By; Joseph Saia, Qatar
US President thlan fel a nih hma kha chuan John McCain-a leh Barack Obama ten ram chhung ram pawnah engang policy nge an hman dawn tih hriat kan chak tlang hle a, a tlangpui chu hriat tawh a nih avangin thai lang tawh lo mai ila. Obama-an President nihna a chelh thlaruk a lo kim meuh chuan a policy-te pawh a fiah deuh deuh niin a lang a, tun tumah hian US ram chhunga a policy a bawihzui dante leh ram pawna a policy tlangpuite kan thlirho leh dawn a ni.
Terrorist-ten kum 2001-a World Trade Center an tihchhiah hnu atang khan US chuan immigration lamah theihtawp chhuahin tan a la nasa hle a, US ramri apiangah intelligence service pawh tam tak a dah a ni. Amaherawhchu US ah hian dan lova lut an reh chuang hauh lova, tunah pawh dan lova hnathawk mi tam tak an awm a ni. Bush-a khan eng emaw chen chu ri lo kham ve tawh mah se Obama erawh chuan dan lova hnathawkhote chu dan anga an chungthu rel hmiah hmiah tawh tur a nih thu a sawi a. US Immigration and Customer Enforcement Agency-a John Morton-a phei chuan, “US ram chhunga dan lova hnathawk reng reng chuan karkhatah darkar 40 chuang an thawk ang a, overtime pawh an dawng hek lovang. Tunah hian hengho hi kan man zel tawh ang a, dan angin an chungthu kan rel zel tawh dawn a ni,” a ti.

Mexico ramri atanga drug, silai leh pawisa lem rawn lut tam lutuk chungchangah Obama chuan intelligence- te fimkhur turin thu a pe a, he thil bawhzui tur hian White House-a The Office of National Drug Control Policy- te mawhphurna a pe bawk a ni. Obama chuan Intelligence agency-te chu headquarter neia inrelbawl turin leh chuta tanga hmuntina operational organization- te din turin thu a pe bawk.

Obama-an a ram chhung policy-a a ngaih pawimawh em em pakhat chu Healthcare Reform hi a ni. Healthcare chungchangah June thla tantirh khan US Congress hmaah US in hriselna tha zawk a mamawhzia sawiin thil man tihtlawm a tul thu te, US- a thil siamchhuah reng reng chu customer-te duh dan ang ngeia quality tha taka siam a tul thute pawh uar takin a sawi.
US in hman atang tawha a buaipui ber chu “abortion” hi a ni a, US Presidential Election- ah pawh hei subject hi an debate nasa thei hle a ni. US inawp dan chu federal inawpna a nih avangin state pakhat leh pakhat inawp dan pawh a inang lo deuh theu va, “abortion” an hrilhfiah dan leh pawm dante pawh a inang lo hle a ni. State hnih/khat chuan “abortion” chu state leh local dan nena inmilin pawm mah se mi tam zawkten Baibul nena in mil thei lo thil nia an hmuh tlat avangin vawin thlengin he subject hi an la inhnial chhunzawm zel a ni.
Democrat-ho chuan a tlangpuiin abortion an pawm lova, Obama policy pawh hian abortion chu a pawm lo hle a ni. Dan lo anga abortion siamtute pawh US Justice Department chuan a zawngchhuak mek a, he department hian US hmun hrang hrangah state and local law inforcement agencies hrang hrangte a din ang a, dan lova tualthatna chi hrang hrang pawh an haichhuak zel tawh dawn a ni.

George W Bush-a term zawh hma daih atang khan human rights activists-te chuan Cuba thlirkara terrorist-ho dahkhawmna Guantanamo lungin chu khar turin Bush-a kha a ngen nasa hle a, he lungin avang hian US pawh a hmingchhe hle a ni. He lungin hi khar tura thupek tawh ni mah se lungin tangho chungthu rel dan turah US in buaina lian tak a nei a, lungin tangte hi anmahni ram theuhva thawn nge tha anga US lungin chhunga dah tha zawk ang tih chu an buaipui ber a ni. Pesident George W Bush-a hun atang chuahva terrorist lungin tangte chungthu roreltu pawl ( Military Commission) din a ni a, Obama erawh chuan terrorist-te chunga Bush-a policy chu siamthat leh a duh a. Thi ngei tura hrem tuar turte (death penalty)-ho hian ngaihdam dil theihna an nei nge nei lo tih dan fel tak an la siam loh avangin tunah hian dan tlangpui an zam mek a, he dan tlangpui hi zam fel a nih hnu chuan Congress-ah an thehlut ang a, Congress chuan fimkhur takin a lo ngaihtuah dawn a ni. Amaherawhchu kum 2006-a Military Commission an siam hmaa, World Trade Center tichhe tura ruahmanna siamtute leh September 11,2001-a World Trade Center tichhe tura a mawh phurtu chu keima ka ni e, tia inpuangtu Khalid Sheikh Mohanmed-a te erawh chu ngaihdam theih an ni dawn nge dawn lo tih hriat mai theih a ni lo.

