MI RAMAH ZAWNG LUNGLEN A NA E

By: Zalianthang, Tahan
Mizo hnahthlak zawng zawng hi lungleng hnam ti ila kan sawi sual tam kher awm lo ve. Kan pi leh pu hun lai atang tawh khan tlang rama khawsa an lo ni a, khaw khat tlangvalin khawkhat dang nula a va rim thin a, chu lo rengah khaw khata cheng hote pawh lawmahte inruai tawnin tur nipui pawh an do dai thin a ni lawm ni. Nikhat inhmuh lo ringawt pawh kha chhun ni a rei an lo ti awl lo va, an lung a leng thei em em mai a, tlangtin mualtin thlirin an mit an len thin a, chu ta an awmngaihna hre lo chuan hla hmangin an lunglenna chu an lo hritla thin a ni. Amah kan hla pu, Lalzova’n “Ka rawn fang leh hmana kan tuanna tlang” tih hla , a thunawnah khan
Tawnmang em ni , lunglem ka nei lo,
Ka hawi vel a, ka tawng si lo;
Zun leng erawh a cham tanglaiah,
Luahloh lungdi nghilhni awm lo.Ni e, lungleng mi tak tak chu a hunbi a lo thlen chuan an la run bik emaw a tihtheih a, lunglen vanga fam tate pawh kan thawnthuah sawi tur a awm hial a ni. Lungleng kan tih pawh hian tawn dan chi hrang hrang a awm thei bawk ang. A thenin ngaihzawng lamah an rilru an lo sen laiin, khawlang lunglen vanga lo kur nguai nguai tate pawh an awm ang. Thian leh thian avang emaw nu leh pa karah emaw an sawi laiin fanau leh u leh naute ngaih chan a awm chawk bawk ang. A enga pawh chu lo ni ta se la, kan sawi tum ber erawhchu lunglen hrim hrim hi a ni ber mai a.

Hunin a rawn her chhuhpui a ni bawk a, a ni telin changkanna khawvelah kan chuangkai chho zel a, ei leh in a lo harsa ve ta tial tial a, in lum pawh luah hman lovin hmun hlaah pen chhuah a lo tul ta si a. Nupui fanau leh chhungte han kalsan tur chu lung zawng a leng zual dawn tih erawchu hai rual a ni lo vang. Kawtkai atanga chhungte han vai liam hi chu lung lam lam a chhe thei hial thin a ni. Rilru chhungril takah chuan damten kan la in hmu leh dawn a nia tih mai loh chu berisei tur dang a awm thei mawlh tawh si lo. Hmun dang leh ram dang dangah chuan kan han thleng ta ngei a, hapta khat a rawn vei a, thla khat, thla hnih a rawn vei meuh chuan lung hi a leng leng em em mai a, ngaihtuahna a kal thui duh hle a ni. Zan mut dawnah lek phei chuan lunglen zual avanga hnukulha, mitui parawl kuang tate pawh an awm ta ve hial ang. Dem chi an ni lo va, a ho em mai tih ringawt theih lah ni hek lo. Laltanpuia hla ang khan;
Mampui kan hrai- duh-lengte kha an dam thin maw,
Aw ka va han ngai thin teh lul em;
Mampui nang tak pawh kha , i ngaihawm thin a sin;
Lungphang reng reng suh aw, ka lo haw thuai dawn. tia a chham chhuakte pawh kha, a mawh hran lo ve.Tunlai Zoram khawvel deng chhuak hla ropui Rosangliana hla phuah, hla changkim pakhatah chuan’ Mi ramah zawng lunglen a na e’ tih hian a hrilhfiah thui hle maw e. Khawii ramah pawh awm mah ila, mahni in chhete hi kan ngai em em mai a, hmuntin ram tinah Building lian puipui leh chenna nuam takin awm thin mah ila, kan sawi tawh ang khan chhungkimtea kan chenna kan run-inchunga zalen taka awm thlakhlelhna hian min hip na zual a, chu lungkimna hmun kan In, kan ram ngei chu thlen hlan kan ngakhlel em em thin a ni. I rilru awmna apiangah in ro a awm ang tih ang maiin kan hring taksa chu mi ramah awm mah se la, kan rilru erawh hi chu chhungte (kan runah) hnenah a awm reng zawk a ni. Aw…chung Pathianin min veng zel ang a, mi ramah zawng lunglen a na em mai a, lungphang reng reng suh aw ka lo haw thuai dawn e, …….. tiin kan thu hi tlang i’n kawm phawt mai teh ang. Mangtha aw……..