Pathian lama rilru dik put hlawkna

PATHIAN LAMA RILRU DIK PUT HLAWKNA
By Pastor B. Zosangliana, Tahan

Ringtu leh Pathian inzawmna hi zawhna tam takin a khuhlûk fo va, rinhlelhna pawh a inzep tel fo mai. Pathian duh loh zawnga awm lêm lo nia kan inhriat laiin Pathian hremna ni awm tak harsatnate kan tâwk fo va; Pathian pawh ngaihsak lêm lova kan ngaihten Pathian malsawmna an dawng thuah tul lawi si niin kan hre fo bawk. Kan rilrua zawhna tam tak chu dik nia kan hriat danin kan chhâng a; mahse, mi bawrhsâwm mihringte chhânna mai a nih avangin kan tuihalna a reh phah chuang lo.

Pathian hnaih leh amah nena lên dun thlâkhlelhawmzia leh nawmzia hi ringtu tam takin an nun chilh laiin ringtu thenkhat ve thung chuan Pathian hnaiha awm chu chêp taka hriatna leh hrehawmna khura inhnuhluhna angah an ngai ve hlauh bawk. Mahse, Pathian hi atir atanga tun thleng hian, hun lo la awm turah pawh, a mite ngaihsaktu leh an thatna tura kaihruai thintu a nihna hi amah hnaih apiangin an hre chiang mai a ni. Lal Davida chuan Pathian hlata awm boralna a nih thu leh amah hnaiha awm erawh thil tha a nih thu chiang takin a sawi (Sam 73:28).

Pathian ngaihsak zawng nih leh a malsawmna dawn hi mi tinin kan duh theuh va; amaherawh chu, a kawng kan zawh duh si thin lo va, a tâwpah kan beidawng leh mai thin. Pathianin a chakna (a thiltihtheihzia) entir turin mi duh zawng a nei a, 2 Chronicles 16:9-ah, “Ama lama rilru dik tak putute chunga a chakzia tilang turin khawvel zawng zawngah LALPA mit chu a lêng ruai ruai thin a ni,” tih kan hmu. Pathian hmaah keimahni infak chawp a ngai lo va, kan thil tha tihte entir turin amah kan zawn a tul hek lo. Amahin a lama rilru dik tak putute a zawn reng avangin a hmu thuai thin a ni.

A chakzia hmu tura a lama rilru dik tak pu tur chuan engtin nge kan awm ang? Ringtu nun hi vawikhat thiltiha zo mai a ni lo tih kan hre theuh angin, a lama rilru dik tak pu tur chuan engtik lai pawha mahni inthunun a ngai a ni. Tirhkoh Paulan Timothea hnenah, “Pathian ngaihsak turin insawizawi rawh,” a ti a (1 Tim. 4:7). Infiam mite chuan an taksa vawng hrisel tur leh inthazo reng turin a hun takah an insawizawi thin a, an taksa sawizawinaah mi dangin an tihsak thei lo. Chutiang chiah chuan, Pathian ngaihsak turin mi dang tu emaw kan rinchhan thei lo va, keimahni ngei kan thawh chhuah a ngai a ni. Pathian ngaihsak lote chuan Pathian lamah rilru dik an pu thei lo va, Pathian ngaihsak tur chuan thlarau thilah kan insawizawi fo a ngai a ni.

A lama rilru dik tak putute nun ze nghet tak pakhat chu mi dangte nunna kawng kawhhmuh hi a ni. Boralna lak ata mite chhanchhuaktu chu Pathianin a hre reng thin a, “… mi tam tak felnaa hawikirtirtute chu arsi angin kumkhaw tlaitluanin an êng ang,” tia a thutiam kan hmu a ni (Dan. 12:3). Ringtu thenkhat chuan mite felna kawnga hawikirtir chu sawi loh, mi fel takte pawh kan vaw thlu fo va, kan pêt zui bawk a, nasa takin kan sawisa fo a ni. Mi dangte tana nunna thlentu ni lovin, mi dangte nun vaw chautu kan ni zawk hlauh fo. Isuan, “Ka rawngbawltu chu Pain a chawimawi ang,” a ti a (Jn. 12:26). Pathian chawi-mawina tluka hlu chawimawina dang a awm lo.

Abrahama hi Pathian lama rilru dik tak putute zinga entawn tlak tak pakhat a ni a. A fapa duh tak Isaka halral thilhlana hlân tura Pathianin a tih lai khan Abrahama’n Pathian hnenah zawhna eng mah a siam lo. Thuawih takin a fapa chu Pathian hnena hlân turin a hruai chhuak a. “I hlan chuan chutiang, khatiang chuan mal ka sawm ang che emaw, fapa dang duhawm tak ka pe leh ang che emaw,” a ti lo. Abrahama chuan a thiltih avanga a hnena thil tha lo lêt leh tur hre sa lo mah se, Pathiana a innghahna leh engkim rêl feltu a nihna a hriat chian em vangin a hmalam hun thu-ah a buai lo va, a mangang hek lo. Chhinchhiah leh tur pakhat a awm a: hei hi Pathianin Abrahama a fiahna a ni (Gen. 22:1). Abrahama ang hian Pathianin tun lai ringtute pawh hi min fiah fo va, mi tam tak chuan Pathian fiahnaah an pas zo lo va, Pathian ngaihsak an hlawh loh phah thin.

Joba chuan hrehawmna nasa tak a tuar a; mahse, Pathian a mawhchhiat lo. A rinawmnain Pathian a tilâwm em em a, mak takin mal a sawm leh a nih kha. “I thu angin ni rawh se,” tia a thu anga kalte hnenah Pathianin a chakzia a tilang thin.

Ringtu tam tak chu Pathian lakah an beidawng fo. Thil dang vang a ni lo: Pathian lakah rilru dik an put loh vang a ni. Pathian tana thilpek chu a aia tam hmuh lêt leh ngei ngeinaah an ngaih avangin, thinlunga Pathian hmangaihna tak tak tel si lovin, a malsawmna dawn duh vang chauhvin an thil neihte Pathian tan an pe thin. Mahse, an beisei angin malsawmna an dawng leh si lo. Thilpek hi Pathian tihlâwmna hmanraw pawimawh tak pakhat a ni na a, Pathianin kan rilru a en tel zel thin. Hmeithai rethei tak ai khan mi hausate khan Biak Inah thawhlawm an thawh hnem zawk a; mahse, a pe tam apiang chungah Pathian a lâwm lo tih Isuan chiang takin a sawi.

Mahni inchawisan hi Pathian lama rilru dik lo putute nun a ni. Mi thenkhat chuan Pathian chawimawi an hlawh a, hmun sângah te a dah a, tisa thilah pawh malsawmna tam tak a vur a; mahse, thil petu thatna lam an theihnghilh a, an chapopui mai fo. Pathianin mahni indahsângte chu a pawt thla leh nge nge thin.

Pathian lamah rilru dik put hi mi dangte laka rilru dik putna pawh a ni a, a hlawkna hi nun chilh chauhva hriat theih a ni.