MIZO RABBI AWM VE TA!!

By: Gershon Ralte
Israel fate sakhuana kawnga kaihruaitu, Pathian thu thiam leh zir sang, Israel fate thlarau nun chawikan saktu Rabbi kan tihte hi mi ngaihsan awm tak chu an ni tih chu kan hre vek awm e. Kum tam tak Torah zirna hmunpui Yeshiva a an zir hnuah, Judaism sakhaw zirna thuk ber ber Talmud, Gemara, Mishna, Tanach, Midrash leh Shulchan Aruk, Juda sakhaw dan Halacha chipchiar ber ber an zir hnuah Rabbi atana Ordained niin Rabbi nihna Title hi an dawng thin a, sakhaw lama mipuite kaihruai thei tur khawpa zir chiang leh zir sang annih avangin mite ngaihsan an hlawh em em a ni. Hetianga Rabbi tia koh theih hi Mizo zingah kan awm ve ta hlawl mai a, a ropui em avangin a chanchin tlem kan han ziak ve a ni.

He Rabbi nihna zir chhuak ve ta hlawl mai hi a hming chu Gurion Isaac Sela, Mizoram atanga Israel kal niin January 12, 2009 khan SSC Rabbinical College, Jerusalem Old City ah Rabbi rual ten Rabbi atana Ordain in Rabbi nihna Certificate an hlan ve ta ruau mai a. Ani Rabbi Gurion Isaac Sela hi Pu Eliezer Sela leh Pi Doliani, Aizawl Civil Hospital a Senior Nurse ni thin, tunhnai lawka pension ta te fa 9 zinga a parukna niin J.L. High School a zirchhuak a ni a, Pi Zualbawihi – Pi Lalsangzuali Sailo Padma Shree (L) phei chuan a duhsakin nau ang hiala a en thin a ni.

Rabbi Gurion Isaac Sela hian kum 1993 khan Israel ram thlengin Gush Katif a kum chanve vel an awm hnuah Jerusalem a Hebrai tawng zirna Hebrew Ulpan-ah leh Torah zirna Yeshivaah zir nghalin Pathian thuah a tui chho hle mai a, kum hnih zet a zir hnuah khawel thiam thil neih tel tha tia duhsaktute thurawn zawmin Entrance Test a in ziak tlingin Jerusalem College of Technology – Machon Lev an tihah kum li chhung a zir a, he College a a zir chhung hian ni chanve an zirlai zirin ni chanve Torah, Pathian thu an zir thin a, tichuan, Israel thalaite tih makmawh Israel ram leh hnam venghimtu sipaia tang tura koh niin tah chuan Compulsory service Israel sipaiah kum hnih leh a chanve a tang a.

Israel sipai a tan lai hian Officer course la tura sawm a ni a, mahse, sipai lam aia a zirlai chhunzawm paha Pathian thu zir tha a tih zawk avangin Compulsory a sipai kal hun chhung a kal zawh velah a zirlai chhunzawmin, Pathian thua a tui tak em avangin a zirlai Financial Accounting Final Project a zawh hmain Full time in Or Sameach Yeshiva, Pathian thu zirna hmunpuiah a zir chhunzawm ta zawk a, kumkhat hnuah Shaphels Torah College-ah a in sawn a, kumkhat zenzawn a zir leh hnuah Kolasib nula nupui atana neiin Torah zirna sang zawk, nupui nei chinte zirna Kollel an tihah a zir chhunzawm a, he a Kollel zirna hi Machon HaMikdash Kollel niin Temple Institute ti a hriat lar a ni bawk a, tah hian kum khat leh a chanve a zir leh hnuah Jerusalem Old City a Pathian thu zirna sang, Yeshivat HaKotel an tihah kum thum zir lehin Ner Le-Elef Institution-ah Rabbinical Leadership Training kum 2 a zo leh a, tichuan, SSC Rabbinical College, Jerusalem Old City a hun engmaw chen a zir leh hnuah Exam tha taka kaltlangin Rabbi atana Ordained a lo ni ve ta ruau mai a ni.

Hetianga kum 10 chuang zet Jerusalem Yeshiva tha ber bera a zir hnua Exam tha taka paltlanga Rabbi tia koh a lo ni ve ta hi Mizo History a chhinchhiah tlak a ni ve ngei ang. Rabbi Gurion Isaac Sela hian fanu 2 leh fapa 1 a nei mek a, a nupui fanaute nen hian Jerusalem venghlun tak pakhat, Givat Mordechai vengah an chhungkua hian an cheng mek a ni.