By: Estheri pa, USA
Danglamna awm lovin hma a sawn theih loh avangin hmasawn kan duh a nih chuan kan thil lo chin thin tamtak chu tihdanglam a ngai dawn a ni. Pawmdan neisain kan pawmdan chauh thaa kan ngaih chhung chuan hma kan sawn thei lo vang. Thinlung a, hnungtawlh mi chu a ma duhdan a kalh thin a ni (Thuf:14:14).

Hmasawn tur chuan kan rilru kan hawn a, a tuldan anga inpawhfan a, insiamrem a tul thin: kan tanna a dik lo tih kan hriat chuan sawhsawn leh mai a tha. Sahuai thing vawn tawh anga vawn tawh ngaihdan kan lo neih thin pawh rilru inhawng taka sawhsawn phala kan dawnsawn duh chuan tih varin kan awm dawn a ni. Hmasawn tur chuan thil pawimawh tam tak a awm awm e.

Rilru Put dan ( Attitude)
“ Rilru put dan hi tihdanglam theih a ni a, tidanglam thei lo chuan engmah a ti danglam thei lo” Goorge Bernard Shaw-a chuan a ti a. Kharkipna hnuai atang chuan boruak thinghlim a hip theih lohva, hmasawnna atana thil tangkai tak kan hmuh hmaih thin . Kan experience, kan thiante education, kan society, sorkar leh kan seilenna boruak a tangin kan rilru putdan a insiam a, kan rilru putdan a zirin mi kan hipin kan hip lo thei a, mi hip lo zawnga rilru kan put chuan chu chu hmasawnna daltu a ni nghal thin.

Rilru khauh leh inhawng duh lo kan nih chuan kan tan ni zawng zawng hi a tha lo vek a (Thuf:15:15) helna ngawt kan zawng a (Thuf:17:11) boruak bawlhhlawh kan pai hnem a, kan kianga awmte tan a hrisel lova min hlat a, kan tel lovin an hlim thin . Mitin hian chaklohna lai (Achilles heel) kan nei theuh va. Mi thatna leh chakna lai hmuh thiam a, hmangaihte famkim lohna kan haider chuan kan awmna hmun a piangah inremna leh hlimna a thleng ngei ang.

Vawikhat chu pheikhawk company-in thliarkar pakhatah an mi chawr pahnih an tir a. An thlen veleh pakhat zawk chuan “Naktukah ka lo haw leh nghal dawn, pheikhawk bun reng reng an awm lo” tiin an Head Office hnenah chuan thirhruai a thawn a, pakhat zawk erawh chuan “Khawngaih takin pheikhawk 10,000 rawn thawn rawh u, a mamawh hlir an awm” tiin hlim takin thirhruai a thawn thung a ni.(Wisdom2005)

Heng mi pahnih inan lohna chu an rilru put danah a ni. A hmasa zawk tan kawng a ping a, a hnuhnung zawk tan hun remchang a inhawng thung. Mosia’n Kanaan ram enthlatu tura a tirhte inan lohna pawh kha an rilru put danah a ni. Kan hlimna leh hlim lohna, kan hlawhtlin leh kan hlawhchhamna pawh kan rilru put danah a innghat a ni.

Insawizawi
A mawitawka thau hreh tawhte pawhin insawizawi thatzia chu zankhat daih sawitur kan hre deuh vek awm e. Amaherawhchu kan insawizawi na lam leh infit tur a kan beih dan erawh a in ang lo thei hle.Thenkhatin mite chunga thutlukna siam tura zuang thei viau, mi chhiatna tur leh kawng dal tura tlan chak takte kan awm a. Mahni mawhphurhna dah tha thiam tak te, hmaichhana mite fak chiam a, an awm loha ar chuk tui lo khawpa rel thiam leh hle si, mi chunga hnathawh tur bel tura rit chawi hneh tak site kan awm bawk a. Hetianga rilru hmang thin mi kan nih chuan hma kan sawn lo vang. Hriatthiamna, dawhtheihna leh ngilneihna lama zuang sang thei, mi thatna tur leh chawi kang tura tlan chak thei mi ni turin min tibuaitu sirah hnawl a, hmai chhanah chauh ni lo, hnung lamah pawh mite fak i zir ang u. Mi phur chhawk thei turin rit chawi thei ila, tichuan keimahni ngei hma kan sawn thei ang.

