ZONET, Nov. 18, 2008: US President thar tur, Barack Obama leh inthlanna-a a hneh tak, John McCain chuan America sorkarin mipui rin a hlawh leh theih nan theihtawpa thawh dun an tum thu an sawi ve ve a, inthlan hnua an inhmuh vawi khatna-ah hruaitu pahnih chuan thil lian tham, tuna an ram sum leh pai dinhmun tlakhniamna ang chi-ah te chuan inep lova thawh dun zel an duh thu an sawi a ni.

McCain chuan Obama kaihhruai sorkar chu a theih dan dana puih a tum tih a sawi a, mahse McCain-a hi Senate-a a mawhphurhna bak, chanvo dang pek a ni dawn em tih erawh chu an sawi chiang lo ve ve a ni. President tur, Obama hian a kaihhruai sorkar, Cabinet-ah Republican party mi telh a tum tih a sawi avangin, McCain hi Secretary pakhatah ruat a tum a nih ring an awm a, Obama hian an ram siam thatna tur ruahmanna a neih hrang hrangte, an ram rorel khawl, Senate-in a pawmpui theih nan he Arizona Senator hi a mamawh hle thei mai theia ngaih a ni. Hruaitu pahnih inkawmnaah hian Obama-a hnuaia White House Chief of Staff tur, Rahm Emanuel leh McCain-a thian tha, Senator Lindsey Graham pawh an tel a ni.
——–