Pu Lian Hala (1927-2008), Vuina Program leh A Chanchin Tawi!!

By: Pi Cherry, Tahan
Ka naupan deuh vang pawh a ni ang, ka nu ten an sawi thin avanga a hming chauh ka hriat leh a chanchin ka lo hriatchian ngai loh Pu Lian Hala (Vulmawi Pu Buta pa) hi hetia min herliam san ni, a ruang vuina hunserh inkhawm ka kal atang chiah hian Zofate tana a hlutzia te ka hrechiang ve chauh a. Hunserh inkhawm kan hman lai te chuan ka rilruah khawvel hmun hrang hranga khawsa Zofaten a chanchin tlangpui hi hre ve ngei se tihna te ka nei hial a. Vuina hunserh inkhawm ban hnuah in pawh haw tlang nghal lovin, TSO cyber cafe ah ka lut a.

Vuina Hunserh programa a inziak ang angin ka rawn type chhawng a ni. Type sual palh a awm chuan keima mawh a ni ang a, ngaihdamna ka dil nghal bawk a ni.

A chanchin kan chhiar hmain tlem han zeh tel duh ka nei. Vawin tluk a, Mitthi vui ropui leh dangdai ka la hmu ngai lo. Thlahtu mipui tam zia te chu sawi ngaiah dah lo ila. Kum upa lam, pi tar leh putarten, Hlado an chham rual laia Selbung dar a han ri bu vawng vawng han hriat te leh Mizo puan dum sina an han lam mup mup mai chu a ropuiin a hmuhnawm a, hetiang anga mitthi vuina ropui hi ka hmu lehtawh kher a ngem aw te ka ti hial a sin tiin sawi tur dang la tam hle mah ni se, a chanchin lamah i pakai ang u.

Vuina inkhawm Program
PU LIAN HALA, Hualngo, Kum 81
Chairman: Rev. Dolianhranga
Sermon: Rev.Dr. Rohmingliana
Thih ni: March 3, 2008, Thawhtanni zing dar 8:00
Vui hun: March 4, 2008, Thawhlehni chhun dar 2:00

Nb:1. Thlana kan kalpui hmain Selbung dar nena thlah a ni ang.
2. Thlanmualah hunserh tawi hman a ni ang.

Inkhawm PROGRAM
1. Chairman : Bible chhiar
2. Hun hlan tawngtai: Rev. Zakiauva
3. Mipui Hla : Mi thianghlimte lenna khawpui chu
4. A chanchin: 1) Pu Lailiana (2) Pastor Sapthangi (3) Pu
Lalhmingthanga (4) Evan.Runrosiama
5. Kohhran lama a chanchin : Pu Kapthuama
6. H.L.C.A. President thu sawina : Pu Lalbiakthanga
7. Lusun chhungte tana tawngtaisakna : Rev. Lianchia
8. Mipui Hla : Lalpa’n a hmangaihte ram a buatsaih chu
9. Sermon: Rev. Dr. Rohmingliana
10. In neitute lama thu sawina : (1) Pu Lalhlunngura (2) Pi
Lalthanchhungi
11. Mipui Hla : Van hmun ropui hmangaih ram khi
12. Malsawm tinna: Rev. Rozama

A CHANCHIN TAWI
A Pian leh murna
Chawnghoih khaw Lal, Pu Khuangthiauva leh Pi Zahnuni (Pu
Khuangliankhama ni) te fa pahnihna a ni. A pu Lianvela khaw sah
Chawnghoihah kum 1927 July ni 15-ah a piang. A pianpuite chu:

1. Pu Suilinga (Pi Lalthanchhungi pa)
2. Pu Lianhala
3. Pi Sangkungi (fam)
4. Pu Lailiana
5. Pi Tiallami (fam)
6. Pu Lalhmingthanga te an ni.

Kum 1944, October thlaah Pu Hrangthanga leh Pi Tuantlingite fanu
Bualtuahkimi nen an innei a, Lalpa’n a pek an fa naute chu:

1. Khawnsesumi w/o Evan Hrangchhunga
2. Lalbuta h/o Lalzuiliani
3. Pastor Sapthangi B.A; M.Min
4. Evan.Runrosiama h/o Malsawmthari
5. C.L.Zingi B.Mis;B.D
6. Lalhlunngura B.A h/o Seiluahziki B.A
7. Chawngkhawmawii (fam)
8. Dinglawmpuii
9. Darrikhuma B.A; B.S.P.A h/o Sangmentiali B.Sc
10. Zardawngliani B.A w/o Lalfela B.A

Tu 20 a nei a, tuchhuan 7 a nei bawk.

