MOTHER’S DAY (Nu thate hlutna)

NU THATE HLUTNA
Gabriel Kunga, Tahan-Satawm

Nu Tha An Hlutzia:
Nu, Pathian ngaihsak mi neitu chu rethei ka ti lo ve,” Abraham Lincolna’n a ti.
Mahni fate tan ro hlu tak kan hnutchhiah duh a nih chuan, mahni (nu) ngei chu Pathian ngaihsak mi nih a tul a ni ber mai. Ro thil dang kan ngaihtuah thin. Kan nei emaw, nei lelua lo emaw a nih pawhin, mahni fate kan duhsakna tha tak mai ni reng chu Pathian tih leh ngaihsak mi nu an neih ngei theih hi a pawimawh. Pathian ngaihsak mi nu tha tak fate chuan nun tam an nei bik dawn kan ti thei ang chu. Nu hlutna kan sawi fo thin tawh a; tun tumah chuan phuan duah lovin ka’n thlawhhma sawi hmiah hmiah mai ang e.

Nu Tawngtaina A Hlu:
Ka nu tawngtainate chu ka hre reng thin. Ka dam chhung hian min zui reng a ni,” Abraham Lincolna vekin a ti a.

Mihring chu kan rawn than chhoh lai leh kan lo puitlin deuh pawh hian, kan thu hriatten min chim fo thin. Chhungkua leh kohhran, thian leh pawn lam atang pawhin, thil eng eng emawten kan ngaihdan an siam a. Kan dawnsawn dan leh eng thu thute nge kan rin tak ber tih chu kan nunah a lang chhuak thin a ni. I tawngtaisaknate chuan i fate nun leh thinlungah bu a la chhep ve ngei dawn tih hria ang che. “Khawngaihna Mak” hla phuahtu John Newtona pawh, naupang te a la nih laia a nu’n a thihsan hma zawnga a lo tawngtaisakna chuan, suala a bo hnu, thlipui leh tuifawn kara a talbuai laiin a thinlung chhungrila Pathian rinna a kaiharh ta a, Pathian a au ta phawng mai a ni.

Bible-a kan hmuh angin, Hani chuan tawngtainain fapa a neih chhun chu a hlan tih kan hria. A pasal Elkana’n nupui pahnih a nei a. A nupui pakhat zawk Peni chuan fa a neih nual laiin, Hani ve thung chuan fa reng reng a nei lo va. Khang hun lai Judate khan nu fa nei thei lo hi a vanduai thlak hlein an hria a; Peni chuan Hani a hmusit hle reng a ni. Peni chu fapa a neih thluah avangin mi karah pawh a tlangtlain nutling nih a hlawh bik tak na a, a fapate tumah kan hre leh tawh hlawm lo chu a nih hi. Samuel ang fapa pakhat chauh neih chu a hlu zawk hle kan ti thei ang. Hani’n a tawngtai hlawh chhuah a nia sin.

Susanna Wesley khan fa sawm pasarih meuh a nei a; sawm pali vel an dam chhuak a. A fate an silfen tur, ei in tur, zirna tur reng reng khan a buaipui dan tur ngawt pawh chu tunlaia fa tam lo tak nei nute ai chuan a hautak fe zawk ngei ang le. Khati chung chung khan, a fate thlarau nun a chawmin an enkawl tha em em tlat thei nia. Nitin hian a fate a mal malin a hranpa taka inbiakna hun a siamsak theuh zel a ni. Tin, an lo puitlin a, in an chhuahsan hlawm tak chinah pawh, a fate pakhat tan kartin darkar khat theuh a tawngtaisak hlawm thin. I fate tawngtaisak nan hun i hmang ve thei zel em le? A hlutzia i chhut thiam mai rih lo’ng.

Nu Enkawlna leh Kaihhruaina A Hlu:
Ka nihna zawng zawng leh ka la nih zel tur zawng zawng pawh hi ka nu laka ka bat vek a ni,” tiin President Abraham Lincolna’n a sawi.

Thinglai khaw chengreng daikil kara awm, chhungkaw rethei tak atang chuan tu nu mah hian President Lincolna ang fapa an chher chhuak thei tawp lo’ng nge. Mahse, Lincolna tan chuan harsatna hneh thei khapa tumruhna leh rilru thatna te chu a nu’n a enkawlna atanga intanin an lo thang lian zel kha a lo ni a. A nu khan a zir em a lo ni! A nu atanga a tan thanmawhbawk lo la ni zel tur te lo nei nual sela chu, a la nun dan tur zawng zawng pawh chu a tidanglam vek ngei dawn a lo ni reng mai.