Incheina
Silhfel lo intanna bul ber chu zah hriatna, saruaka awm zahna atanga lo piang chhuak a ni. Adama leh Evi’n saruak an nih an in hriat khan theipui hnah an thuikhawm a ( Gen: 3:7), style leh fashion thawngaleivirin min nuai a, zahna a bova, “taksa in pho chhuahna remchangah” kan hmang tawh zawk mah a . Kan incheidan atang hian mi nuihzat, mi zuam, mi ngainat, mi zah leh ngaihsan kan ni thei a, duh thlang thei kan ni. Kan mizia leh kan thinlung laimu pho chhuaktu a ni a, kan society zeizia awlsam taka hmuhtheih tura tarlangtu ber a ni bawk. Mite nena kan indawrna kawngah thu tam tak a sawi a ni. Herbert Harold Vreeland-a chuan “Mi tam takin hna tha an hmuh phah” a ti a ni. A dik hle; a hun leh a hmun hriaa kan dinhmun, nihna leh kan nun nena inremin inchei thei ila a duh awm hle.

Pawnlam chu pawimawh ve mahse, Lalpan thinlung lam a en avangin chhung lam mawina kan ngai pawimawh tur a ni. Pathian mi thlan mi thinghlim leh duhtak te angin lainatna thinlung te, ngilneihna te, hmangaihna te hi kan inthuamna ni se, a duhawmin a mawi ngawt ang.

Tawng fimkhur leh Fiamthu
Ngunhnam hliamna aiin lei hliamna tawrh a na zawk; ngunhnam chuan taksa a tina a, lei chuan thlarau nun a hliam thin. Ka pakhat a tangin fakna leh anchhe lawhna, nunna leh thihna te a chhuah theih avangin kan fimkhur hle a ngai a ni. A thusawi tisual ngai lo mi chu mi puitling a ni a, a taksa pum pawh veng thei mi a ni ( Jak 3:2) Mi ngaiha fing inti i hmu thin em? Chumi ai chuan mi a-ah beiseina a awmtam zawk tih (Thuf: 26:12) ah kan hmu a. A hre ber ni awma thusawi hi thusawi tha leh nung a ni ngai lova, Nepolean Bonaparte-a chuan “Tu emaw keiniho aia fing zawk hi a awm a, chu chu mi tin hi an ni” a ti a. Mi ropui chu an thu sawiah an fimkhur a, inngaitlawm takin an tawnga, an sawi aia nasain an chezia (body language)-in an tilang leh fo thin.

Kan finna leh kan mawlna chu kan thusawi ah a lang leh thin ang hian kan fiamthuin kan nihna a hril thin. Mi rilru kaihruai tawk chauhva fiamthu thianghlim kan thawh hian kan thusawi ngaithlatute a tiharh a, kan thusawi a chawinun that chang a awm a, chu tih rual chuan kan fiamthu thenkhatin mi rilru a tina fova, kang pan ser ang mai in an rilruah a cham reng thin . Zahmawh rawngkai thu lawilo leh tlaran pui pui tea fiamthu thawh hi a mawi lova, hmuh hnuhnum apiang ka duhber che tia hmangaihna thu hlan thei zel thinte nen kan inang tih hriaa chin loh a tha. Thutaka nun nen ainkalh a ni.

Inzir belh ngai tawh lova in hria chuan kan hnungtawlh a ni tih kan hre lo chawk. Hun a lo la kal zel a, rawih lam kan pan zel a, a tawpah phei chuan kan tuiek a, kan hnawksak a, sual pakhatin thil tamtak a tichhe thin (Thuf: 9:18) ang hian a thasa pawh kan tichhia a, pangpar buk hnuai a rulngan ang maia hlauawm kan ni thin. Hmasawnna kawng kan zawhnaah hian kan dam chhungin kan inzir seng lovang, mahse kan thlen chin atanga ke kan pen chhuah chuan hmasawnna kawng kan zawh tan a ni. Kan inzirna kawngah hian kan hriat tlemzia kan inhmuchhuak zel a, chu chuan tlawm taka awmdan min zirtir a, kan tlawm chuan Krista a lo langsar a. A mah a lo lan chuan ropuiin kan lang ve mai dawn a ni.
Thulakna: mizoumfellowship.org