By: Zalianthanga, Tahan
Tunlaiah incheina a lo changkang chho tial tial a, hmeichhe lam pawh hian mite hip thei tur zelin style hrang hrangin an inthuam tawh ber a. An mawh lem lo ve. Mipa thenkhat chu hum sual an dai fo mai . Khawvel mipui thenkhatte kan thlir pawhin hriat tur leh sawi tur an awm ve nual ta mai.

Keini tlangmite pawh heng thilah hian kan fihlim bik lo hle mai. Pawngsual hriat tur an awm nual tawh a, Pastor nupuite meuh pawh an bang bik lo. Hengah hian mipa nge thiam lo va, hmeichhia tih pawh hriat a har ta hle mai, A enga pawh chu lo ni ta se la, a hmei a pa hian kan fimkhur a ngai tak meuh a ni.

Pawmlai nei mipate chu an sumtual atanga an chhuah ni hian an tlangval nghal mai a lawm’ tia an fiamthu pawh hi hmun thenkhatah chuan a lo dik hle mai. In lamah nupui fanauten thifahnukchatin hna an lo thawk ve tak tang tang a, ei leh in chungchangah lah ni se, a inren thei berin leh sum haihchhamin an lo khawsa tan naw naw a. Pa berte chu ram dangah awmin nupui fanaute chawm nan tiin kawla ni chhuak chhiarin an thawk ve tho mai. Amaherawhchu hlawh tlem azawng an lak chan hian nawmsitbawl nan mai an lo hman ta thin a ni awm e.

Heng thilah hian mipa nuawlpuite chuan zu an intlangpui ta a, insumtheihna an lo tlachham ta a, an zauthauin an sihhnip ta thin a ni. A khur thuka lutte phei chuan hmeichhiate nen khawvel an chen a ni
ber mai. Ram danga an thlen hlim chuan an inren a, pawn lam pawh leng chhuak lem lovin sum leh pai an ren mai mai thin a. Amaherawhchu thla tam a lo vei hnuah chuan ngaiah an lo neih ta a, khua an lo hawi zauin, sum lamah leh mit tlainalamah an lo zalen chho ta tial tial a, a tawpah phei chuan an tawng sang thei ta hle thung a ni.

A ni telin a lo rei chho ta zel a, chhungten an beisei ang ni loin sum leh pai pawh an thawn hlei thei ta lo a ni. A che sual pirpak deuhte phei chu an khuaa an hawnna tur sum hial an chhungte an chhah ta thin a ni.

Kawng leh lamah thlir leh tai la, mahni pasalten ram hlaah khawhar leh hnuaichhiah tak chung siin hna an thawk tang tanga, an thieih ang tawkin an chhungte pawisa an thawn chamchi a, nupuiten inren mang hlei
lo hian an hmang ta purpur mai a, chu chauh a la ni lo, pasalte awm lo na na na chu an lo zalen ta bawk nen, mipa dang kawp chakna a lo lian a, thenawmte mit tikham khawpin an lo awm ta pawh sawi tur an awm a ni ang. A pawi hle mai.

Heng a chunga kan sawi takte hi khawvel hmun dangah pawh an lo tawng ve tawh thin a, keini zingah pawh hian a tawng ta pawh an lo awm tawh mai thei a ni. Tumah tihchhan bik kan nei lo va, thil awm thei kan
sawina a ni ber a. Heng lakah hian kan invawn thianghlim a, kan insum a pawimawhzia kan sawi landuhna mai a ni e.