Articles Comments

» Mizo Thawnthu » Lalvunga leh Lianchia te chanchin:

Lalvunga leh Lianchia te chanchin:

By: L.K. Liana (Author of Zofate Chanchin)
Lalvunga hi lal ropui leh hmel tha ni a hriat a ni a, Hualngova thlah chhuan rukna a ni. Hriangngai khua atangin Phaiphulah khua a din a, a khaw hming chu Farzawl tiin hming hran a vuah a, tuna Phunte khua leh Khawthlir khaw inkarah a awm a, Tiau lui chhak lawka awm a ni.

Lalvunga chu mi huaisen a nih avangin miin belhchhan tlakah an ngai a, a khuaah an pem lut zung zung a, reilo teah khaw zau tak a nei ta a. Lalvunga khuaah chuan Lusei, Chawngthu, Ralte, Ngente leh Khiangte an awm. He khuaah hian Zofate zinga hmeltha ber Lianchia a awm a, Chhangte hnam niin an sawi. Hla phuah thiam Darthiangi a awm bawk a, buh leh balah an hausa a chawng chenin an hlim hle thin. Chawngthu leh Ralte pasaltha an awm bawk a, ral lamah an thla a muang hle bawk. Lalvunga chuan ral ven a hova, thlawhhma lamah pawh tlangval huaisen deuh deuh chu lawm tinah a sem rual thin a ni.

Farzawl khua chu Lalvunga leh Lianchia chuan an ti vul hle a, mi ten an ngai sang em ema, Hmel thu-ah Lianchia an thlang zawka, Lalvunga pawh a duai bil lova, lal a nih avangin an ngai ropui thung. Nula ho chuan “Tu zawk nge in thlan ang” tiin ti ti nuam ah an sawi thin a, Lalvunga leh Lianchia te pawn mi ten an suangtuah buai an sawi huai huai chu an hai lova, Lalvunga’n ti hian hla a phuah a.

Miah Lianchi awm e, in sel e, Lalvunga
Tualah ngulrua bun e, kawkvahai tlar na ngai
.

(Hla thu: Lalvunga leh Lianchia hi tu zawk nge tha deuh tiin in ngaihtuah buai thin a, Lalvunga chu ral thata ral ai thin ka ni.)

Lalvunga leh Lianchia hova chawng an chen thin chu an hlimin nuam an ti hle thin a. Lalvungan thipui a awrh a, dartawnsuk a tawn chu mawi an tiin an kianga thu turin an sawm a.

Dartawnsuk hringte leh chhunbuang behthi’n a hawih,
Tlei dang zun ngai lovin kiangah thu Lalvunga.

Lianchia hi a hmel a that bakah zai a thiamin a aw rawl a ring a, he ti hian hla an phuah sak ve bawk a.

Phaiphulah lelte a kiu reng e,
Khawtlangah Lianchia au an ti.

Farzawl khuaah kum rei tak ralmuang tak leh ngelnghet taka an awm hnuin vanduaina an tawk ta a. Lianchia hian chawng chen meng kham chungin kulh aveng a, ral venna bukah a muhil a nih rin a ni. Ral in an that a, a lu erawh an tan lo niin an sawi. Lianchia thih zan chuan an khuaah ar a khuang lo an ti hial a ni. A thih thu an hriat hma pawhin an thauvah a mana nula buh deng thei pawh an awm lova. A thih thu an hriat chuan a khua in an tapa, Lalvunga leh upaten an sun nasa hle a ni. Zai lam/ Lumtui zaiin hla an phuah tam hle a:

Khawtlang hawih Lianchia fam an ti
Suihlung chhawl ang a dam thiam lo ve.

Liana fam ni’n e kan khaw Farzawlah,
Kan bawhar hman tual an leng lo ve.

Kan bawhar hman tual an leng lo ve,
Kan kipten lungdi han ngai ing e.

Lianchia thih kum chu 1775 vel nia rin a ni a. Lalvunga leh upate chuan Lianchia thattu chu an ral ho an nih an ring a, an ral ho phiarpuitu ah Lianpuia, Lalvunga khua a mi chu a tel an ringa an hnawt chhuak a, Tiau thlangah khua a dina tuna Mualbawk ram Lianpui hmun an tih hi a chenna hmun ni a hriat a ni.

Lianpuia chu thlavang hauhtu leh thuihhruai a nei nual a, Lalvunga nen chuan an in hrosa tawn reng a. A hnuah rem thu sawiin Tiau luiah saui an tana an in rem ta a ni.

Lianpuia fate Pu Buara leh Huliana, an thuthlunpui Darzatuala leh Lalpuihluta te chuan Farkawn khuaah remna thu thlung siam turin Lalvunga chu palai an kohtir a, Lalvunga chuan remna sa-ui an tan tawh avangin rinhlelhna a nei lova, thuthlung tha zawk siam tum an nih a rin avangin a kal ta a ni. Lalvunga chu Farkawn khua a thlen chuan nuthlawi Huallianpuiin a inah a thlen tir a, Huallianpuii chuan “Lalvung, tlan mai rawh, thah che an tum a, an thuruk pawh ka hria a nia”, tiin a hrilh a, Lalvunga chuan “Sa-ui kan tanin remna kan siam tawh a, chuti chung pawha mi thah an duh chuan an thu a ni ang chu: ral a awm ka hre lova, tualkhel ralah Lalvunga ka tlan ngai love”, a ti a, a tlan duh lova.

Farkawn khuaah chuan remna thuthlung siam tur ni awm takin vawk an talh a, zu an beng bawk a. Lalvunga zukhawn in lai chu thawklehkhatah a kut pahnih an man bet a, an hnungkhrih a, an hruai ta a ni. An kal zel a, Tiau luiah an vithlum niin an sawi. A hruaitute chu Tiau lui dung an zui chhova, zanah Farzawl khua an rawk chiam a, an sial an kawisak a, Lalvunga nu lungchhia chu a tap a, “ Ka fa Lalvung lo hawng thuai la, misualho hi hnawt kiang rawh”, a ti a. Anni chuan heti hian an chhang a, hlaah an hmang hlen ta a:

Lalvunga nu tap tap lo la, i chauh vang,
I fa Lalvung sahlamah uai zo ta e,

Lalvunga’n ka lian a ti Farzawl a luah,
A luah zo lo changsial sawmthum kan la e.

Lalvunga thih kum chu AD 1780 vel nia rin a ni a, an sunna hla an phuah tam hle a ni. Lalvunga leh a farnu inbiakna thu chu tun hnu thleng hla ah an hmang thin a:

Tlan rawh tlan rawh Lalvung tlan rawh ral an ti
Tualkhel ralah Lavung ka tlan ngai love.

Farzawl kawtchhuahah Lalvunga lung an dawh a, Phunte leh Khawthlir khaw inkar (Rih atang mel-6 vel) kawng sirah tun hnu thlengin hmuh theihin a awm.

(Source: Zofate Chanchin by L.K.Liana)

Written by

Filed under: Mizo Thawnthu

2 Responses to "Lalvunga leh Lianchia te chanchin:"

  1. partinlawra says:

    A ngaihnawm khawp mai a.Lalvunga pian leh murna,a tobul hi hriat chian a va han chak awm ve aw..??.Pawih sawn thlah hi an tiringawt zel a.A ni ngei em?Tunge hrechiang aw????

  2. puibawiha says:

    A ngaihnawm tiap tiap hle mai. Khawvel ram dang history nena han khaikhin hi chuan kan hmanlai thawnthu ngaihnawm tak takte hi an lo la rei vak lo ve.