MCF DAY 2010, MALAYSIA

By: B. Zara, Malaysia
Suihlung rualin Zofa leng zawngten,
I parmawi kan tlan e;
Kan inhumna leh kulhbingsang i lo ni,
I thlazar hnuaiah hal loten kan lengza;
An sawi KL khawpui tual nuamah.
Aw, MCF suihlungphang lo la,
Thudik tantu mi huaisen ni zel ang che;
Aw, MCF suihlungphang suh aw,
Lalpan a awmpui zel dawn che….
Phuahtu:  Siamthara

Malaysia & Mizote
Malaysia ram hi August 31, 1957 khan independent a hmu a. A indan atanga rei loteah khawvel ram hmasawn chak berte zingah a tel phak ta mai a, hma a sawn ang bawkin hna thawh tur tam tak a nei a, chuvangin a thenawm hnai leh ram hrang hrang atang mi maktaduai engemaw zatin an pan mup mup mai a ni. Chung ram hrang hrang zingah chuan kan ram Myanmar pawh a bang bik hauh lo mai ni lovin Zo hnahthlakte pawh kan tel ve ta hial mai.

1990 hmalam kha chuan Malaysia-ah hian Chin mite  kan la tlem hle a, keini Enga tawng hmang ngat phei chu kan la awm mang lo a ni. 1990-ah Myanmar Christian Fellowship (Kawl service)  din a ni a, chutah chuan Kachin, Karen leh Chin unau zawng zawngte pawh an tel vek a, tawng chungchanga harsatna avangin 1999 khan Chin Christian Fellowship din a ni ve leh a, chutah pawh chuan Halkha unaute an tam ber avangin  Halkha tawng hman a ni leh a, chuta tang chuan Zomi, Lai, Matu, Mindat, Thlantlang peng, Falam  Fellowship hran hran a ding ta zel a, Mizo Christian Fellowship (MCF) pawh kum 2004 January 25 khan din tan a lo ni ve ta a ni.

MCF Day
Malaysia Mizote hi khaw khat maia cheng kan ni lo va, a then Hmar lam, Penang leh Ipoh-ah te, Cameron Highland-ah te, then khat Chhim tawp Johor Bahru (Singapore hnaih) lamah te, State hrang hrang, khaw dang danga cheng kan ni nuk mai. A tam zawk erawhchu Kuala Lumpur leh a chhehvela (Klang valley) cheng kan ni. Kan chenna a hrang ang bawkin kan hnathawh pawh a hrang a, kan chawlh hun (Off day) pawh a inang thei hek lo. Restaurant leh shoping lama thawkte phei chu thla khatah ni khat emaw chauh chawlte an ni a, Sunday nia chawl thei phei chu kan tam lo hle. Hna thawhna ram a nih angin duh hun huna chawl thei kan ni lo va, chu mai bakah manthei (Permit nei lo kan nih avangin) laka fihlim lo deuh vek kan nih bawk avangin inhmuh khawm a khatin thil han tihho pawh awl lo tak a ni.

Chutiang boruak bik tak karah chuan Kum 2006 khan Day  hman tan a lo ni ta a, MCF hi January thlaa din  nimahse kan sawi tawh angin mi tam zawk hman remchan hun, mantheite (police) pawhin min hriat thiam hun chu  August 31, Mardeka (Malaysia independent Day) ni hi a nih avangin he ni hian kan hmang ta zel a ni. Chutichuan MCF hian kum 6 hmel a lo hmu ve ta a, Day kan hman erawhchu kumin hi kum 5-na a ni ve thung.

Kan hun hmandan tlangpui:
Hun hmandan hi tum hnih kan nei a, tum khatna chu Biak-inah a ni a, chu chu August 29, 2010 Sunday zing dar 9:00 atangin 11:15 thleng a ni. MCF President Pu Hualsailova’n inkhawm a kaihruai a, MCF Pastor Rev. Lalthuamluaia’n “Nang malsawmna ni ang che” tih thupui hmangin a sermon. Pu Lalhmingliana’n MCF chanchin tlangpui a sawi a, a sawi kimin a sawi tawi thiam kher mai. MCF zaipawl a awm a, solo Nl. Gospel Hmangaihi leh Tv. Edentharate hnen atangin kan ngaithla bawk. Tv. Edenthara hian MCF hla Pu Siamthara phuah a sa a, lung a lengin mipui rilru a hneh hle. Thianzaho zai an hit dangdai hle bawk. Inkhawm mi 200 chuang zet kan ni a, inkhawm banah Day lawmna theitui kan in dar dar a.

