ROKUNGA ZAN HMANG

ZOIN: Indianapolis, USA a Zofaten ROKUNGA ZAN urhsun taka  an hman thu dawn a ni a. An hun hman dan tlangpui chu a hnuaia tarlan ang hian a ni e. Hetianga chawimawi phute tana hun an hmang thei hi, a ropui tak zet a ni. Ed.

July ni 15, 2012 zan dar 8-11khan Rokunga thih champha (July 12) denchhanin, Indiana (USA) Rokunga Zan Huaihawtute bultumin Chin Center, Indianapolis-ah Rokunga Zan urhsun taka hmana ni a, a tuimi mi 40 vel an kal khawm.

Rokunga Zan hi Pu Hualsailova’n a kaihruai a, Rokunga Zan buatsaih chungchang leh Rokunga chawimawi chungchang thukhawchang a sawi. Pu R. Lalchungnunga’n tingtang tumin hla a hruai a, Rokunga hla hmangin an inpawlho a, an hlim tlang hle. Pathianhnenah Rokunga Zan hlanin Dr. Muansanga a tawngtai a, Zofate tana Rokunga min pek avangin lawmthu a sawi.

Pu Zonunmawia Thlaute hnen atangin ‘Hnam nunphung leh ziarang humhalha hmalak a pawimawh thu’ ngaihthlak a ni. Tamil-ho leh Japanese-ho USA rama an pem luh dan, an nunphung leh ziarang humhalh tuma tan an lo lak nasat dan leh chuti chung pawha chhuan hnihna vela thangtharten an tawng leh nunphung an hloh tho thu sawiin, USA-a Mizote inhumhalh zel dan turah ngaihtuahna tam tak a neih tir.

Mizo Society of America, Indiana Brn. President Dr. Rodinga thukhawchang ngaihthlak a ni a. Rokunga a ngaihsan awmzia, Mizona tih vul zel kawnga Rokunga hlate pawimawhzia, Rokunga hi chawimawi tlak a nihzia leh chawimawi phute chawimawi kawnga tan lak zel a tulzia a sawi. Pu Vanlal Pekthara’n huaihawtute buatsaih—Rokunga chanchin tawi a chhiar chhuak. Rokunga chu rethei tak chungatumruh leh tuarchhel taka zirna run bel tang tang mi a nihna, mi ngilnei tak a nihna leh hla phuahtu nungchang tha a nihna te tarlangin, a hla mai ni lo – a nun hrim hrim pawh a ngaihsan awmzia leh entawn tlakzia sawiin a tawp a khar.

Tin, Tv. Lalchhanhima’n ‘Rokunga hla-in Mizo khawvel a nghawng dan’ chanchin ngaihnawm takin a sawi a. “Rokunga hi Mizozinga hla phuah thiam ber leh hla phuah tam ber a ni hauh lo. Mahse Mizo hnamchawimawitu, Mizo hnam englai maha hmuhsit leh dahhniam phal ngai lotu, hundanglam zel karah pawh Mizo nih hlutna leh chhuanawmna vawngnung reng turathuchah nung kengtu ropui Rokunga hminga he ZAN buatsaih a lo ni hi a ropui a, chutiang buatsaih duh leh hlutduhna thinglung pu mi heti zat kan awm hi a ropuia ni” tih thuhma sawiin, Rokunga hlain khawvelin hmun hrang hranga Mizote a nghawng zel dan a chhuipui.

“Kum 1944 khan Rokunga chuan Zofate chenna tlangram chu hnam mawl chapo ringawtho awmkhawmna mai ni lo a, hnam dangte khuma hmasawnna-in a tuam vel Zoram nuam ni turin ‘Raltiang I Kai Ve Ang’ tih hla hmangin, beiseina zawng zawng nen, ban pha chiah lo chungin a lo au lawm lawm a. Vawiinah hian keini America Mizote hi khawvel leilung inrelbawl dan atanga thlira raltiang ram, khawvel ram hmasawn ber anga sawi thin ramah ngei kan cheng a. Chutih rual chuan kum 65 liam taa Rokunga lo thlir ‘Raltiang Ram’ chu kan kai tawh chiah em? tih i ngaihtuah nawn ang u.

Hawh u, Mizote hi Mizo takin, lungrualna, rinawmna, dikna, huaisenna leh tlawmngaihna nen hmasawnna lam pan zel ila, he ramah ngei hian Zoram Thar dinin Chhawlpial Run rem ila, Rokunga Raltiang ram chu kan nunah i thlentir ang u.” tih thuchah leh chona hmangin, Tv. Lalchhanhima (Zotuithianga) chuan a thusawi a titawp.

Pu Vanlalrawna’n ‘Mizo Thu leh Hla humhalha tichangtlung pawl neih a pawimawhna leh hmalakna thenkhat’ sawiin Mizo Thu leh Hla humhalh pawl din rawtna siamin, kal khawm mipuite hnen atangin ngaihdan a la khawm. Kal khawm mipuiten an phurpui hle.

Tv. Noel Lalthangliana’n Mizo Hlakungpui Mual chanchin tawi sawiin; Mizo Hlakungpui Mual tan kal khawmten mahni remchan ang tawk te te sumpai an thawh khawm. Tin, kal khawm mipuite hnen atanga duhduh sawi hun zalen hawn a ni a, Tv. Noel Liantea leh Pu Vana Chawnghlut te dingchhuakin Mizo Hnam humhalh kawnga an hmuh dan an sawi.

Tv. C. Thangributa hnen atangin lawmthusawina ngaihthlak a ni a, Rev. Lalthuamluaia malsawmna-in Rokunga Zan chu tihtawp a ni.

ps:  Rokunga Zanah hian huaihawttute buatsaih; Rokunga chanchin tawi ziahna lehkhaphek sem a ni a, Rokunga hla hmuh theih ang ang leh hnam hla thenkhat dah khawmna audio CD, Car-a play tur sem a ni.