Malaysia Zofate Dinhmun

By: Lalpekthara, Malaysia
Malaysia hi South East Asia hmun laili tak ah a awm a. ASEAN (Association of South East Asian Nations) member a ni. Khawchhak lam; Sabah State, Sarawak State leh Federal Labuan awmna lam khi East Malaysia tiin an ko va. Khawthlang lam; Johor State, Kedah State, Kelantan State, Melaka State, Negeri Sembilan State, Pahang State, Pulau Pinang State, Perak State, Perlis State, Selangor State, Terengganu State, Federal Putrajaya leh Federal Kuala Lumpur awmna lam hi West Malaysia tiin an ko.

Chutichuan Malaysia ah hian state(13) leh Federal Territories (3) an awm a ni. Mihring maktaduai 23.26 an awma, Malay 58.1%, Chinese 24.3%, Indian 6.9% an awm. A dang 3.2% chu Sarawak leh Sabah state lama cheng, a ram nei tu hmasa (Iban, Bidayu, Kinyah, Kadazan, Kelabis, Murut, Bisaya, Melanou leh European thlah pawlh) te an ni. 31 August 1957 ah independence a hmu a, 9 August 1965 ah Singapore hi Malaysia Federation atangin a indang. Prime Minister hmasa ber chu Tunku Abdul Rahman Putra Al-Haj a ni.

A ram tawng Bahasa Melayu bakah Chinese(Hokkien, Cantonese, Hakka, Teochew, Hainanese) leh Indian (Tamil, Telegu, Malayalam, Punjabi, Hindi, Gujerah, Urdu) te pawh an hmang. A ram sakhua chu Islam a ni a, Christianity, Hinduism, Buddhism, Taoism leh Sikkism sakhuate pawh a awm. Eng sakhua pawh zalen taka biak theihna ram a ni. An pawisa hi Ringgit Malaysia (RM) tiin an ko va, cheng notes RM 1000, RM 500, RM 100, RM 50, RM 20, RM 10, RM 2 , RM 1 te an nei. A ram sana hi GMT aiin darkar 8 in a hma.

Zofate : Malaysia ah hian ram dang mi nuai 30-40 vel an cheng a. Chumi zingah nuai 22 te chu sorkar phalna lehkha nei an ni a. Sorkar phalna nei lova cheng hi nuai 10 chuang zet an awm. He mi nuai 10 ah hian nuai 1 vel chu mahni ram sorkarah harsatna leh hlauhna an neih avanga rawn tlan chhia an ni a. He mi nuai 1 zingah 40000 zet chuan UNHCR registration an hmu tawh . UNHCR registration hmu tawh zingah hian 80%-90% chu Burma ram atanga lo kal an ni.

Malaysia ram ah Zofate hi eng zah nge awm tih hriatchian a har hle.Chiang deuh va kan chhui theih dan ber chu ACR, CRC ,FRO leh MRO member list record atangin a ni a. CRC ah hian a dintirh atanga 4/6/08 thleng khan membership card siam tawh zawng zawng hi mi 25112 chiah an awm a. Chutiang bawkin ACR ah 9680, FRO ah 760 , MRO ah 486 an awm bawk. A vaia kan belh chuan 36038 a ni a, hei hi kan chhuichian theihdan ber a ni a. Heng zingah hian “Third country” kaltawh tam tak an awm a, kawng lehlamah chuan he tianga membership card siam lo hi tam tawk tak an awm bawk awm e. Chuvangin Zofate hi 35000-45000 vel kan awm ti ila a sual loh hmel. Tin, Malaysia a Mizo hnathlak awm kan hriat theihte chu Falam, Halkha, Asho Chin, Kanpelet Chin, Lautu, Cho, Matu, Mara, Paletwa Khumi, Siyin, Tonzang Lawm, Teddim, Zo, Zotung, Zophei leh duhlian tawng hmang Mizo te an ni. Malaysia Zofate zingah hian Halkha an tam ber a, Tedim, Matu, Zotung, Zo, Falam, Mindat leh Lautu te hian an dawt thla niin a lang.

