Article ziaktuMizo Val Ngei!!! Video Clip
Published on: Sep 21st, 2008 | Posted by: dika | 2,480 views
By: Editor
Kum 2003 Chapchar Kut, Aizawl Lammuala kutpuinaah “Keizawng ka thlang—Mizo Val Ngei” tia aupui lawm lawmtu leh a thlan ang ngeia Mizo Val ngei khiangawihpuitu— Pi Lalrindiki Khiangte hi Zoram khawvelin a hriat ang hian, he hla ropui tak phuahtu—Pu C. Durthanga erawh mi tam zawk chuan kan hmelhriat lo thei a. Tuntumah hian a chanchin tlem azawngin i han thlurbing dawn teh ang.
Pu C. Durthanga hi Pu Thanmawia leh Pi Novi te fa 12 zinga a pa 4-na niin Khawruhlian khuaah a piang a. A nupui Pi Lalromawii nen fa 3 an nei. Zirna lamah Class IX a thleng. Hla 300 vel zet a phuah tawh. Pu C. Durthanga hian 1962 kum atangin hla hi a phuah tan a. A hla phuahte hi zaithiam hrang hrangten an sa a, an larpui hle thin. 2003 kumah Zaithiam hrang hrangten ama hlaphuah khungkhawmna audio-Ketset “C. Durthanga Collection” te pawh tlangzarh a ni.
Tin, 1998 kum khan lengzem hlaphuah thiam ber lawmman “Best Composer of the Year” Sports&Music Magazine, Mizoram buatsaih a dawng a. Tin, kum 2003-ah Rimawi Khawvel Magazine buatsaih “Rimawi Khawvel Music Award” pawh a dawng leh bawk a ni. A hla phuah tam ber hi Ramhnuai sipaia a awm lai, nun ralmuang lo taka a phuahte an ni hlawm a. Jail a tan laia a phuah RUNTHIM tih chu a hla phuah zinga a duhber a ni a. Tin, Pi Daduhi sak, “CHHUL KHAT KUAL” te leh Elizabethi sak; “AW… MIZO TLANGVAL” te hian Zoram khawvel a nghawrnghin zia chu kan hriat si. Tin, Pu C. Durthanga hian hla a phuah thiam chauh ni lovin, zai pawh a thiam fawm a, AIR (All India Radio Mizoram Station)-ah pawh ama hla phuah 4 lai a khung tawh a ni.
Awle, ram hrang hranga awmhmunkhuar Zofate’n unau chhul khat kual, chun khat hrin kan nihnate hrereng a; hun lo la kal lehzel turah pawh chiang lehzuala inhriatpawhtawnna kawng tha kan neih a, kan inunauna leh inpumkhatna kan vawn nun zel theihna atana HNAM hla tha tak tak min phuahsak thintu, amah Pu C. Durthanga (a nupui fanaute nen, Thuampui Veng, Zawlnuam, Mizoram khawthlang lama inbengbel) hi, ZOIN hian a ngaihsan zia lantirna atan leh chawimawina atan, a hlaphuah zinga mi, Pi Lalrindiki’n kum 2003 Chapchar Kut, kutpuinaa a sak—“Keizawng ka thlang Mizo Val Ngei” tih hi kan rawn vawrhchhuak e.
PS: Pu C. Durthanga chanchin hi “Mizo Who’s Who?” 2005 kuma buatsaih atanga a remchan dana kaihtawi a ni.Ed.
Video Clips lakna: yOuTuBe.cOm
‘RUNTHIM’ tih khi ‘Jail Runthim’ Remsangpuii sak kha anih ka va ring deuh e…., Jail an tan lai a.., Aizawl Theatre Hall ah Handcuff nen a a sak hi live in ka hmu ve tawh bawk.A zai lai in a bul ah Police silai keng in Handcuff hmawr lehlam a vuan a.., tui em em a a zai hi tun thleng hian ka mitthla ah a la awm.Mary Mount School a kan luh lai a ni nghe nghe.Kha thil ka hmuh kha,ka thinlung a MIZO NATIONALISM to tan na ka ti thei hial awm e..,a zai piah lam ah ngaihtuah na mi a siam nasat zia pawh ka la hre reng thin.A lehlam ah Ka nu nau ka Pute-a te nen a Jail tang ho vek an ni nghe nghe….Tiang a C.Durthanga te rawn chawimawi na chang Zoin in a hria hi a lawmawm e..,Mizo site dang ah chuan a vang viau mahna..!!!!
