Literature hi Engemaw A Nih Le ?

By; Addie-pa, Melbourne
Kan Zopa chhuanvawrte zinga mi Pu L. Keivoma chuan khawvel kalhmang ngun taka a ngaihtuahin, “ Kan hmuh thieh aiin hmuh theih lohte hian chakna tha an ngah zel niin a lang”, a ti a. A dik viau awm e. Lungtum kan hmuh theih lian pui pui te ai hian mita hmuh tham loh Atom te lutuk puak keh chu a let sang tam takin a thawk na zawk daih a. Chemsen len mite aiin thu thiam miten mi thinlung an hnehin ram an la zau zawk fo bawk thin a ni. Dr.Laltluangliana’n “ Mi thiam leh thu ziak mite hian tuma chhuhsak theih loh ralthuam an kawl” a lo tih angin, thu hian chakna a nei tlat a, hmuh theih loh hmanraw hriam berte zinga mi a ni.

China mipui nuai tam tak Communist a siam turin Mositungan thu hmangin a bei a, a zirtirna chu lehkhabu tam taka siamin a tlawm thei ang berin a theh darh a. Literature hmangin ram a la duai duai mai a ni. Mizo ten Literature kan tih chu ‘thu leh hla’ emaw ‘Ziak leh chhiar’ emaw a ni a, Dr. Laltluangliana chuan ‘thu hla ril’ an ti deuh kher nghe nghe a; chu chuan a ziak lam chauh ni lovin a chhiar te, thu bakah a hlaa sak theih chenin a huam a ni. Chumi kawlawm thai kawi tute chu ziak mite hi an ni. Thu leh hla hmangin min khalh kual vel thin a.

Thuziak hian ram a la chak thei hle. Bible thuziak ringawt pawh hian ram a lak chak zia chu Communist ruh tak ram pawh Democracy-ah an inlet a. Russia, Communist tluk chhiat hnu kum hnih chhung lek ( 1989-91 ) pawh khan Bible copies vaibelchhe 11 chuang an hralh hman niin an hria a ni. Chuti taka literature a pawimawh a vangin ziakmi kan inchherchhuah hi a tul hle a ni. Mahni vei zawng leh rilru puak chhuak ringawtah duhtawk mai lova, thalai leh mipui chawm thei thuziak hi kan mamawh reng a.

Chuvangin, thangthar mi thiam lo chhuak turte hi ziak mi-a lo chher chhuak zel tura tan kan lak a tul a. Kan ziakmite pawh hian mipuite chawhharh kan ngai a ni tih hriain lehkha chhiar hlawkna te, literature leh ziakmite pawimawhna hi tlangaupui fo thin sela, kohhran leh khawtlang pawhin kan lo ngaih pawimawha, tan kan lak tlan zel chuan tun ai hian zofate khawvel hi a zauin a nuam ang a, hma kan sawnin kan chak phah ngei ang le.
Source : Mizo Ti Ti