A Sulhnute:
Kum 1936 ah Chawnghoih primary school ah lehkha a zir tan a, pawl 3 thleng a zir. Pawl 4 erawh chu Falam ah a zir thung a, pawl 7 thleng a zir zo. Lehkha a zir lai hian thiamthei zinga chhiar tel a ni fo va, scholarship pawh a dawng thin a ni. Kum 1948, November ni 1 atangin Chawnghoih Primary Schoolah Headmaster niin sawrkar hna a thawk. He hna hi Falam Township khaw
hrang hrangah a thawk a. Kum 1979 ah Lente khua atangin a pension.

Zirtir hna a thawh mek lain Falam township Judicial Council Member atana thlantlin a ni a, 1974-1978 thleng term khat a thawk. 1978 ah tuna an awmna Tahan, Sanmyo-ah hian hmun an rawn khuar a, sawrkar hna atanga a pension veleh a rawn awm thla nghal a ni. Kum 1945, February ah a pa-in a thihsan avangin kum naupang te niin lal hna a thawk. Kum 1949-a VC inthlan hmasa berah pawh thlantlin a ni. Lal hna thawk chungin zirtirtu hna chu a thawk kawp bawk. Kum 1954-ah Hualngo ram circle No.1-ah council member a ni. Kum 1956-ah Mandalay-ah zirtirtu trainging a kal avangin lal hna chu a chawlhsan ta a ni.

A pa-in a boralsan hnuah kum naupang tak niin pa ber chan a chang a, a naute a enkawl puitling a ni. Pu Lian Hala hian se 4 a tal a, buh za a ai hman bawk. Sa 30 a kap a, sakhuana inher danglam avangin khung erawh a chawi hman ta lo. Pu Lian Hala hi ziak leh chhiar tui mi a ni a, ama pualin lehkhabu pawh a buatsaih nual a ni. A lehkhabu buatsaihte chu:

1. Zofate thu hla
2. Lian Hala thukhawchang
3. Khuangthiauva leh Thangtinliana chanchin
4. Hualngo chanchin, ( Unpublish)

Ziakmi a nih avangin heng Chawimawinate hi a dawng bawk.
1. H.L.C.A & Muchhip Group-te Chawimawina Certificate leh Lawmman
Ks.100000/-
2. Sanmyo Central Thalaite Chawimawina Certificate

A natna:
Kum 10 kal taah khan thin natna avangin Rangoon-ah a inenkawl a, thaw-hah leh tha nain a tlakbuak chho zel a. Ni 20.2.2008 ni khan a zual deuh thut avangin specialist a pan a, that lam a pan theih loh avangin ni 22.2.2008-ah Kalaymyo Damdawi inah a inenkawl. Dawmkaih ngai leh tuar viauvin a awm lem lo va, mahse, rin loh takin ni 3.3.2008 zing dar 8:00 ah min peihloh san ta thut mai a ni.

Lawmthu:
Kohhran leh tawngtai mite tawngtaisakna kan dawng nasa em em a, an chungah kan lawm hle. Kan dam loh chungchanga min tuamhlawmtute leh min rawn kantute chungah pawh lawmthu kan sawi e. Tualchhung thalai, nu leh pa-te leh khual khuaa unaute min tawiawmna hi ropui kan ti a, kan lawm tak meuh meuh a ni. Mi buaipuitute zawng zawng leh vawiina mi sunpuitute zawng zawng Lalpa’n malsawm che u rawh se.

NB:“Pu Lian Hala hi ZOIN.info website leh huivalenthiamyahoo-groupmail founder zinga tel, Pu Rikhuma, USA pa a ni. Hetianga khawchhak Zofaten thu leh hla lama kan arsi lian kan sun ta thut hi chan ropui kan in ti hle a, kan ui tak zet a ni. ZOIN ah pawh hian a kuthnu(Articles) kan dah ta nualin leh dah belh zel pawh tum a ni. Tin, Khuangchawipa thuama a thlalak khi a lehkhabu siam “Lianhala Thukhawchang” bu hnunglama an tihtel atanga lakchhawn a ni. Eds.