Military Commission prosecutor-te zinga mi thenkaht chuan heng mite pawh hian ngaihdam dilna chu an siam thei tur a ni an ti a, he boruak hi Obama chuan Congress rorel dan ngaichangin a bawhzui dawn niin a lang.
June Ni 4 khan Obama chuan Muslim khawvel a fang a, US leh Muslim khawvelte indawrtawna siamthat tumin Aigupta, Cairo khawpuiah Middle East chunga US policy-te a sawi a. A bik takin Israel leh Palestine-te inkara buaina tireh tur chuan Israel-in Gaza Strip-a building a sak belh zelte chu Israel-in a titawp hmiah tur a ni a ti a, Israel leh US te inkarah pawh inhmuhthiamlohna eng emaw a thleng hial a ni. Kum 1979 atang khan US leh Iran te chuan diplomatic relation an nei tawh lova, mahse Obama hian US leh Muslim khawvelte inzawmna siamthat a tum tlat avangin Iran nena dawhkan chunga thusawiho turin Iran chu a sawm a, Iran in a sawmna a ngai pawimawh lo a nih erawh chuan tun aia nasa zawka economic sanction siam a tum thu pawh a sawilang nghal bawk. Iran chunga Obama policy hi hriatthiam a har deuh avangin Nem Rum tak Policy ti mai ila kan fiah thei mai awm e.

June Ni 6 khan Obama chu D-Day 65-na hmang turin France khawpui Colleville-Sur- Mer-ah a thlawk a. A thusawi tum chuan Muslim khawvela EU hruaitute inrawlh turin leh Muslim ramte nena inlaichinna siam turin a ngen bawk a, Turkey- in Europian Union membership a dilna chungchangah erawh France President Nicholas Sarkozy-a nen an inbak nasa hle thung a ni. Turkey-in EU membership a dilna chungchangah France remtihlohna leh EU rama sawarkar department leh zirna sikul thenkahta Muslim hmeichheho lukhuh phal loh chungchang an zawh tum chuan Obama an,” EU member-a Turkey a tel ve chu thil pawimawh tak mai a ni a, President Sarkozy-a erawh chuan ngaihdan danglam tak a nei tlat a nih hi! Turkey chu France thiantha a ni ang a, US thiantha pawh a ni bawk ang a, EU ramte thiantha pawh a ni bawk tur a ni. US in Muslim khawvela remna a zawn ang bawkin France leh EU member-te pawhin mawhphurna lian tak an nei a ni. Muslim ramte pawh khawvel community-a an rawn tel ve kan phalin kan lo welcome ve tur a ni. Muslim khawvelte nena inrem tak leh lungrual taka kal dun hi kan mawhphurna lian ber a ni tur a ni,” tih a sawi a. President Sarkozy-a pawh chuan Obama policy chu a tlangpuiin a pawm a, Turkey nena inzawmna leh inlaichinna neih chu thil tul tak a ni tih sawi mah se, “ Europe hian ram ri a nei tur a ni a, EU hi khawvela ral muang ber niin ka hria a, chu muanna chu a chhait mai lova, kan vawna kan humhalh tlat theih nan France chuan Turkey dilna hi tunah rih chuan a la amen thei lo cheu chu a ni e,” tih a sawi tel bawk.

Ram chhung ram pawna Obama policy chu tha hle in lang mah se Israel leh US te inkara inhmuhthiamlohna leh EU nena an policy inanlohna te hi engangin nge an chinfel dawn tih erawh chu histawri kal zelin a rawn hril ngeiin a rinawm a, Iran, Iraq, North Korea leh Afaganistan ramahte hian Obama hian engang policy nge a hman zel dawn tihte pawh kan la thirho leh dawn ania.

NB: He article hi ka hmuhdan leh ngaihdan mai a ni a, a sei lutuk ka hlauh avangin thumal ka hrilhfiah lohte pawh a awm nual bawk. Dik lo leh fel lo deuhte a lo awm palh a nih pawhin i ngaihdan leh hmuhdante i rawn sawi ve bawrh bawrh mai dawn ania. Ka lawm e.