Hun hman tum hnihna chu infiamna chi hrang hrang leh hnam lam entirna a ni ve thung a, sawi tawh angin August 31, 2010 Thawhlehni  zing dar 8:30 tangin tlai dar 6:00 thlengin Imbi field-ah  kan hmang a ni. MCF Secretary Pu B. Zarzoliana’n a kaihruai a, programe a tam avangin a hman hmawh thei hle. Pu Lalruata Malaysia Mizote zinga upa berin (Kum 60) kum 2010 MCF DAY hawnna lehkha mawi a chep chat a, Pu Biakenga Vice President a tawngtai. President-in  thukhawchang a sawi a, khualian Rev. Chuangsangvungate nupa hnenah thilpek hlan a ni. Kumin MCF Day tihlulehzualtu chu Rev. Chuangsangvungate nupa (Yangon) Day hmang tur ngata an lo kal hi a ni.  Mizote inpumkhatna hlapui sa chung zela Krista tana rawngbawltu rinawm tak an ni a, an thahnemngaihna mittui chuan Zofate inpumkhatna tha tak a la hring ngei ang. Kan khual lian hian  Fuihna thu tha tak a sawi a, a chhinchhiah tlak  hle.

Zawlkhawsir (Keini chuan Zawlkhawsir lam kan ti)  nula tlangval mi 30 rualin an lam a, Malaysia khawpui, kan ram ni lo, kan tawng leh kan sakhua pawh inanna nei map lo, sawrkar dana man vek theih ni chung si a, hetiang taka hun kan han hmang thei hi a mak tih loh rual a ni lo. Nula Tlangval hnamthuam mawi lutuk maia inthuamin a han lam siau siau  chu ropui tak a ni. Chu chauh a ni lo, Sarlam kai pawh mi 20 velin an lam bawk a sin, sawi mai ai hian a ropui a ni ber e. Ball inkhel tur pawh Team 8 teh meuh kan tling a, kan inlungrualzia te, kan tanrualziate kha kan sawi hmaih phal hauh lo vang.

Inbuatsaihna:
Hruaitute chuan “Foot-ball Team 4 chauh siam nise, hnam lam pawh Zawlkhawsir lam kan puitlin theih chuan a tawk mai,” kan ti a ni a. Mahse kan ruahman lawk loh ang hlirin thil a awm chho ta zel  a, chu chuan kan inpumkhatna leh kan thawhhona a tha tawk tih a lantir kan ti thei ang. Lam pawh a hma thlakhat kal ta atangin zir tan a ni a, thalaite an phur em em a, hnathawk hah tak tak chungin zantin dar 11:30 thlengin an zir thin a, hetiang taka kan thalai rualte an phur hian min tihlim a,  Day kan hman hma atang rengin kan hlawhtling kan ti lo thei lo. Kan hnam lamte kan hnam thuamte kan ngainat tlat chuan kan hnamah hian kan chiang tihna a lo ni reng mai.

Infiamna lam pawh kan inbuatsaih nasa hle a ni. Veng 8 atangin kan tel thei a,  chungte chu (1) KL (2) Pudu (3) Kepong (4) Penang (5) Tumbuk (6) Cameron (7) Johor Bahru (8) Port Klang-te an ni.  Foot-ball player ringawt pawh mi 200 dawn lai kan tling der mai. Vengtinte inbuatsaihna a tha em em a, an fakawm tak zet a ni. (MMC Pudu leh KL MCF an final a, KL MCF an chak ta a ni)

Infiamna chi hrang hrang kan ruahman nual a, mahse duhthusam erawh chuan kan hmang kim thei ta lo va, Vengtin hmeichhia hrui inpawh, Lungden, Fei khawh, Intlansiak (Naupang/ Hmeichhia/ Mipa) Thuizawng/ Sangzawng inzuan siak (Mipa) Nula leh Nuho balun thutpuah siakte kan hmang thei a, mi tam tak beisei angin hmeichhe lam infiamna kan ti tam thei ta lo va, pawi kan ti khawp mai.

Khawilam atang nge mipui hei zozai:
Malaysia Mizo Fellowship-te hi Kalay-Kabaw lam mi an tam ber a, a dawtah Chin hills lam an ni ang. Mizoram lam mite pawh an awm nual a, Yangon, Mandalay leh Shan ram atanga lo kalte pawh an awm ve bawk. Kum 2004 MCF a din ni khan mi 16 chiah an inkhawm a, 2005 khan  mi 500 vel an tling tawh angin sawi a ni. Tunah chuan mi 2,000 kan chuang tawh ngeiin kan ring a,  Day-ah hian mi 700 vel kan kalkhawm angin kan journal-te chuan an sawi. Inchhiar dik a har avangin hmuh dan leh hriatdan a dang mai thei. KL MCF Sunday inkhawm hi chawhrualin mi 150 kan ni thin.

Thulakna: Huivalenthiamgroups-mail, B. Zara