Pa nge Patling? Nu nge Nutling?

By: Moses Fanai, Tahan
Thuhma: Minung ni a, hringmi kan ni tawh phawt chuan kan dam hun chhung tawiteah hian pumpelh loh thil pawimawh tak a awm, chu chu ‘Tling’ nihna hi a ni. He article ah hian tu nge Patling/Nutling chu tih, zawhna chhan kan tum ang. A hmasaberah Pa/Nu hi eng nge? Patling/Nutling kan tih hi eng nge ni a? Tih lam kan thai lang ang. A dawtah Tu chu nge Patling/Nutling chu, engtin nge Pa/Nu tling kan nih theih ang tih kan sawi ang a. A tawpah tlangkawmna kan siam ang.

Pa/Nu tih hi Eng nge?
Khawvel a hringchang tawh, a tu-a-pawh a hmei a pa in, pa emaw nu kan ni vek. Mahse Pa in a kawh chu mipa, Nu in a kawh chu hmeichhia nih mai hi a ni. Pa satliah emaw Nu nih satliah hi, Pa emaw Nu kan tih chu a ni. Khuarel dan zawma nupui pasal kan neih atang chuah pawh niloin nulat tlangval lai atang rengin Pa emaw nu kan ni sa a, mawlmang taka Nu emaw Pa nih tawp a kawk. Patling emaw Nutling kan tih chu a nihna tur ang tak a, mahni hna chanpual hlenchhuakmi hi a ni. Pa na zawng patling an ni kher lo, chutiang ang bawkin Nu nazawng nutling an ni kher lo. An tih tur chanpual hlen chhuak a, an hna zo taka an thawh chauhin Patling emaw Nutling kan ti mai.

Eng tin Nge Patling emaw Nutling kan nih theih ang?
Kum lamin thu a sawi a, nupui pasal kan inneih hnu a, fahrin satliah mai hi nutling emaw patling nihna a ni lo. Nupui pasal neih tawh te tan chuan fahrin a liama inneih chhan a awm lo tih mai awl tak a ni. Mahse nupui pasal inneih hnu a rawn kal chu fahrin hi a ni. Kan fate putling nitura kaihruai, zirtir leh chawikan hi a ni nutling patling nihna chu. Fa nikhua lo zet nei ve vang mei hian kan nutlingin kan patling mai lo. Fa te nun kawng dik zawh thei tura chawi puitling hi a ni, kan Patling emaw Nutling nihna tur chu.

Tlangval emaw, nula tan lah awm thawleng tei vel hruk hruk mei hi,  ‘tling’ nihna a ni lo. Nungchang siamthat, nun tluang ngil, zawldawhthei, midang te thatna tur ngaihtuah a, rilru leh tihtak zeta thil ti thin mi, mi tlawngai kan nih chauh hian a ni ‘Tling’ kan nih theih dawn ni. Tunlaina nena hmehrema awm thiam, mahni chanvo hlen chhuak mi kan nih chauh hian a ni, ‘tling’ tura pawm kan nih theih chauh ang.

Patling emaw Nutling nih theih dan chu kan nun dan, chet dan leh kan hna chanpual tling taka hlen chhuah hi a ni mai. Kan tihtur diktak kan hlenchhuah chauh hian a ni ‘Patling emaw Nutling’ chan kan chang thei ang. Tu pawh dik taka ti a, mahni chanpual thataka hlenchhuak mi hi a ni ‘Patling emaw Nutling’ kan tih chu. Kan ‘Tlin’ theihna kawng chu awl tak bumrodeuh a ni, chu chu kan hna hlenchhuah mai a ni.

Tlangkawmna
Mihring hian zah emaw ngaihsak hlawh kan chakin kan duh tlangpui a, mahse ‘tling’ ni tur chuan kan peih lo a ang. Pa emaw Nu satliah vangin ‘Patling emaw Nutling’ a nih theih loh. Engpawhnise mahni phaktawk chanpual hlen thin mi te chauh hi a ni ‘Patling emaw Nutling’ kan tih. Kan ‘Patling / Kan Nutling em aw?’ ngaihtuah chian a tul ta. ‘Tling’ ni thei tur chuan mahni hi a mawhphurtu ber chu kan ni. Eng ang mi pawh ni ila, kan chanvo kan hlenchhuah chauh hian kan ‘Patlingin kan Nutling thei ang’. Nutling/Patling kan ni em?, inbih chiang teh ang u khai.

Thulakna: Zothlifim July-August,2010. (He chanchinbu Zothlifim hi Pingkhung Khawtlang Thalai Pawl chhuah a ni e)