tir a ‘zei lo, ti pelh pheng phung’ hi ‘suahbuah’ ti mai la, an lo hua a nih pawhin vawi 3 chal pen bak i tawk lo vang.

Thuruk thilah
In thianzain emaw tute ho nen emaw thil in lo tiho ta a, sawi dawn a ngaithlatute hriat chian hlau si ang hi ‘kha mi tuma kan suahbuah vel kha’ chu nuam sing-khaw tihte pawhin i pehhel thei bawk. Thiante ho nen thil tih tur, chaw-ei-khawm, party chi hrang hrangah ‘I suahbuah ve dawn em?’ ti mai rawh. A pawi teh chai lo a nia. Hman zanah i Chhass nen ‘in lo suahbuah’ a nih paw’n zep tlat mai teh le.

Awi karei, Bawihlir
Kum kal taah khan thianza intihhlim tumah zasawm kan inchuh a, tuna a ziaktu leh Masanga an tang a, Bawihlira leh Tekawnga an tang a nih chu. Bawihlira chuan zasawm belh lohna turah a lo belh palh a nih phiangsen a ni awm e, Tekawnga pawiti lutuk chuan ‘Awi karei! Bawihlir, i va’n suahbuah tak em!’ zu han ti reuh a maw le. Thil pawi lutuk sawi nan ‘Awi karei, Bawihlir’ tih hi zu han hmeh teh phian a maw le.

Tlaw chhiava
Ball pet chhuah thin te, Boarder neitu te, Cycle siam te, Motor var te, khalh thin te, Damdawi in manager te, pathlawi tharhlam te leh pum 3 cheng khat ang rual vel lekte hi thluangkhawm ta ila, an arh duh ngawt ang. Lei atang fit 5 leh inchi 4 vel sangah chauh Oxygen hi awm ta se, an tan chuan kal paha zuan zeuh zeuh bak tih tur hmabak awm dawn hek lo. Han mitthla chhin ta la, an va’n suahbuah dawn tak em!

Zak bontop @gmail.com
Surprise check hlauh vangin Cycle chuang chung pawhin helmet khum tawk lah bo lo. Hasiai ang deuh vut chulh damdawi pawh Hasiai anga hmang sawi tur an awm bawk. Hmeichhe kawr, mipaten an ha sup sup a nih kchuan underpen zar pawlh tan phei chuan an ha sual rem rum ta ve ang le! Pathlawi lungleng-ten Internet an tih fo pawh hi an mawh hran lo ve, nula bula han suahbuah an duh vang lo niin, eng .com vel emaw an han ti vel hi chu to dan chi khat a ni ve chiang alawm. Tih fuh loh phei chuan hnar khawn palha lian tual tual ang hian a ruka chawh ngawih ngawih hi kan chan tawk a ni mai thei. Hui…ha!

Sawngnawi
Hnap tla pura eng lo rui thin te hi an che sawngnawi chhia-va thin a, chu chu suahbuah kan ti thei ang. Pa fel kheuh beuh te pawh hi remote control, control lehtu leh hmun fai laia Kuhva tui chhak sen puat puat ang hrim hian an ngeiawm a ni. Eng emaw thiltih ni khuaa ‘ruat mang hlei lo’ lo intifatu ve chiam ‘ruat loha tawk chauh’ tih ang vel hi kan kat ve ta nuk mai. Mite dinhmun hre chiang uk si lova, tawngpawng ar nghal zuan luh ve rik ngawt hi chu thisen ‘O’ dabawl tan lo chuan ter ngam chi a ni lo vang.

Full stop mai ang
Tawng thar hi a piang zel dawn a, a kum tela hman theih a awm laiin hlamzuih ta te pawh a awm thei ang. A enga pawh ni se, a hman dan tawk kan thiam a ngai ang chu(h). ‘Uih….,Aih…,A chi nang…, I a mi..?’ ang chi pawh hi a hun lova hman vaih erawh chuan half time awm lek lova, kik mawlh mawlh tlak hial asin ni le. Aaaa… suahbuah duh tawh lo mai ang. Nang han suahbuah zawk mai teh le. Awi karei, Bawihlir!!!