Jochebedi kan hre lar kher awm lo ve. Nausen Mosia enkawl tura a nu ngei Pharoa fanuin a rawih kha a ni a. Naupang chhe enkawl reng ngai a nih tawh loh chinah chuan, a nu’n a kalsan leh mai a. A fapa naupan laia rinna chi tuhsakin a enkawl avang khan, a lo puitlina Aigupta ropuina leh Pharoa rote zawng zawng aia hlu zawk Pathian rinna chi a lo tuh nghet em em hman a lo ni. I fate nunah rinna chi tuh nghet ve turin Pathianin hun engthawl tak tak a pe bik thin che asin.

Timothea pa chu Grik mi a ni a, a fapa thlarau nun engmah a ngaihsak pha lo. A nu Euniki erawh chuan Pathian Thu a lo zirtir thin avangin, Tirhkoh Paulan Ephesi khuaa rawng a bawl khan a thlenna in ber a ni thin a. Timothea chu pa sitik tak leh duhtui tai Paula ngainat em em, a mi rin tak, a fak em em thin a lo ni bik tlat mai. 2 Timothea 1:5a kan hmuh angin, a nu Euniki zirtirna atanga rinna a neih thu kan hmu.

Thomas Edisona kha, a nu’n a thihsan hma em em nain, rinna lamah Pathian mi ni tur khawpin a lo kaihruai hman tlat mai. A nihna leh hlawhtlinna zawng zawng pawh a nu laka a bat angin a sawi.

George Washingtona chu a nuin Bible leh tawngtai a zirtir thin a; nitin vawi hnih chhungkaw inkhawm an nei thin.

DL Moody-a chu a nu hmeithai rethei takin Pathian Thu a zirtir thin.

Sir, Isaac Newtona chu kum 7 a niha a nu thih hma zawng khan nitin a nu’n a lo tawngtaipui thin a ni. Scientist-hovin an thil hmuhchhuahte avanga Pathiana rinna an phatsan huai huai lai pawhin, rinnaa dingnghetin a humhim tlat zawk thin.

Thufing 31
Chang 1naa kan hmuh chu: “Lal Lamuela thu te, thufing, a nu zirtirte chu,” tih a ni.

He thufing hi Lal nun dan tur tha zirtirna leh nupui fel nihna thufingte a ni a. A ziaktu hi lal a ni nachungin, a nu thu a ngaihsak thin tih kan hre thei. Hmeichhe thu mai mai ti lovin, fapa fel chuan nu zirtirna a dawnsawng thiam thin a ni. A nu zirtirnate avanga he lal hi kan hriat a hlawh bik a, tichuan, a nu zirtirna thufing hi chhung zawng zawng atan ro hlu tak a ni reng bawk.

Judate chuan hmeichhe thu chu an bengkhawn tehchiam lo niin kan ngai thin. Solomona thufing atang chuan, “Ka fapa i pa thupek chu zawm la, i nu zirtirna che chu hawisan suh,” tiin a zirtir mauh mai (Thufingte 1:8; 6:20). Nu zirtirna hi fate tan ro hlu tak, kan nun thatna leh hmuingilna hnukpui chu a lo ni.

He a hnuka kan tihfuh loh avang hian, suahsualna leh fel lohna kan lo paw chhuak fo thin a. Chhungkuaa bul tan a fuh loh avanga kan buainaah pawnlama eng eng emaw, tu tu emaw mawhchhiat tur kan dap chung thin tur a ni lo vang. Sapho leh ram changkanga pastor-te phei chu chhungkuaah rinna leh Kristianna an kalpui fuh thin a, an fate pawh an nu leh pa chawimawitu leh Pathian mi tak tak an ni hlawm thin a. Keini Zofate zingah chuan kan kohhran hruaitute zingah ngei ngei pawh, chhungkuaah kan kalsualna a intan fo avangin, nu leh pa tihmingchhetu leh Pathian hming tihliautu fate kan buaipui leh fo mai. Chhungkuaah kan tihfuh ve ngei a pawimawh ber! Tun atang hian i zir tan zel ang u, Zofa Kristiante.

HAPPY MOTHER’S DAY!

PS: Kum danga Mother’s Day thuziak kan dahah hian Sap nufa thlalak hi kan tar mai thin a, sawiselna kan tawk fo a kumin chu Pi Mawitei te nufa thlalak hi an FB-a an tar, a rukin kan tarsak ta mai a ni. dik’s