Nl. Lalawmpuii, Ph.D (Physics) Biangbiakna

Dr. Lalawmpuii hi; October 05, 1975 khan Pu D.C. James-a leh Pi Khin Thet Lwin-te fanu ni turin a lo piang a. Amah hi mi nunem leh nu hnap mai a ni a, Yangon Branch PYF-ah Treasurer hna a chelh mek a, kohhran rawngbawlna kawng hrang hranga inpe zo thei tak a ni. Editorial Board chuan ni 21March 2011 khan Yangon PCM Office-ah Interview a neihpui a, amah hi PYF member zinga Ph.D. hmu hmasa ber a ni. Tunah hian No (9) Nyar-na-thu-kha Street, 2A Sanpya Quarter, Mingaladon, Yangon (Ph. 0973029311)-ah a khawsa mek.

(Thalai Entu = TE)  (Dr.Awmpuii = AwP)

TE : High School/College/University i kaina min hrilh thei ang em le?
AwP : High School hi BEHS (5) Mingaladon-ah ka zir a, College leh Unversity erawh chu Hlaing Campus, Yangon University-ah ka zir.

TE : Ph.D zirnaa i major subject leh i dissertation atan eng nge i thlan?

AwP : Physics hi ka major subject a ni a, ka dissertation atana ka thlan chu “Growth of Pb 1-x La x Ti 1-x/4 O 3 (x = 0.04 ~0.06 mol) Thin film for non-volatile memory device application” a ni. A hma chuan theory leh practical hi a hran ve vea research beih a ni thin a, tunah erawh chuan theory leh practical kan zawngchhuak ve ve tawh a ni.

TE : Ph.D zir thei tur hian M.Sc engtia pass tur nge ni?

AwP : M.Sc kan zir lai hian M1 leh M2 a awm a, kum hnih chhungin grade 8 pass a ngai a, kum khatnaah grade 3 chauh i pass a nih chuan a kum hnihnaah grade 5 i pass ngei ngei a ngai tihna a ni.

TE : Ph.D hmu tur hian kum eng zat zir nge tul?

AwP : Ph.D hmu tur chuan a hmasa berah Master of Research kan tih M.Res kum khat chhung zir phawt a tul a, M.Res degree kan hmuh hnuah Pre-Liminary kum khat chhung zir leh a tul a ni. Chumi hnuah chauh kum li chhung Ph.D dissertation kum 4 chhung kan bei leh. Kum 4 aia tam dissertation ziah hi phal a ni lo.

TE : Sum leh pai senso a hautak em? Tu nge sponsor che?

AwP : Hautak e. Kan sen zawng zawng hi belh khawm chuan a tam khawp mai. Amarawhchu a zat chiah ka sawi thei ta lo a ni. A chang chuan kar khat chhung leka nuai hnih dawn dawn kan sen chan te pawh a awm a ni. Min sponsor-tu hi ka Pathian leh ka chhungte an ni. Chu mai bakah, kei ngei pawh inhlawh phaha Ph.D hi zir ka ni. Middle leh high school zirlaite tuition ka pek thin bakah 1999 atang khan Loreal Cosmetic Company-ah hna ka thawk. Chumi hnuah erawh chuan kar khatah Ph.D hmu turin tum 2/3 practical beih a tul thin si a, company-a ka hnathawh chu ka bansan a tul ta a, naupangte tuition pek chiah chu ka thawk thei ta a ni.

TE : Ph.D degree neih hi i lo tum thin reng em?

AwP : Ph.D hmuh tum mai hi ka ni lo. Dam lo enkawltu Doctor nih hi ka lo tum thin zawk a. Pawl sawm kha D-4 nen ka pass a, amarawhchu ka mark-in doctor mark a pha ta lo hlauh mai a. D hmuh tam bakah subject eng nge maw berah kan mark a sang a nih chuan chu subject-ah chuan scholarship a hmuh theih a, Physics-ah mark 93 ka hmuh avangin Physics-ah scholarship ka hmu ta a ni. Ka hming hmaah Doctor tih inziak hrim hrim hmuh hi ka la chak fo va, chuvangin Physics subject-ah ka doctor lui ta hram a nih hi.

TE : Tunah hian eng hna nge thawh i tum? Kan ramah hian Ph.D degree nei tan sorkarah hna hmuh a awl em?

AwP : Sorkar college-a zirtirtu hna thawk tur chuan kum 35 aia upat loh a tul si a, sorkar college-ah chuan ka thawk thei tawh lo tihna a ni ang. Hei hi ka zirpui ka thiante nen pawh kan buaina ber a ni thin. Ph.D pawh hmu mah ila, kan kum a tam tawh si a, sorkarah hna kan hmu thei tawh chuang si lo tia Ph.D zirlaia ban tum mai pawh an tam thin. Kei ngei pawh zir zawm tawh lova hna thawh mai te ka tum reng fo a ni.

TE : Secular-a doctorate degree zir thei chinte hi kohhran hian sponsor zawnsak se tih thu hi GA-ah thlen a ni tawh thin a, hemi chungchang hi engtin nge i ngaih?

