NUIH HI HRISELNA

1. Mi pakhat pawh a han tawngmawh ve mai mai khawp a. A thenawmpain, “I bawng damlo chu eng nge i pek?” a ti a. “Iodine” ti ringawtin a chhang a. A tukah a thenawmpa chuan lungawi lo zetin, “I bawng damlo kha iodine i pe a, kei pawhin ka bawng ka pe ve a, a thi daih,” a rawn ti a. Ani chuan, “Kei pawh,” ti ringawtin a lo chhang.

2. Cowboy pakhat hian nula hmeltha zet mai hi, “Sakhmeltha chungchuang,” a va ti a. Chu nula chuan, “Ka lawm e, sakawr chungchuang,” a lo ti zeih.

3. Khaw pakhatah hian pawl din an uar lutuk a, thenkhat ning lutuk chuan ‘Pawl pawl ti lo pawl’ an din tawp. Mahse, chu pawla tel duh loho chuan pawl hran an la din leh hram! an ti.

4. Court-ah chuan roreltu chuan an mi man chu thu a lo zawt fiah mek a.

“Eng vangin nge pawisa lem hi i siam?”

“Ka pu, a tak chu ka siam thiam ngang lo a ni.”

5. Sikul naupang pakhat pawh a thiam thei lo lutuk a, an zirtirtuin ni tin a vaw ziah thin a. Ni khat chu darthlalangah a mawng chu a han en a, “E he…, kan zirtirtupa chu ka mawng a lo vaw phel vek tawh a nih hi.”

6. Bike a chuang a, Traffic police-in an lo tiding a, “Enga ti nge lukhum(helmet) i khum loh?” an lo ti a. Ani chuan,“Keimah ang hi chu ni ve ula, in khum bik lovang,” a ti mai a. A chhan an han zawh chuan a lu leng tawk hi a lo awm der lo hi a lo ni a.

7. Zurui pahnih hi kawngah dingin an lo inhnial a. Pakhat chuan, “Thla chu a eng hle mai,” a tih laiin pakhatin, “Thla a ni lo, ni a nih khi,” a ti ve thung a. Chutia an inhnial ngat ngat lai chuan pa pakhat, rui zet hi a rawn thle phei chhur chhur a, anni chuan an thil hmuh chu ni nge thla tih an lo zawt ta a. Ani chu a han hawi vual vual a, “In mawl lutuk, Vanramah ni leh thla a awm lo,” a ti daih.!!!!

8. Saptawng chuan Bike khalhtu hi ‘Rider’ an ti a, motor khalhtu chu ‘Driver’ an ti bawk. Tractor khalhtu erawh hi chu a thutna a sangin a hlat deuh avangin ‘Chair-man’ an ti.

9. Mikhual tlangval pakhat pawh khawlaiah inla pawr fe-in, “Tu nge min ngam?” tiin a au lung lung a. Pa pakhat rorum hmel deuh hian rum tawkin, “KEIMAH,” a lo ti a, chu tlangval chuan, “Tu nge Amah hi ngam?” a ti leh then.

10. Pa pakhat pawh kha zanah a mu a, thosiin a rawn vir sek a, a hnawt a. A hnuah dumde a rawn kal leh a, “Chu thosi chu(h), torchlight nen a rawn kal leh ka ti,” te a ti vel!

11. Nula pakhat pawh kha a no lutuk a, a hming pumin an ko va, a pilh duai.

12. Zurui pakhat pawh khan Taxi a lo phar ding ve a.

Zurui : I hman em?

Driver : Hman e.

Zurui : Lo chhuak la, lam ila.

13. Pa pakhat pawh hna a dil ve a, Birth Certificate an lo dil a, a nei si lo tih ngaihna hre lo chuan, “Ho e mai, ka piang chiang e mai,” a ti nuah nuah a.

14. Ziak leh chhiar thiam lo nula pakhat pawh kha tlangvalin lehkha a thawn a. A chhiar thiam si lo chu a thiannu chhiartir a tum a. Mahse, a thiannuin engkim a hria ang tih a hlau deuh bawk si, a tihngaihna hre lo chuan a thiannu beng a hupsak a, a riin a chhiartir ringawt.

15. Pa pakhat sipai chhuti pawh a fateho thil leina tur a pe a, an chhuah hnu chuan an nu chu, “January thla kan inhmuh loh ai,” a ti a, a fawp a, tichuan, February, March …. a ti zel a. November thla tana fawh a tum lai chuan kawngkaa a fapa lo awm reng chu a hmu ta a. “E he…Mama, engtik laiin nge i lo haw a?” a ti a. A fapa chu a ngawi vang vang a, “July thla vel kha a niang.”

source: http://tahanvenglai.webnode.com/news/april-2010-issue/