SA-UM KA UM VE A

By: LLTA, Canada
Sa-um heh tak chu ka ni ngai lova, ‘marawhchu, sa-um bawl chu ka duh ve thin viau a. Rei deuh tawh atang khan riltam changa ei chak a lo lan apiangin bawngsa rep sa-uma bawl phul hluah mai hi a lang chhen mai a. Chu thu lo chu tiin sa-um um ka rilruk ve ta alawm le.

Sa-um hi ka lo la um ngai lo reng reng a; ka nu’n a um kha ka lo ngaihsak ngai lova, ka vahvaihnaa ka chenna nu berten an um ka lo chik ngai bawk si lo. Ka bangbo ang reng hle a.

Tichuan, tlai khat chu ka hnathawk bang Ina haw mai lovin sa-um bur tur zawngin kan office bula shopping mall lian ve tak chhungah ka vak kual vel ta a. Ka vah vel lai chuan ka pa te hun lai ngaihtuah chuan ka sa-um bur tur zawnna chu awmang lo ang reng hle hian ka hria a. Kan chak dapna hmun a ni ve miau bawk si a. Sa-um bur atana tha tur nei awma ka rin dawr lian tak tak atanga beidawnga ka chhuah hnu chuan an thawmhnaw eng pawh dollar khat chhiarna hmun, Dollar Store-ah ka han lut ve leh hram a. Rin loh takin sa-um bur tur awm tawk vel, palang (darthlalang) bur bial kir ker, chhin phui tha tak, a ka zau mawi tawk tak hi ka hmu fuh ta hlauh mai a. Lung si takin ka hum haw ta a.

Inrinni a lo thlenga, zingah phur takin kan veng chhunga Vietnam-Chinese dawra an vawksa neih thau lai ber chu ka va kawk chawt mai a; a zuartu tlangval te chuan min nuih var var a, ka nuih let ve a. Kan lawm tlang a ni ber awm e. A thau hralh har tur ka leisak avangin a lawm a, sa-um tui taka a chan dawn avangin kei ka phur ve bawk a.

In ka thleng a, ka sa-um bur lei thar chu uluk takin ka sil a, ka dah rova. Tichuan, vawksa chan chu ka tan ta a. “A ti a tel chuan a tteng hma” tih ka hriat ve ran avangin a ti bei tlem pawh ngaimawh takin ka thian fai iar a. Vawk thau hlang chu a lendan inrual mawi takin ka chan sawm a. Tichuan, bel fai takah ka chhum ta a. “Tui a tel chuan a phak hma” tih ka hriat bawk avangin a tui kang vekin, a hriak chhuak tur khawpin ka chhum ta a.

A dai ta maw tihah, a ro hnuah pawh paper towel nena nawh that leh ka bur lei thar fai takah chuan ka vawksa chhum hmin chu dim te tein ka thun a. A chhin phui takin ka chhin a, kan electric thuk chungah chuan ka hung ta ran mai a. Chhun lai a lo ni a, vah chhuah tulna a awm ta a. Mihring awm lova electric thuk han “on” reng lah chu ngaih a tha bawk si lova. Ka sa-um bur chu veranda ni dawng chinah ka va phova, ngaihngam takin ka kalsan ta a.

Ka’n haw, In ka luh veleh ka sa-um bur pho chu ka va pan nghal a. Pawn ni lum dawng tura ka tih kha a lo khal vek mai a. September thla nawi lam a ni a, kan ni hmuh chu sa-um tan a lum tawk tawh lo a ni tih ka hrechhuak a. Tichuan, ka sa-um bur chu kan electric thuk hlumtu ber a ni ta a; kan inkan zing teh asin. Nupui te hi hetiang hian ngaihsak ila, innghirnghona a bo duak awm mang e, te ka ti rilru a.

Ina ka awm nanana chuan atan thuk ka tinung a, a lumdan a duh tawk tur awma ka rin chinah ka hung a. Ka her kual chhen bawk a. Ni thum nia tho ve zing ami a ni tih ka hriat avanging bur chhunga a awm hmasak ber thum 3 hi ka ngaih pawimawhsak em em a. A tan ka hun leh ka remhriatna ka hmang nasa teh asin!

Tichuan, ni 3 chu a kim ta a. Tlai lamah kaihthawh tumin ka intimtuah zuak zuak a. Mahse, mei lum dawng lova a awma a lo khal zeuh zeuh chang te ka han chhutsak a, la tho thei deuh dawnin ka hre ta lova. Chuvangin, ni 3 nia tho thin mah ni se, ni khat chu han boksik leh thain ka hre ta a.

A ni 4-na tlaiah chuan sa-um tho hlim nena bawngsa rep bawl tum takin in ka haw a. Ka inthlak sawk sawk a, ka sa-um bur chu ka va pan a. Dimdawi takin ka han la a, dim te tein a chhin chu ka’n herh hawng ta a.

A chhin hawn ruala sa-um tho hlim rim tui takin hnar rawn barh hak tura ka ngaih kha eng rim mah ka hre ta lo. Ka han hnim hnaih deuh paw’n eng rim mah ka hre ta chuang lo. A bur ka han sawi kual a, a ka leh ka hnar insi deuh thawa ka’n hnim takah chuan vawk hriak hing chhe lam rim hi ka hre ta a.

Ka lo beisei nen a inhmu lo lutuk, a bur chawpa paih mai ka’n tum uai uaia; ni khat han boksik leh ila emaw ni dawn aw, ka ti leh a. Ka han chhin tha leh ren rawn a. Thuk chunga ka sa-um bur chu ngawi renga rei fe ka thlir hnuin paih mai tha zawkin ka hre ta a. A um erawh ka dah tha leh hram a.

Vawiin thleng hian ka la ti chhin leh ta rih lo. Hlawhchham leh ka hlau nge, kan hnam ziaa thil pawimawh ve taka kan ngaih sa-um pawh um thiam lo ka nih ka inhrechhuaka ka zak nge, pawh ka hrethiam ta chiah lo.