Zofate Dinhmun
1. Chenna in leh eiin lam
KL khawpui bakah State hrang hrangah an cheng darh. Sorkhar phalna lehkha nei lote pawhin a ram mi leh sorkar thatna avangin in hi an luahhawh thei zel a. KL khawpui laili ah chuan in luah man a to hle. A flat-a hawh chuan thlakhatah RM 1500 – RM 2500 vel a ni tlang pui. Pindan pakhat, mi pathum vel chen theihna hi RM 300-550 vel a ni. Khawpui pawn leh hmun hla deuh ah chuan a tlawm hle thung. Mahni ina eirawng inbawl theite chuan thlakhatah mi pakhat tan RM.80-RM.140 vel in a daih thei. Chawdawra ei chuan RM 200 vel a tul thung. Eiin lam hi chu khawpui leh khawte ah senso a inthlau lo. Work permit nei lova hna thawk tan hna nghet neih a harsat avangin chenna in pawh hna awmna hmun hnavaia in sawn kual chhen a tul thin.

2. Hnathawh
Work permit neia hna thawk hi 30% vel bak an awm a rinawm lo. 70% vel hi chu Work Permit (passport) tlansan tawh emaw short visit visa a lo kal leh hnuailam kawnga lo kal te an ni awm e. Work permit-a hnathawk te hi an hlawh a tam vak lo na a, cheng an nei thei zawk. Illegal (Kosong an ti mai) a hnathawk te hian hlawhdawn loh emaw thil ho tea hna atanga bantir an tawk duh bik. Thla hlawh hi RM 600-RM 1200 inkar vel a ni deuh ber. Hna nei lo hi 10-20% vel an awm deuh reng a. Hna zawnsaktu agent rawih man RM 100-150 vel an lak thin chu pe thei lo leh ei tur pawh nei manglo an awm thin. Hna neitu (Boss) tam tak hian work permit nei lo (Refugee) te hi an khawngaihin chhawr pawh an duh hle thin a, mahse sorkar hlauhna avangin harsa an ti ve a, chutiang chungchangah chuan Refuggee lam hruaitu te hi an berawn fo thin. Tunah hian refugee te hnathawh phalna pe turin MWG (Migration Working Group) chuan sorkar hi a nawr mek a ni.

3.Sakhuana
Malaysia Zofate hi Kristian an nih avangin mahni tawng theuhva Pathian biak theih an duh a. Christian fellowship an din thliah hlawm a. A rammi kohhran biakin awmsa te hmanga inkhawm an awm a. In, a flat tawpa hawha biakin atana hmang an awm bawk. Pastor te pawh ruai in sakhaw hun pawimawh leh serh leh sangte pawh tha takin an hmang thei. Mipui te’n Kohhran tak tak ang maiin mahni fellowship theuh hi an ngaina a. Fellowship Pastorte leh hruaitute pawhin an memberte an ngaihsak tha hlawm hle. Member te’n 1/10 pek nachangte pawh an hria in an uar tan hle tawh a, Fellowships leh a memberte inkar boruak a tha hle.

4.Nungchang
Zial man a to a, a mamawh tak tak lo chuan an zu lem lo. Zu pawh hi an lo chhuahna rama an in tluk chuan an in tawh lo a nih hmel. Kawlrama zu in regular tak, helaia in tawh lo hmuh tur an awm nual. Sex lamah pawh an fel tlangpui. Tlangval khawhar “Tiga Pulu” (RM 30) man, kawm ching pawh an awm tawh meuh lo a nih hmel. A ram sorkar manmite hlauhna leh Pathian tihna avangin mi vengva deuhte chuan chutiang mi chu an kawm serh hmiah tawh.

Zurui, khawlaia insual bung bung leh kawngsir, mi bathlar vela mu kual mai mai pawh hmuh tur an awm tawh lo a tih theih. In mi te pawhin changkang taka in dan, cool raiha hmuam dan an thiam tawh.An feel thiam tawh. Zo tuibur hun kha an kalsan daih a, coke hunah an leng tawh.
Tin, Zofate nungchang humhalh turin Chin Disciplinary Action Committee (CDAC) pawh Date 27/12/2007 khan din tan a lo ni a. KL khawpui, Block 20 ah volunteer members 300 nei in hma a la mek a. Kum 2008 ah Zofa, zilhhau ngai an tlem sawt tawh dan hi en mah teh, a lawmawm ngawt a sin.

