Myanmar : Retheihna leh AIDS

By: Ela Khiangte, Australia
Nikuma Cyclone Nargis khan, Ayeyarwaddy delta vela buh leh bal zawng zawng a nuai chhiat vek avangin Myanmar mipuite chuan ei leh in lam a nitela an harsat thu UN chuan nilai ni khan khawvel hriatah a puang a. Tuna thlalak an rawn tarchhuah hi Dalla khua, Yangon atanga 20kms ahla ah tleitawl pakhat leilet lai a ni.

UN food and Agriculture Organization ( FAO )leh World Food Program ( WFP ) te chuan, Cyclone Nargis thlipuiin a nuaichhiat tak Ayeyarwaddy leh Yangon chhehvela leilet ram hi rampum huapa 50% hial buh thar theihna a ni an ti a. Chhumai bakah Chin state-a mautam vang pawhin ei leh in harsat zualna niin an puang bawk. A bikin Myanmar khawtea khawsate chu ei leh in lam harsatna hian a tuam na zual a ni tiin EFP aiawha thupuangtu Chris Kaye chuan ziak ngatin UN ah a thehlut a. Myanmar hmun thenkhatah chua buh te chu tha hle mahse thlipui tuarte in leh lo dinthatlehna nen, ei leh in tur ngaihtuah nen, Myanmar mipui tamtakte chu retheihna hian a la chim tak zet a, mipui 5million aia tam chuan buh eikhawp an la neih loh avangin emergency food tanpuina an la mamawh hle a ni tiin Chris-a hian report a theh lut a ni.

Chu mai a ni lo, kumin hian HIV/AIDS vangin Myanmar mipui 25,000 te chuan an thih phah tur thu ramria Doctor pakhat chuan UN ah report a thehlut bawk a. He doctor, hming tarlanloh in a sawidanin Myanmar sawrkarin HIV/AIDS tuarte inenkawlna lam hi a ngaihthlah vanga he natna thihpui tur an tam thu a sawi tel bawk a, tunah hian mi 240,000 chuan he natna hi an vei thu leh 76,000 te chuan enkawlna an dawn vat loh chuan an thihpui thuai tur thu a tarlang a ni.

Tin, he doctor vekina sawi chhunzawm danin 2008 ah Myanmar sawrkar laipui chuan HIV/AIDS veite tan $200,000 chuah project an hmang a, chu chu khawvela ram pakhat dinhmuna project hniam ber a ni a. International organization hrang hrang te hnen tang HIV/AIDS lamhawi zawng a fund rawn lut pawh sawrkar laipui chuan a pawm that duh loh vanga heti khawpa mipuite hian tawrh pah niin a sawi bawk a.

Tin, thlipuiin Myanmar mipui 100,000 dawn lai a tihhlum a, million tam tak te in leh lo neilova a siam lai pawhin, ramdanga tanga pawl hrang hrang ten tanpuina an pek takngial pawh sawrkar laipui chuan hnunglam a lo hawisan hmak kha khawvel record ah a chuang nawlh bawk a. CNN ten an sawidanin he doctor, hming tarlan loh hi 1993 atang tawh khan Myanmar ram chhungah health care thawka khawsa a ni.

Thulakna : CNN