Lehkha Chhiar

By; B.Vanlalvula, Kuala Lumpur
Thil har lo tak peih har tak chu lehkha chhiar hi a ni thei awm e. A hlawkna hre chiangtu tan chuan thil hlimawm tak a ni thei tlat a ni. Chung mite tan chuan hmun fianrial leh khawhar taka awm pawh an duh tak lehkhabu tha nen chuan awm an thlang zawk thin. Anmahni chauh pawhin an hlim thei em em a. Amaherawhchu chhiar lama tui lo mite tan chuan thil ninawm leh atthlak maiah a chang thin a. Tangkaina pawh a awm chuang lo. Engvangnge lehkhabu lei nan cheng tam tak tak an sen? Chu mai a ni nem, a chhiar nan hun an khawral lehnghal a. Meitui an tihek a, zan rei tak tak thleng an meng thin hi engnge maw a chhan? Lehkha chhiar nana hun hmang ral thinte hian hlawkna engnge an hmuh? Engvanga pawimawh nge a nih?

Lehkhabu tha chhiar hian thiltihtheihna nasa tak a nei tih hi lo hre ringawt mai rawh. I dinhmun aia hnuaihning zawk Abraham Lincoln a kha I hria em? Nang angin electric hnuaiah pawh lehkha a chhiar loh kha maw. Mahse, dan (law) lehkhabu lam a chhiar nasa a, amah meuh pawhin mel 50 biala lehkhabu awm zawng zawng chu ka chhiar zo vek tawh a tih kha. Chu a chhiar tamna chuan White House a luahtir a ni. Stanley Jones pawh hian lehkhabu thiltihtheihna chu a hrechiang hle a ni ang. “Lehkha chhiar tur tha I neih loh chuan I kawr hak lai kha hralh la, lei rawh” a lo tih ni. Chuvangin, chhiar chhiar ringawt mai rawh. A hlawkna chu nangmah ngeiin I tel dawn si a.
Scientist mi ropui Homi Bha Bha (1909-1966) pawh kha a chanchin chhuituten “a thluak a chawl lo” tih hiala an sawi a ni a. A naupan atangin a nu leh pain library an siamsak a, chu hmun chu a puitlin hnu pawhin a thlah lo. Tin, lehkha chhiar hi a peih em em a, thian kawm leh len mai mai ai chuan a lehkhabu hmuna awm nilen zankhua pawh a thlang zawk thin a ni. A awm mai mai pawhin a thluak hi thil ngaihtuah nan a hmang thin. Mi ropuia siamtu pawh hi a lehkha chhiar tih loh rual a ni lo. Mi hlawhtling kan tih te hi an theih anga tamin an chhiar a, hlawhtlinna thuruk chu an hmu thin. Thomas Jefferson a’n “lehkhabu tel lovin ka nung thei lo” a lo tithlawt mai a. Engvangnge lehkhabu chhiar tha chu miten an lo ngai nat em em?

Lehkhabuah hian mi mawl tan finna, mi fel lo tan felna, hre lo tan hriatna, misualte siamthatna, thiamna te leh nun kawng dik leh tha zawka hruaitu chu lehkhabuah hian a inchhungkhawm vek a ni. Hemi hre chiangtu apiang te hian an ngaina a, an thlah thei lo a ni. Revd. Lalnghinglova’n “I thu chhiarin a siam che” tiin min lo hrilh bawk a ni.

Tirhkoh Pawla pawhin pawimawh a ti hle a ni ang. Timothea hnenah, “ka lo kal hma loh zawngin chhiarte… bei uar rawh (ITim.4:13) tiin lehkha a thawn kha. He leiah hian Pathianin malsawmna a dah vek tawh a. Chumi hai thiam apiangte chu vannei an ni. Mi vannei ni tur chuan vannei tlak khawpa thawhrim a tul a, thawhrim loh chuan hlawhtlinna pawh khawi atang mahin a lo kal lo va. Hlawhtlinna tel lo chuan mi a an theih bawk hek lo a ni. Tin, beidawn loh hi hlawhtlinna bul a ni tih hi hrenawm fo ang che.

Chhiartu duh tak, lehkha I chhiarin hriatzau nan leh intihvei nan chauh chhiar lul suh ang che. He lehkhabuah hian eng hlawkna nge ka hmuh a, eng angin nge ka tangkaipui ti zawk ang che. Nangma nun siam that nan leh I lo changkan theihnaturin lehkhabu hi chhiar thin zawk rawh. Tichuan, hlawhtlinna thuruk I lo chang ang a, lehkhabu thiltihtheihna chu a tak ngeiin I lo dawng dawn a ni. “Chakna aiin finna a tha a, awmkhauh aiin hriatthiamna” (Thuf.24:5).
Source : Zo Kawtchhuah