Articles Comments

» Music Videos » Leikapui Nite (Video clips)

Leikapui Nite (Video clips)

By: Puibawiha
Philippines

Naupang te mah ni ila mizo hla hluite hi ka ngaina ve em em thin a. Mahse he hla, “An lungleng ve ngei ang” tih hi ka lo la hre ngai lo tlat pek a. Nikum lama Zonet-in Mizo Idol thlanna a buatsaih tuma R. Lalhmangaiha (fam) sak a tang chiah khan ka lo hre ve a. He hla hi nalh ka tiin a thu hian ngaih bik sawi tur ber pawh awm chuang si lo hian ka lung a ti leng ve tlat pek a. Rilru ngaihtuahna erawh chuan naupan laia Sangha thliar laite, sai hlum hrual lai velte, tleirawl hnuah erawh chuan inkhawmpui vel leh picnic lai vel te leh ngaihzawng neih tan chhoh lai velte pawh a dap kual vel ve a. Chutiang zelin theih tawktea Lalpa rawngbawla camping hun lai vel te pawh ngaihtuahna mitthla chuan a hrut kual vel a ni ber mai.

watch?v=RYIFKYRfF2M
An Lungleng Ve Ngei Ang
Awmkhaw har changin ka dawn vel thin a,
He hring nun par ang vul lai nite;
Mual min liam san thin kan hlim ni ten,
Hmanlai an chang zo nghilh a har ngei.
• Lenrual duhte nen hlim tein zai tin kan vawr lai kha,
Ka ngai thin e thiante kha kan lenna a dang zo ta si;
Ka hming an hriat chhuah changing kan nun dan thin an dawn kir ve anga,
An lungleng ve ngei ang.
Han hawi vel hianin tlang tin dam diam,
Thal romei zing riai lenkawl eng leh;
Chhemdam thlifim leh thing hnah nem ten;
Nungcha hram thiam ten min ngaihtir thin.

Tin, a hla thu leh a thluk mawlh mai hi a inmila, ngaihthlak a hahdamin, ngaihtuahna chhungril a kaitho veng veng mai a ni. Chu mai bakah a phuahtu hian a hla thu a vuah rem nalh hle mai a, uluk tak maia a chang hnihna a han remkhawm dan hi a nalh thlawt a ni. Pathian thilsiam (nature) mawina lunglen thlak tak maia a han rem khawm hian, kan zoram tlang, dung leh vang, sik leh sa nuam tak leh mawi em em mai hram thiam sirvaten an awih nin loh chu mitthlain min thlirtir a. Chutiang boruak nuam tak kara khawsaa inngeih dial diala lengza thinte, lenna tlang a lo dan meuh chuan lung a lenga, thian hluite leh nunhlui dawnkirin “An lungleng ve nei ang” tiin zai kan vawr ta veng veng mai thin a ni.

Zanin chu engvang teh reng emaw he hla rawn vawrh lar thar lehtu nikuma mizo idol top 8-na R. Lalhmangaiha (fam) hmanni lawka fam changta puala Leikapui Nite ka thlira, hetianga kan zaithiamte’n hma taka min boralsan hi an uihawm ka ti hle a. Hmanah Lallianmawia Pachuau pawh kha a lar vanglai takin a borala, a hla sak dan leh a hla kal phungte kha ama style ngat a chher a nihna te kha a ngaihsan awmna lai a tling a ni, Han dam rei deuh sela zofate tan hla tha tak tak min hnutchhiah teuhin ka ring.

watch?v=PKSD9s09K1I
R. Lalhmangaiha thlahna Leikapui Nite-a zai zingah Pensy& BKa, leh Vanlalsailova te hla sak hian mi a hneh hle mai. A hun leh a boruak hian a zir bawk a, a bik takin Pensy-te hla sak hian lusun chhungte thinlung chu a khawih hlein ka ring. Mahni han inchan ringawt pawhin rilru a hnim ruih theih a lawm le. Kan dinhmun leh kan thil tawnte nena inmil tak hla thute hi chuan mihring rilru hi a hneh hma bik em em a. Chutiang a nih chiah lem loh pawhin hla phuahtu chan-ram tawmpui thiamna leh hriathiampuina atangin hla thute hian kan nunah thu a sawi nasa lehzual thin a, kan hla thu leh zo literature hi a mawi zual thin a ni.

Kan hla thu mawina te hlutnate hriat belh tumin i han ngaithla veng veng mai teh ang u.
(Sailova hla= watch?v=ARD2ks85ECA )

Written by

Filed under: Music Videos

2 Responses to "Leikapui Nite (Video clips)"

  1. lonelygaij says:

    Lalhmangaiha sak hi ka lo hre lo in, a mah Lalhmangaiha pawh ka lo hre miah lo zawk a (hawiharh loh thlak khop mai).A phuahtu Vanrammawia Sihphir khua hi chu kan chhungte deuh roh ani a.He hla ka hriat na zawk chu Ramhlun North YMA ho sak kha ani daih..,ni e hla mawi leh ngaihtuah na siam zui thei, hla tha a tling hrim2….

  2. Chhuihthangvala says:

    ngawi teh u, he hla hi hman kum mizo idol thlan hma tawh khan Huiva ah hian kan sawi ho laih laih tawhin ka va hre ve. khami hla kha a ni lom, an lungleng ve ngei ang tih kha? Shilong-ah ka awm laia Mizo channel-ah ka ngaithla thin tak asin. A nalk khawp mai. Tun hma atang tawhin he hla te chi a lar hle in ka hria. Nikum khan Lalhmaa a rawn sa lar leh ta chuah a, mahse zoram mipui te hian kan lo duh hle anih hi.