MSF-in Pawl 10 Pas Tharte Tan Seminar A Buatsaih

By B. Zosangliana, Tahan
July 7 (Inrinni) khan Mizo Students Fellowship (Universities – Kalay) chuan a tum hnihna atan 2011-2012 zirkuma pawl 10 pas tharte tan MYA Chapel, Mission Veng-ah education seminar a buatsaih. Zir zel turte tana buatsaih he seminar-ah hian Tahan leh a chhehvel khaw hrang hrang atangin zirlai leh an nu leh pa mi 200 vel an kalkhawm a, an hlim tlang hle.

Kristian thalai leh zirlai rual kal khawm an nih angin inkhawm hun serhin bul an tan a. MSF senior friend Tv. Lalthansanga, M.A. (Eng)-in devotion a kaihruai a, MSF adviser Pastor B. Zosangliana’n Pathian thu a sawi a, Pathian hnaih thatzia leh a duh zawnga nun chu engtikah emaw a hnathawh mak tak mai hmuhna (channa) a nih thu a sawi. Bethany Clinic superintendent Dr. Lalhlanpuia’n thian kawm fimkhur pawimawhzia leh inngaihtlawmna nun nena thahnemngai taka lehkha zir a pawimawhzia sawiin zirlaite a fuih bawk. TCYF Icon-a mi langsar tak tak Tv. Lalhlimpuia leh Nl. Lalruatdikiten hla an thlawh tha hle. MSF Vice President Nl. Lalrawngbawli’n MSF chanchin tawi a sawi a, MSF President Tv. Lalchhandama’n lawmthu a sawi, adviser Rev. Dr. Laithuama’n malsawmnain hunserh a khar.

He seminar-ah hian Tahana mi chhuanawm tak takin zirtirna an pe a, Seminar hi MSF adviser Pu Vanlalneia’n a kaihruai. Kalay University-a tutor Saya Lalramlawma’n ‘Kalay University leh ram chhung zirna’ a sawi a, Saya Cin-a’n ‘Computer University chungchang’ a sawi bawk. Saya J. Khuma’n ‘Ram pawna zirna’ lam hawi a sawi a, Sayama Lalnunpuii’n ‘Engineer zirna leh a kaihhnawih’ a sawi. Saya Muanliana’n Kalay University-a major dil dan leh subject hrang hrang chungchang a sawi bawk. Zing dar 8:00-ah an tan a, tukthuan tuihnai tak hlim taka an kil ho hnuah tlai dar 4:00-ah an tin.

MSF-ah hian hming inziak lût member 278 vel an awm thu—MSF President Lalchhandama’n a sawi. Zirna lama inkaihhruaina seminar hmasa atanga zirna tha zuan fuh pawh an awm a, a kalten an hlawkpui thin hle. Kalaymyo chhungah hian University pathum – Kalay University (Kumain), Technology University (Thuma) leh Computer University (Kalaywa Kawng) te an awm.

Tun tum seminar hi khawchhunga mi tlawmngai leh vophal chhungkaw 20 thlan chhuahte hnen atanga vehbur an khawn sum tling khawma buatsaih a ni a, vehbur khawn hi MSF adviser Rev. Dr. Lai Thuama’n a ho. MSF hian Zawlkin Huiva leh Zirlai Tlangau magazine an chhuah thin a, a pakhat zawk zawk hi kum tin vawi khat an chhuah thin. MSF-in hetianga zirlai naupang zawkte kaihhruai nachang an hria hi an fakawm tak zet a ni. An hmalakna a chak zel theih nan theihtawp chhuahpui erawh kan ba ve hlawm a ni.