@lone.., i thil hmuh chuan rilru a khawih duh hle tak. I rawn comment tha hle mai.
A hla phuah tam leh tam loh chu thu khat nise, a hla te hi a mawiin, zofate thinlungah hian a nung bik riau vin ka hria.
Lonelygaij sawi ang hian ‘Jail Runthim’ tih a ni. AIR Aizawl hla thlanah khan a lar theih thin em kha…
‘Ka zuam lo kumtluanga jail run thim ngah reng chu
Sual leh thim lal nunrawngte an leng si…’
‘Mizo Val Ngei’ tih hi P.C. Lalthakima phuah emaw ka lo ti reng zawk a!
correction: jail run thim nghah…
“Jail” tih hi Mizo tawngin “Runthim/Lungin/Tanin” a ni mai em? tuna kan ziahlan dan hi a hla Heading ziak dan pawh a ni thei a, hei hi a chanchin ziahnaa inziak dan chu a ni a.
Tin, Lalhlunmawii ZODI hlaah khan “Mahte’n awmkhawhar RUNTHIM hnuai a, lunglaidi ngaiin ka lo vai..” tiin a lo hmang ve bawk. Pi Lalhlunmawii sak hi Pu Zova’n? Falam Lungina a tanlaia a phuah an tia, ka hresual anih chuan ngaihdam ka dil nghal a. Tin, kan sunbjectah hian a dik leh dik lo hawia han tuihnih erawh ka ni hran lo va, hla thuah chuan Jail Runthim te pawh tih a mawi em em a ni.
Lalnunmawia hla D.Thangpui ah khan ‘kan Runthim riai/ruai ka bel lehta nge zanthlai ah’tih kha a hmang tlat a ka hriat chu.Chuti anih chuan Runthim =Jail,sawi nan chuan ..?kan ti deuh……
Zan tlai ah…
Lalhlunmawi (Zodi) sak hla kha a phuahtu chu Pu Biaklara (Pu Bahtea tia hriat) tuna Aizawl, Mizorama khawsa mek “Dingdi Art” neitu Artist khi a ni. Falamah jail/lung in a tan laia a phuah niin ka lo hre thrin.
English thumal (word) tamtak kan Mizo tronga kan sengluh tak a awm a, tuna Jail pawh hi “Zel” tiin an hmang mai a, Police pawh “Pulit” an ti mai a, a thra vio in ka hria. Hlathu ah chuan “Zel Runthim” an ti deuh kher in ka hria.
Padmashri Pi Lalsangzuali Sailo hla phuah “Lalnu Ropuiliani” hla awh pawh “An pai Zel run hngaka fam hnu” a tih mai kha.
Daduhi hla sak sawilan a nih takah chuan he link http://www.zoin.info/mizo/ ahhian a ngaihthlakna a awm a. “ANPAI Jail Run” a tih laia ANPAI a tih hi engnge a awmzia ni ta ang le?
Lalnu Ropuiliani hla in rawn sawi lan takah chuan, ka ngaihthlak hmasak ber tum chuan “an pai zel run nghaka fam hnu” tih lai tak hi ka hre fuh hleithei lo va, a ziak en mai tur ka nei lo bawk nen.
“an pai zel” tih lai tak hi; tawng pai zel (chhunzawm zel) vai ho run a lo nghah sak tawh a nih dawn hi ka ti ta ngawt a.
Upa tawng han hawh ve ila, ka naupan lai chuan Jail tih hi ka hre ve ngai tlat lova. Ka tan chuan kan Bibleah a sawi ang hian tan in emaw, Tahan vela kan sawi thin dana Lung in tih mai hi a fiah zawk a.
Tichuan naupangtein Aizawlah school kala ka awm ve hnuah anni chuan an lo lam Jail (suak pak) ta tal tal mai hi a lo ni a.
Kei pawh a ANPAI lai tak khi ka bo khawp mai…..
Eee, hei zet chu, Lammualah khan ka awm ve tak asin. He hla Daduhin a sa tan chiah hi mipui an rawn pung ta vak mai a, ka slipper thar pawh a chhe thuai nghal tak a:) Sailovan zai pawh ka zu hmu nghe nghe. Ngaihawm leh hle tawh mai a a a a…..