KL Block thenkhata zilhhau (vuak, hrem etc.) tawh te;
Feb.-March April May
1. Jalan Imbi 55 8 16
2. Jalan Ipoh 5 1 -
3. Cheras 5 1 -
4. Puchong 2 2 -
5. Loke Yew – - 1
6.Alor – - 1
7. Pudu – - 1
8. Kajang – 1 -
9. Loke Yew ( D’Boss ) – 2 -
Total 67 15 19

5. A Raltit dan
Kum 2007 January- August ni 1 chhung khan RELA ( Ikatan Relawan Rakyat) in operation vawi 3,925 a bei hman a, mi 45,502 an man. Operation tum khat zel ah RELA member 200 vel an thawkchhuak a,chutiang atan sokarin tum khatah Rm. 25,000 vel zel a seng a ni. Malaysia rama lungin (prison) leh tanin (detention centre) zawng zawng ah hian belhkhawmin mi 30000 leng thei tura din/sak a ni a. Chutih lai in August 2004 ah khan 42,284 an tantir a. A leng tawk aiin 10000 in an tam. May 2005 ah phei chuan 45000 an tantir a, a tam ber chu phalna lehkha nei lo(non-documented migrants) an mante an ni.

Thailand leh Burma mi te chu Thai-Malaysia border ah an thawn hawng thin a. Burma mi te chu immigration offcial ten mihring hmanga sumdawng (human smugglers/ traffickers) hnenah an hralh thin a. Chung mite kut atanga intlan chhuah lehna tur leh Malaysia ram chhung luh leh theihna atan RM 1400-2500 a tul a. Chutianga in tlan chhuak thei lo te chu sangha man lawngah te, hmeichhia an nih chuan nawrhchi zawrhna hmun ah te, a lei duhtu mimal hnenahte an hralh chhawng mai thin. Kan hriat theih china an thawnhawn tawh zawng zawng hi 137,000 vel an tling tawh a, chung zingah chuan , an thihphah ngei a ni tih hriatchian theih ngat pawh mi 60 aiin an tam tawh. Tun lai hian UNHCR- recognized refugees ( UN hmutawh ti mai ila) hi thlatin in chawhrualin mi 700-800 hi lungin leh detention centre ah an tang reng a.Chung zinga 100 vel zel chi naupang an ni. Kan han tarlan tak atang hian Malaysia zofate dinhmun ral titdan chu a hriatthiam theih awm e.

6. Hriselna lam
Malaysia hi ram hrisel tak a ni. hritlang, awmna, khawsik leh natna neuh neuh a tlem. Malaria, dengue,kawthalo leh inkai chhawn theih natna tam takte hi sorkar damdawiin ah a thlawn in an enkawl a. Damdawiin ah ramdangmi te hi passport nei pawh nei lo pawh a ram mi te aiin a let hnih in pawisa an la thin. Private clinic ah phei chuan a hautak leh zual a. Sorkar damdawiin ah chuan refugee card entir theite chu 50% discount an pe thin.

Zofate leh kawlram mi refugee te chu ACTS ( A Call To Serve) clinic ah RM. 5 chauh sengin a in enkawl theih a, a lawmawm hle. Natna khirh deuh leh exam uluk tul deuh te erawh chu clinic dang leh hospital ah te an kaltir thin a, an ni’n an refer chuan 50% discount an hmuh bakah UNHCR registration hmuh theihna chance pawh a awm thin. Raipuar in enkawl theihna MCH (Mother and Child Healthcare Clinic) , UNHCR nena inhriatthiamna nei hi hmun (21) ah a awm. Jalan Hangtuah a MCH hi an pan nasa bera, in enkawl zingah a rammi te chu an awm zeuh zeuh chauhva, Zofate deuh vek an ni thin. Clinic hnathawktute pawhin Zofate hi naupai an va tam em!! an ti hial a ni awm e.( Aigupta rama Israel te kha in tehkhin lo ila.)

