Mizoram Zaithiam Thenkhatte Chanchin Thar

By: Robert Zoliana
Australia atangin MS-i’n sawmna dawng
Mizo zaimite’n khawvel hmun hrang hrang atangin sawmna an dawng reng a, an kal chhuak mek a, an la kal chhuak zel dawn nite pawhin a sawi theih ang. Khawvel ram tam takah hian Zohnahthlak unaute an inzarpharh nasa hle tawh a ni.

Anni hian Mizorama awm an unau zaithiamte hi ngaihluin, hnam inpumkhatna tinghet zual tur leh inunau tawnna tha zawk a thlen theih nan an chah chhuak mek a, zaimite pawhin hlawkna nasa tak nen rawn hawin khawchhak lama kan unaute inpekna leh thatna hi hahip tak meuh meuhin an rawn sawi haw thin a ni.

Hetih lai hian Youth Icon 2007 Malsawmtluangi Fanai (MS-i) pawhin Australia ram atangin sawmna ‘sial’ tak mai a dawng tawh a, tunah hian inbiakna pawh a kaltluang hle. Pathian zarah he an sawmna duhawm tak hi a tihhlawhtlin ngei pawh a beisei. Ani hi milar Mali (LPS) in a tawiawm dawn nia hriat a ni nghe nghe.

MS-i hian passport a buaipui mek a, tum anga a kal remchang thei hlauh a nih chuan Inthlanpui hunah hian a hmel kan hmu lo mai thei. “Passport te kan neih fel theih a, VISA te kan hmu thei a nih chuan November thla chhung hian zinchhuah theih kan inbeisei a, Inthlanpuiah hian vote kan thlak hman lo mai thei a ni,” a ti. Churachandpur lamtluang zawhin Kar hmasa khan hlauthawng leh rilru tawt deuh ang reng takin Manipur chu a han thleng ta rawih a, rin ang ngeiin venghimtute hual velin a chhuk leh a chhovah a tlan a, mahse mipuiin an lo lawm dan chu ropui a ti a, nuam a tiin, an chibainaa an han hmer vawng vawng thin chu theihnghilh har a ti!

“Zo Sang naupang Pawlpi” function hmang tur hian Churachandpur kan pan a, ni 15 zan khan tan a ni a. Hemi zanah hian tute emaw zurui buai an awm nge ni dawn, boruak a tang hman thelh a, mahse tha takin ka zai thova, a tuk zan erawh boruak a chhiat hlauhthawn thil-ah show hi neih chhunzawm a ni ta lova, a pawi khawp mai,” tiin MS-i hian a sawi. A cham chhung hian VIP treatment pek a ni a, a kal chhuah dawn reng rengin Minister motor-in a zui zel a, venhimna pawh an pe tha hle. “Min lo lawm thiam hle a, an sawi dan mai maiah chuan chuti lutukin an ramah hian zaithiam hi an lawm lem lo a ni awm a. Chutih laia Mizo zai mite min lo hlut a, min lo dah pawimawh thiam em em mai kha a lawmawm ka ti a, an chungah pawh lawmthu ka sawi mawlh mawlh a ni,” a ti.

MS-i hian hla chi hrang hrang pawh sa thei lovin “Khuanu ruat loh D” tih hlir kha a sa char char a, request a nasat em avangin hla dang sak chi a ni lo hrim hirm a ni awm e. “A ninawm lek lek, he hla ringawt hi min sak tir a,” tiin nui sen sen chungin a sawi. Inah a thleng deuh chiah a, mahse ‘chawl hman kan ni lo’ tih ang khan a kal chhuah leh a ngai ta zel a, thawveng tak leh hahdam taka han mut siai siai chu tun dinhmunah chuan a la remchang rih lo. “Ka chau tawh khawp mai. Naktuk lamah pawh chhuahna tur a awm a,” a ti zawi raih.

Mimi Lalzamliani lung phun a ni:
Zaithiam Mimi Lalzamliani chuan a thlenna a piangah boruak duhawm tak mai a hnutchhiah thin a. Tun tumah pawh hian a thiltih that leh inpekna avanga lawmthu sawina nipahfawmin Tawizo khua chuan ropui taka chawimawi tumin ama pual liau liauin chawimawina lung an phun a, hemi hawng tur hian an chah ta rup mai.