AwP : An tih theih chuan a tha ka ti khawp mai. A tluktu a awm chuang hleinem. Ph.D zir hi senso a tam em em si a. Yangon khawchhunga awm tan chuan a la ziaawm. Mi rethei te te kan nih vang hian khaw hla atanga Ph.D zir tura Yangon/Mandalay vela rawn zir phei chu harsa tak a ni. Chuvangin zir thei dinhmuna ding reng si a, sumin a tlin loh avanga zir chhunzawm thei ta lo zirlai thalai tam tak an awm a ni. Khaw danga awm zirlaite tan chuan Ph.D zir chu thil theih loh tluk a ni. Kei ngei pawhin M.Sc ka zirlai khan MCC atang kum khat chhung ka zirna tur scholarship ka dawng a. Amarawhchu, Pathian Thu zirlaiten scholarship an dil nasat em thin avangin secular lam hian MCC atang scholarship hi kan dawng thei mumal ta lo a ni.

TE : I zirna kawngah eng harsatnate nge i tawh? Engtin nge i pal tlang?

AwP : Pathian zarah harsatna ka neih em em ka hre lo. Ama’rawhchu, hna thawk phaha zir ka nih angin ka zirlai aia ka hnathawh ka vei zawk chang a awm thin, chuvangin ka zirlaiah rilru pek theih loh chang ka nei fo reng a, chutiang harsatna ka tawh chang chuan Pathian hnenah ka inhlan thar leh thin a, Kohhranho pawhin min tawngtaipui fo thin. Zirlai ka nih avangin chhungkaw mamawh ka tihsak theih loh chang pawh a tam thin hle a, a chang chuan inthlahrun a na duh khawp mai. Ama’rawhchu ka chhungte hi an tha em em a, ka rilru hah hlauvin lehkha ka zirlai chuan an dam lohna chungchang pawh min hrilh ngam ngai lo a ni.

TE : Zirlaiten eng ang rilrupuin nge lehkha zir se tha i tih le?

AwP : Pakhatnaah chuan mahni zirlai hi thiam tak leh chiang taka zirthiam a pawimawh ber a. A pahnihnaah chuan tum nei rana zir hi pawimawh ka ti hle bawk.

TE : Degree sang ber Ph.D degree hial i nei ta reng mai a, i zirlaiah hian hlawhtling i inti em?

AwP : A chang chuan Ph.D hmu tawh si, sorkarah pawh hna hmuh theih tawh si loh tiin ka lungngai thin. Kristian kan nih angin Pathian hian tul a tih hunah chuan ka thawh tur tawk hna chu min la pe ngei ang tih hi ka ring tlat a ni. Sorkarah hna hmu dawn lo mah ila, private school hian degree nei sang leh mi thiamte an la mamawh em em a, chance ka la nei thaah ka inngai. Ka zirthiamna hi a hlawkna ka la tel tak tak loh avang erawh chuan hlawhchhamah ka la inngai a tih theih awm e.

TE : Zirlaite hnena i sawi duh leh chah duhte eng nge ni le?

AwP : Ka sawi tawh angin, eng pawh zir ila, thiam tak leh thahnemngai taka zir turin zirlaite hi ka chah duh a. Tin, tunlai khawvelah zirna ngaih pawimawh vanga Sakhuana/Kohhran thil ngaihthah hi tha ka ti lo. Zirlai ni chung reng pawhin Kohhrana inhman luih hram hram hi a pawimawh a, a hlawkthlak hle bawk a ni tih hi ka tarlang duh bawk.

TE : Kohhranah eng tiangin nge i inhman?

AwP : Yangon PYF thalaiah hian kumin thlengin kum 7 chhung chu a zawnin PYF Treasurer nihna ka chelh.

TE : Sawi duh dang i la nei em?

AwP : Tunlai khawvel mila hna thawh thiam tum hi pawimawh ka ti hle a ni. Kan hriat theuh angin kan khawvel hi computer hun a ni tawh a, kei hi computer pawh khawih thiam mumal lo ka ni. Hna ka thawhin ka thawhpui computer thiamten min thawh khalh zung zung tawh mai si a, Degree nei sang ringawt mah ila, thiante el pha tur chuan computer nena hnathawh thiam a tul a ni tih ka hria a. Chuvangin computer pawh ka zir that leh hial a tul a ni.

Tin, Kohhran member zawng zawng hnenah in mi tawngtaipuina ka ngen ngawih ngawih bawk a. Ka pa-in min boralsan hnuah hian kan chhungkuaah keimah chiah hi Kristian awmchhun ka ni ta a. Ka chhungte hian Kristian ka ni hi mi hriatthiampui em em laiin, sakhuana inanglo chhungkaw khata chenho hi thil awlai a ni hauh chuang lo. Ka naupan lai atanga ka tawngtaina bang thei lo chu “ni khat khatah ka chhungte hi Kristianah siam ang che” tih hi a ni. Chu chu ka beisei lian ber a ni a, engtik niah emaw chuan kan chhungkuaa Kristian kan nih pawh ka ring tlat a ni. Chu chu tawngtai thupui atan Kohhran zawng zawng hnenah ka rawn thehlut nghal a ni e. Ka lawm e.

thulakna: Thalai Entu-PYF-TahanikoniИкониПодаръциИдея за подарък