7. Tanpuitu
Malaysia Zofate hian tanpuitu pawl chak tak tak te an nei a. An zalenna leh an chanpual hum halhsakna kawnga hma latu NGO kan hriat chian theih pawh pawl 23 zet an awm. Heng pawl 23 insuihkhawmte hian Migration Working Group (MWG) hming invuahin thahnemngai takin hma an la a. Malaysia sorkar Parliament ah lehkha te thehlut in leh anmahni ngei pawh kalin thil pa (4) an dil a. (1) Refugee te man, hrem, vuak, thawnhawn te bansan turin (2) Refugee status pawmpui a, refugee te hi humhalh leh tanpui zawk turin (3) UNHCR hnenah detention centre leh lungin tlawh phalna pe a, refugee an nih dan te belchiang thei tura phalna pe turin (4) UNHCR lehkha, Card-te hi recognise-a, chutiang neite chu man lo turin. Chutiang thil te chu dilin 22 May 2008 khan Parliament House ah press conference hial neihpuiin beihpui a thlak tawh a ni.MWG chuan, “ Lungin tangte kan leh asylum dil duhte va kawm phalna, Malaysia sorkar in UNHCR a pek loh hian khawvel pumhuap hringfate chanvo humhalhna danpui ( universal right in international customary law ) hi a kalh tlat a ni” an ti.

Malaysia Zofate ti nihlawhtu ber chu UNHCR (United Nation High Commissioner for Refugees) hi a ni. A register atanga kum 1½ – kum 2½ chhung vel ah ram thumna ah a thawn chhuak tlangpui a. Chung ramte chu USA, Canada, New Zealand, Norway, Denmark, Sweden, Australia te an ni a. 2008 atangin Czech Republic ah pawh thawn theih an tum bawk.

Kan thu tih tawp nan 16 January 2008-a meeting pakhata UNHCR offier thusawi hi thlir thuak ila, “Kum 2007 chhung khan mi 5250 kan register a. Chungmite chu Vulnerable Case ( bawihsawm ngaite ti mai ila) hmangin a ni a. Chu case chu man tawk leh lungin tangte, raipuarte, hriselna tha lo te, nu leh pa nei lo naupangte an ni. Chung naupangte chuan a then in an kum an zep a, nu leh pa nei lo anga insawi kha kan register hnu rei lo te ah an nu leh pa, an unau te an rawn hruaia , register an rawn dil thin a. Damdawiin lehkha lem te, mahni leh mahni police inmantir te an rawn awm ta chiam a. Vawiin thleng hian mi 35000 chuang zet kan register tawh na chungin kum tamtak Malaysia rama lo awm tawh, refugee ni ve tho si, hrisel leh hna tha taka thawk, la register loh tam tak an la awm tih kan hre bawk a. Chu chu a fair em? Engtin nge kan tih ang? tih pawh vawi tam tak kan ngaihtuah thin. Dik tak chuan, refugee zawng zawng hi register kan duh a ni. Nimahsela, Malaysia sorkar dan leh a dinhmun te avangin kan register thei vek lo che u hi pawi kan ti. Tin, mitinte hi register vek ri ngawt mah ila a kotu ram in an kohsen si loh chuan awmzia a nei dawn em ni ? Chuvangin a kotute koh theih zat leh thil awmdan hrang hrangte thlir in kan register thin che u a ni.”

Sawiho tur:
1. Mizo te hi kan unau Zohnahthlak dangte ai hian Malaysia ah kan tlem hle a, a chhan eng nge ni ang? Hei aia tam hi awm turin kan in duhsak em? Engtia tih chi nge ni?
2. Tun ai hian 1/10 pe kan tam theih nan engtia hmalak tur nge?
3. Nawhchizuar kawm that lohzia sawi tur hria kan awm em?
4. Kan unau dangte aiin zuruih thiamlo kan tam zawk em? Engtia tih chi nge ?
5. Hna neilo te hi engtin nge kan in zawnpui theih ang?
6. Zofate kan in pumkhat deuh deuh theihnan eng nge kan tih ang?

Thulaknate;
1. Information for Parliamentarians Relevant to the Treatment of Asylum Seekers, Refugees and stateless persons, 22 May 2008. Produced by the Migration Working Group.
2. Migration Working Group Appeal: Protect Asylum Seekers, Refugees and Stateless Persons from Burma(Myanmar) ,22 May 2008.
3. ACR Vice President ( 2008-2009) .
4. ACR Weekly News, 25 May 2008
5. CRC Secretary ( 2008- 2009) , CRC Clerk.
6. CRC Weekly News, 20 Jan 2008
7. CRC Activities Report in 2007, Kuala Lumpur.
8. CDAC President ( 2008-2009)
9. Book : A brief information about Malaysia, written by Steven Zar Khaing.
10. Personal notes and survey from Websites.
Source:mizokhawvel