Mimi chuan hemi chungchang hi sawiin, “An khua hi khawnuam tak ni mahse zaimite’n an la tlawh ngai meuh lova, Chapcharkut kan va hmanpui a, an lo lawm ve lutuk a. An khaw kawng hi a chhiat em avangin tlawhpawh an ni ngai meuh lova, chutih lai kara an bula hun kan va hmang thei chu an lawm em vangin chawimawina lung min phun sak a, chumi hawng tur chuan min rawn sawm a ni.

“A hun tur hi 28, Thawhlehni hi a ni a, mahse khua hi a chhiat em avangin a hun takah kan kal thei dawn nge ka hre lova, sawn leh hret pawh a ngai mai thei bawk a. Pathian thu thu a niang chu, hetianga chawimawina lung min phun sak hi a ropui ka ti a, phu lo hlein ka inhre bawk,” a ti. Hetianga damlaia lung inphun sak hi hriattur a vâng hle a, Zo rimawi khawvelah phei chuan (kan sawi sual loh chuan) a hmasa ber a ni hial mai thei.

Malaysia-ah RC-i thlawk lut dawn
“Malaysia atangin sawmna ka dawng a.Pathianin rem a tih chuan Sailova nen December 19 hian Aizawl chhuahsanin Kualalumpur kan thlawk lut anga, ni thum- li vel kan cham hnuin kan rawn let leh ang,” tiin a sawi a, zaithiam tam tak an awm laia duhsakna a dawng chu a lawm hle a, Sailova chungah pawh lawmthu a sawi nghal bawk.

Serchhip-a YMA khawmpui chu nuam a ti hle a ni ang, eng engemaw a sawi zut zut a, chuta kan hriat theih pakhat chu, “Palai kalte an fel hlawm em em a, zaimite an ngaisâng thiam hle bawk a, hei hian min ti lawm hle. Mahse, min chibaitute zingah tlema ‘over’ deuh hret an awm thin a, ka kut fawh tum te kha an buaithlak ka ti. An chuk chak tlat mai a, mahse kei chuan ‘A ngai kher lo, chibai kha a tawk mai,’ ka ti ringawt thin a, kawng lehlam takah chuan a hlimawm phian,” a ti bawk.

RC-i hian Aizawl khawchhung mai ni lo, khawpawn leh state dang daih atangte’n sawmna a dawng awl lova, “Vawiin hian Kolasib-ah kan kal anga, Chuan November thlatir hian Halflong lamah kan zin leh anga, programme neuh neuh, mahse la confirm chiah loh pawh a awm nual,” tiin a sawi. Hetih lai hian Zarkawt-a Grace Spa enkawltute chungah a lawm hle a, an ni hian a nalh zual deuh deuh nan an hun leh tha a thlawn liau liauin an sen sak thin.

Luahlai rem lo B. Malsawmtluangi
B. Malsawmtluangi (SP-i) chuan October thla chhung ngeia album thar ‘Luahlai I Rem Si Lo’ tihchhuah a tum zet hnuin a hna lama a tul leh tak em avangin kum danga ‘October thla-ah ka tichhuak thin” a tih thin chu kuminah erawh a takin a puitlin leh thei dawn ta lo.

Hrehawm a ti ru hle a, album a tihchhuah te kha October rimnam vek an ni lehnghal a, “Kan thei leh dawn lo tlat mai. November chawlhkar hnihna emaw thumna velah chauh kan tichhuak thei ang. Tum angin thil a kal loh bakah sikul-ahte hna kan thawk tawh bawk si a, hunawl neih hi tunhma ang khan a theih tawh loh vang a ni,” a ti.

Hetih lai hian album thara mi tur tract list a sawi chiang a, “‘Hraichawi leng, Nunhlui tawna suihlunglen, Luahlai i rem si lo, A kim ngei ang, Mizoram tan, Leng dial dial ang, D enchim loh, Nghilh bik lawng che mangtha, Samang ka then hnu, kumtluang atan, If u were a sailboard leh Darthalang’ te an ni ang.

Thulakna: wWw.zOrImAwI.blogspot.com