Rahtea

Hmanlai hian fahrah khawngaihthlak tak mai Rahtea hi a awm a. Nu-hrawn a hrawn a, a nuhrawn chuan a tirethei em em thin a. Chaw puar khawp pawn a ei ve a phal ngai lova, a ei atan favai leh chaw chawh pawlh hlir a pe thin a. A ei chhiat em avangin Rahtea chu a cher em em reng a, ruh kal thei hi a ni ngawt a.

A nuhrawn chuan silhfen tha pawh a pe phal ngai lova, thawmhnaw tet leh hlui, chhe em em chauh a silhin a fentir thin a. Khawvawt hnuaiahte hian a intuam lumna tur thawnhnawm tha pawh a neih loh avangin hrehawm a ti thei hle thin a. Ni lo chhuah hunte hi a nghakhlel em em thin a, atan chuan a kawrlum neih chhun a ni ngawt a. Meilum ai ve a tumte hian a nu chuan ai ve a phalsak ngai lo.

A nuhrawn chuan hna hahthlak tak tak hlir a thawhtir thin a, a hah deuh changa chawlh ve a tumte hian a chawlh ve pawh a phalsak ngai lova. A nuhrawnin a hau ang tih hlau tak chunga hna a thawk chung pawhin a hau hrep hrep reng a, a vaw deuh reng bawk a. A nuhrawn bulah chuan awm pawh a awm tha ngam ngai lova, a hau ang tih hlau reng rengin a awm a, a khur ru zawih zawih reng thin a ni.

Thian kawm vete pawh hi a phal lova, a thiante zinga a awmte hi rang takin a ko haw a, eng khaw sawi set set lovin a vaw leh chiam mai thin a. A nuhrawn chuan Rahtea chu a huat em avangin tihhlum daih a duh a, tihhlum dan tur mawlh mai chu a ngaihtuah thin a. Vawikhat chu tihhlum dan tur chu a ngaihtuah chhuak ta a. A pum a tina der ta chiam a, a lo dam leh theihna turin Arte, Vawkte, Uitein nasa takin an thawi chiam a, engmah a ang thei chuang lova.

Inthawi nana ran zawng zawng an talh zawh hnuah pawh a pum na chu a dam thei ta chuang lova. Rahtea pa henah chuan a lo tum lawk ang ngeiin, “ Ran dang pawn min thawi leh thin mah ula ka dam thei chuang lovang, ka dam hi I duh tak meuh a nih chuan Rahtea hian min thawi ula, ka dam ngei ang” a ti ta a. Rahtea chuan a nuhrawn thusawi chu a lo hre ru kiauva, a hlau ta em em a, ramhnuaiah a tlanbo ta daih a.

Rahtea pa chuan a nupuiin, ‘ Rahtea’in min thawi ula ka dam ang” a tih avang chuan a inngaihtuah nasa hle mai a. Mihring a inthawi chu dikin a hre meuh lova, a nupui chu a hlau bawk si a, a tawp a tawpah chuan rem a ti ve ta a. Rahtea chuan inthawi chu an tum ta a. Rahtea chu an han zawng a, an hmu ta mai lo va, a tlanho tih an han hriat chuan pawi an ti hle a. Rahtea chu engtin nge ka koh haw theih ang aw…. tiin an ngaihtuah nasa ta mai a, a tawpah chuan, “ khuang kan chawi dawn ti ila a lo haw duh mai ang” an ti a.

Rahtea ko haw tur chuan Rahtea u chu an tir ta a, Rahtea chu Thingsiri kungah a lawn a, a par zu chu a lo tlan melh melh a. A u chuan-
“Rahte, Rahte, lo hanwg rawh,
I nu’n khuang a chawi dawn e;
I pa’n sial a chhun dawn e,
Rahte, Rahte lo hawng rawh” a va ti a.
Rahtea chuan hla bawkin a lo chhanglet ve a.-
“Ka u, ka u, kir leh tawh,
Ka thin ka lung in ei aichuan;
Thingsiri par ka tlan e,
Ka puar e, ka fan e.” a lo ti a,
a haw duh ta lova. A u chu beidawng takin a haw ta a. A nu leh pa hnenah chuan “ ka koh pawhin a lo hawng duh lo.” a ti a. Rahtea’n a chhan dan zawng zawng chu a sawi vek a. A nuhrawn chuan a pi a tir ve leh a, ‘nangin va ko tawh, I koh chuan a lo haw duh ngei ang,” a ti a. A pi chu Rahtea koh tur chuan a kal veleh ta a. Rahtea u-in a koh angin a va ko ve leh ta a. Rahtea chuan-
“ Ka pi, ka pi, kir leh tawh,
Ka thin ka lung inei ai chuan;
Thingsiri par ka tlan e,
Ka puar e, ka fan e.”
tiin a lo chhang leh a, a haw duh ta chuang lova. Beidawng takin a pi pawh chu a hawng ve leh ta a. Rahtea’n tan a khawh tlat dan chu a sawi a. Rahtea nuhrawn chuan a pasal chu, ‘nangin va ko ve tawh, I thu zawng a awih ngei ang, a lo haw mai ang” a ti leh ta a. Rahtea pa chuan a va ko ve ta a, Rahtea u leh a pi te’n an koh ang bawk khan-
“Rahte, Rahte, lo hawng rawh,
I nu’n khuang a chawi dawn e;
I pa’n sial a chhun dawn e,
Rahte, Rahte lo hawng rawh”
a va ti ve leh a. Rahtea chuan hla bawkin a pa chu a lo chhang ve leh a-
“ Ka pa, ka pa, kir leh tawh,
Ka thin ka lung in ei ai chuan;
Thingsiri par ka tlan e,
Ka puar e, ka fan e.” tiin

Rahtea pa pawh chu beidawng takin a haw ve leh ta a. A nupui chuan thinrim takin a lo an khum a. “Khawnge keiman ka va ko a nge” a ti a. Rahtea ko tur chuan a kal ve leh ta a. Rahtea awmna hmun a va thlen chuan-
“Rahte, Rahte, lo hawng rawh,
I nu’n khuang a chawi dawn e;
I pa’n sial a chhun dawn e,
Rahte, Rahte lo hawng rawh”
A han ti ve a. mahse Rahtea chu a haw duh chuang lova. Ti hian a chhang a-
“Ka nu, mi ngai ma’nang che,
Keiin ka ngai ma’nang che-reng” a ti a

Therengah a chang a, a thlawkbo ta daih a. Tun thleng hian thereng chu thil ei lovin a zai puar ta thin a ni, an ti a lawm.