By: Lawma Fanai, New Zealand
Ka pa tan hla thlan.
watch?v=vLxVdwfDryM

“Tumbailek tumbailek” tia lawm rual lek ka nih lai atanga “Kal chhek chhek, kal chhek chhek, artui hlawh hlawh” tia ka bana min vuana kal dan zirtira, zirna bul min lo tan saktu, ka pa, famkhawpui min lawisanna kum 22 zet liam tawh mah ni se, Father’s Day a lo thlen ni te hian kawng hrang hranga i mi zirtirna te kha a tharin ka hrechhuak leh thin a ka pa, ka lawm e.

Ka lei pathian, ka pa, kawng tin renga min enkawltu, zirtirtu, kawhhmuhtu leh thlamuantu, ka naupan lai khan i thlazar hnuaiah thlamuang takin ka lo awm thin a. Engkim tithei, huaisen ber leh tha bera ka ngaih thin, min zilhhauna leh i mi enkawlna hnuai atanga tun dinhmun thleng thei ka nih avangin ka pa, ka lawm e.

Thlama kan riah dun laia sakhi huk leh silhal uu ka hriat a, ka hlauh avanga i bawp inkara ka thut te khan engmah reng hian min ti buaiin min ti-na thei tawh lo tur ang khawpin ka thlamuanpui che a. “Ka pa, ramhuai hi eng ang nge?” tia ka zawh che khan, “Ramhuai chu keimah hi ka ni a, ramah keimah chauhvin ka kal a, engmah hlauh ka nei lova, ramah ka huai em em a, chuvangin ramhuai ka nih hi,” i ti sam et a. Ramhuai chu ka pa ka ngainat em em leh ka chhuan em em chu a nih avangin ka lo puitlin thlengin mi faten ramhuai an hlauh lai pawhin hlauhna nei ve lo va ka lo awm phah avangte hian ka pa, ka lawm e.

Ka lenvahnaa thil ka chhar haw te khan khawi a mi nge? Engvangnge i rawn chhar? tiin min zawt a. A awmna hmunah min dahtir leh thin a, sazei (hremna) hialte mi lo pe thin kha thil tha lo tihna tur ata min lo veng lawk a ni tih ka hriatin ka pa, ka lawm e.

Mi nau awmze nei lova ka velh/kutthlak te khan a chhan min zawt a, ka thiamlohna a nih chuan min hrem thin a, khang te kha dik lo taka mi chunga ti lo tura min lo zirtirna leh zilhna a ni tih ka hriatin ka pa, ka lawm e.

Mahse maw ka pa, miin min velh/kutthlak avanga ka rawn tah haw changte khan ka thiamna a nih chuan aia upa leh lian/chak zawk pawh nise, hneh hma loh chu sual tura mi tih erawh kha chu; hreawm ka va ti thin tak em! Mahse, tunhnu hian a chhan ka lo hre ta; mahni diknaah chuan huaisen taka tang ngam tur leh khawi hmunah pawh awm ila, diknaa tang ngam turin min zirtirna a lo ni reng mai tih ka hriatin ka pa, ka lawm e.

Ka pa, “Engmah ro sum pek tur leh sem tur kan nei lo a, zirna/thiamna theih tawpa inzir hi ro kan pek theih che u a ni a, he ro hi in neih chuan tumahin an laksakin, an chhuhsak lo ang che u!!!” i tih thin kha ka theihnghilh ngai lo a sin. Kan lehkha zir lai a, i thiam tawka min zirtir leh kan lehkha en hun chhung chu mu lo a, min vil reng thin te kha e, mual min liamsan hnu pawh hian mitthlaah a chamreng a, ka thinlung hian a theihnghilh thei lo a sin. Zirna kawnga tan min laknattirtu ber i ni thin a. Ka hlawhtlinnate chu a takin tawng ve hman lo mah la e, ka engkim hi nangmah avang liau liau a ni tih hi i chawlhna pialral atanga min lo hriatpui ka rin tlat avangin ka pa, ka lawm e.

Ka pa, kan chhungkuaah mipa pawn mahni chaw-ei-thleng sil a, a ei hnuhnungin hmunphiah leh thleng zawng zawng sil tur i tih te, mahni thawmhnaw hak balh chu mahni ngeia suk tur tih te, eirawngbawl kawngah pawh a-hmei-a-pa thlu lo va, a inchhawka bawl tur tia chhungkaw khawsak dan tur min zirtir thin te kha ka va ngaithiam lo tak em! Kan thiante chu an farnuten thleng an sil a, eirawng an bawla & an thawmhnaw an suk sak thin a sin tiin ka hnial ngam bawk si lo che a. Mahse, pa, ka lo puitlin hnu hian i mi zirtir tumna kha e, a lo that zawk zia ka hrethiam ve ta. Kan tan thil tha tur i lo thlir lawk a, mahnia chettlat ngaihna hmunah mifaten eirawngbawl leh insuk thiam lo leh harsa an tih em em laiin, ka tan harsatna leh hrehawm tihna awm lo va; thiam taka ka tihtheih avang hian ka pa, i chungah ka lawm tak zet a ni.

Ka pa, rim taka min lo enkawlna leh min beiseina te chu hrereng thin mah ila, i chungah engmah ka tihlet ve theih tawh lo tur a, mual min liam san mai erawh hi chu thinlai na a dam thei mawlh lo. Theih chang nise, chengrang chawiin thihna chungah hian phuba ka la ngei tur a. A ni, Kum-22 lai a lo liam ta. Mahse, ka theihnghilh thei lo, kha zan (May-19 zan) tluka khawvela ka rilru nat, beidawng & lungchhiat kha a awm lehtawh ngai lo ang. Khawvel min chhuahsan ni May-19 (1987) hi calander-ah hian chawhreh hmiah theih nise ka va ti tak em!! Thangkhat lian zeta rei ni tawh mah se; Father’s Day a lo thlen ni te hian kei ka thinlaiah famkhawpui min lawisan ni kha ka thinlaiah a thar lehthinin na vawng vawng thin mah se la, hringnun khawsak zia min lo zirna zawng zawng te khan ka bengah dar angin a rawn ri thar leh thin a ka pa, ka lawm e.

LALPA, Ka pa taksa na tuar nasa lutuk chu natna awm tawh lohna hmunah hlim takin I chawlh tir a, ka lawm e. Ka pa, min boralsanna te hian Lusun fate dinhmun hriatthiampuina te min neih tir a. Khawvel hi kan khualzinna ram a nih zia min hriat chian tir em em avangin ka lawm e.

Ka pa, he kan khualzinna ram ka chhuahsan hunah i chawlhna ram mawiah hlim takin min lo hmuak ang che aw!!!