By: Valtea, Australia
Tuikhawhthla chu kan hmu fo thin awm e. Mahse, kei ka hmuh ve erawh chu Leikhawhthla a ni tlat! Ka hmu mai ni lovin , tlema tlemah mi delh lo chauh hian a rawn sabereka khuang kaih thut a. Lu tiat tiat lung hian kham sang tak atangin mi rawn deng fua fua a, a hnuah chuan thlam tiat tiat hi ka sir lawkah an let rum mai a ni.
Tullamarine Airport atangin zanlaiah min thlahtu thian thate nen kan invai liam a, Malaysia-ah ni khat kan len kual hnuin Mumbai kan pan leh a. Kar khat kan cham hnuin Aizawl kan pan ta a. Chuta tangin Manipur lamah kan tlang leh a. Chutia chhungkhat laina kan tlawh kual leh hnu chuan ka lo vei reng thin Mizoram fan chu ka tan ta a. Ka lungkham ber chu Hlakungpui Mual fan a ni.
Mizoram, Khawbung Sout-a Hla Kungpui Mual an sawi fo thin chu tlawh turin ka nu nen kan inbuatsaih a. A buatsaihtute zinga a hnarkai bertu Pu B. Lalthangliana’n engkim mi duan sak a, Khawbung lama min lo hruaitu turte pawh ruatsa vekin, kan fan tur Mizo history-a hmun pawimawh dang dangte chu a map kan nei vek tawh a. Ka ngaihsan em em Hranghluite lungphun chu a takin ka hmu ve dawn ta tiin ka hlim ru em em a. Kan thiannu nau Aw-pua leh a nau Journalist Ngura chuan phal em emin an car mawi tak Scorpio chuan min hruai a. Aizawl, Chinga veng atang chuan Champhai lam pan chuan kan chhuak ta a.
Kawngah petrol kan thun hnuin rei loteah Zemabawk tlan pelin , tawngtaina hmun kan thleng a. Ka nu a tawngtai zawh chuan video tlem kan la a, tlangram kawngkawi zui chuan kan tlan leh ta a. Ka ngaih em em thin Zoram tlang dung vel chu ka thlir ning thei mawlh lo, ka ram nihna chuan mi hip leh zual a. Pi leh pu te tual lenna sulhnu chuan ka lung a len a, englai mahin ka nghilh ngai lo.
Eng eng emaw ei leh intur kan kente chu ka lo buaipui neuh neuh laiin tawng ri nawk nawk ka hria a, kan dak chhuak chu flag sen te takte lo vaitu nu leh pa pathum vel chuan min lo dang hi a lo ni a. Kan motor khalhtu chuan hrethiam lawk loin tlem a kalpel a, min rawn um leh hlawk hlawk a. “Ding rawh u, Lei a min! Let ru! Let vat rawh u!” tiin an au chuah chuah mai a. Kan hma lawkah chuan lung chu a rawn sur nauh nauh mai a.
“Tlan ang!” tiin ka rak thawt a, car hawn leh tlan chhuah chu ka rual nghal a. Ka bawk thlawrh a, abiling abalanga ka tlan hnu ka hawi let a, kan nu chu a lo tlu reng a. Lungpui leng noh noh karah chuan ka va let leh zawk a, pa pakhat hian a lo kaitho chiah a, a kutah ka kai lawp a, hmun him lamah ka tlan chhoh pui ta a. Kawngkawi, a him chin kan thlen meuh chuan kut leh ke chu a thi hnuang tawh hlawm a. Kan motor pawh a rawn back chu lungpuiin a lo dang a, hma lamah tlem a kal leh hnu chuan him takin a rawn let ve mai a. Video camera-te kan phawrh a, muang marin kan han la kual a. Lei chu tlem a tla leh ser ser thin a. Driver huai zual deuh pathum vel chuan lei min a reh lai tak chuan him takin an pal tlang hram a. Thihchilh tul khawpin an hna chu a pawimawh angem tih erawh chu sawiho tham tak a ni.
Thawk leh khatah le(h)! Kham hmawr, tlang chip atang chuan lei chu a rawn baw hawk hawk mai a. Tui khwh thla aimaha mawi hian a rawn inkhawh thla zar zar mai a. Kawngpui zawl chu chhilh khatin kham hnuai lamah chuan a khawh thla leh a. A ri hum hum mai a, kan awmna hmun pawh chu a nghing deuh dar dar a. Mipui thlirtu zawng zawng chu an au dual a. Lei minin kawng a chim chin ringawt pawh kha feet 80 lai a tling hial.
Khuarel leimin leh fur tuihawkin a lak avang a minte hi chu tihngaihna vak pawh a awm lem lo a ni thei a. Mahse helai hmun kher hi chu Quarry a ni a, Rawra lakna a ni miau a. Mithiamte hian enkawlin vengtu awm thei se, hmun himah a chang thei mai awm si a. Mawhphurtu an awm thlawt lo em ni ang? Lunglum hlau reng rengin mipui kan thlabar mai dawn niin a lang. Kan tum lam hmun chu beidawng tak leh lunghnur takin kan kir san leh a. Khawchhung kan luh chuan ka ke chu clinic pan pui a that an ring a, tul ti vak lo chuan kan pan ta a. Thisen lum a daih hnu meuh chuan ka malpui zawk chu a lo na phian mai a, hlau leh khur chunga tlan ngang kha ka ni bawk a, tlukna lamah lung ka lo delh ni awm tak a ni.
Zoram khawvela thu leh hla thiam kan miropuite, Zoram tihlutute kha a takin hmu phak lo mah ila, an thlan tal tlawh a, ngaihsanna chibai ka buk hma chuan thinlai dam thei hian ka inring mawhlh lo. Khuanu zarah dam te’n kan awm ang a, Zofate neih chhun miropuite zalna, Fam Rolung Mual hlu tak mai chu him tak leh tluang takin kan la thleng ve ngei ang.
Source: Mizo Ti Ti Vol.1 Issue. 5
