Ka Nupuiin Min Zirtir

By: K. Malsawmtluanga, Bualpui “N”
Tlawmlak lamah pawh ka ngai lo. A hnen atangin thil tha tam tak ka chhar chhuak ve tawh muai a ni. Nitin nun kawng dik leh tha lama min kaihruai thei kawppui Lalpa’n min lo pe hi ka vannei tak zet a, kum hnih em pawh kan la hmang ral dun lo chung hian amah atanga ka thil zir chhuahte hi a langsar zual ka’n tarlang ve reng reng teh ang.

Zaidam turin:
Mi thinchhe ve angreng tak mai hi ka ni a, lungawi loh tawh chuan tum bur mai, vin deuh hluk chi hi ka ni a, a tha lo tih pawh ka hre ve reng. Kan nu hian vin hi a ngaithei lo khawp a, inhau ri leh tawngka vin ri hi mi dang pawh ni se a duh loh zawng tak a ni a, amah hi a vin ngai reng reng lo bawk a, tawngkam mei nei deuh te, mitmeng thip deuh te leh chetziaa thinrim lantirte hi a tha lo tih vawi tam min hrilh tawh a. Zaidam tur leh thinrim pawha insum hram hram hi kan zir ve na sa hle a, mahse, sim a harsa ve khawp mai, zaidam hi zir theih a ni tih erawh a chiang a. Kan nu pawh hi tun hma chuan thinchhe tak leh thinrim tawh chuan insum thei lo chi a ni awm e.

Mahse, chung chu a sim tawh a, zaidam hi a lo zir thin a lo ni a. Kan thinrimna tam tak hi chu ho te te hi a ni fo thin a, mi tin hian zaidam hi zir ta ila, thimrim hian thil tha engmah a hring chhuak lo va, thil tha lo chauh a la hring chhuak a ni. Rawngbawltute tan phei chuan a pawimawh lehzual awm e. Kan nupui fanau lakah zaidam ila, kan inchhung a nuam sawt ang. Nu ang buan buan leh nula tum bir ber te hi an kianga awm a thlakhlehawm loh ngawt mai. KTP leh thinchhia pawh a inrem lo, zaidam i zir theuh ang u.

Mirethei leh rualbanlo hmusit lo turin:
Kan hmusit lo emaw kan intih lai hian kan biak danah leh kan hnuaichhiah danah hian kan hmusit tih hi a hriat tho tho mai a. Mi kan ngaihsan chu kan be nawmnah ngai lo. Mi hausa chu ni ve lo mah la, kan aia rethei zawk te chu kan hnuai en duh khawp mai. Keimah ngei hi chutiang mi chu ka ni thin a, ka ni tih erawh ka inhre lo fo. Tha leh felah kan inngai a, mahse, ka fel lohzia kan nu atang hian ka inhmu tlat. Ani chuan tupawh hi a kawmngeih thei vek a, thian kawm tur hre lo, mi ang loa inngaite hian an rawnpan fo mai a. An hlimna tur zawnga a ti tipuite hi nuam an tiin, rawn kawm an chak tlat thin a, keichu min ngaina ve mang lo. A chhan ni bera ka hriat chu keichuan thinlung takin ka kawm peih lova, an tan hun khawhral hman ka inti lo. Anmahni ka ngaihpawimawh lohzia kha an hrethiam ve tlat. Ka hmusit bik lo a, ka inngaih lai khan ka hmusit deuh a ni tih an inhre tlat.

Kan Nu chuan a lo kawm hlim peih a, tawpin bal hle mahse a hmusit lo va, a khawngaih tlat a, an tan thilpek a ui lo va, anmahni kawm hlim nan hun khawhral a ui ve lo. Thil mak deuh deuh mai chu mi neinung zawkte hnen atang ni lovin kan retheihpuite hnen atang leh thil min pe tura kan ngaih loh mite hnen atangin thilpek hlu tak kan dawng fo mai! An thil minpek chu tlawm te mah ni se kan mamawh zawng tak a ni zel a, kan mamawh loh tur min pe ngai bik lo. Kan mamawh tur nia an rin chauh kha min pe thin. Keinin kan pek aia tam kan dawng let thin a ni. Thil pakhat min hriatchhuahtir a, RW Emerson-a’n “Tih tak zeta mite tanpui nana kan nun kan hman chuan zangnadawmna mak tak hmu lovin an awm ngai lo” a tih kha a dikzia min hriattir a ni. Mi chanhai te, rualbanlo te, leh kan aia rethei zawk te, min mamawhtute tan Samari mi tha nih theuh i zir ang u.

Rinawm turin:
A bikin sum leh pai (tangka)-a rinawm turin ka nupui hian min fuih ngun hle. Dik lova lak luh leh hman a awm palh ang tih a hlauin, a fimkhur em em mai a. A pawisa kawl chin a hria a, chen nga lek pawh lo ak ila, ama min pek anih loh chuan, :Hei, khawia mi nge?” tiin min zawt ngat thin. Tin, hnathawhna office pawisa te hi lo ei ru dawn ta ila, eiruk anih chhung chuan cheng khat pawh ni se, nuaikhat pawh ni se, a duh dawn lo tih a sawi thin a, ei ruk avanga nawmsak ai chuan ei ru lova nghei a thlang zawk. Tangka chu itawm mahse ei ruk avanga huasa te nun chu a tluang ngai lo va, chhungril lamah chhiarna a thleng tho thin. Sum chungchangah hi chuan kei pawh ka fimkhur hle a, Pathian leh mihring laka rinrawm hi ka policy a ni.

Nimahsela, ka nupui hi lo pamhamin duham viau ta ang se la, a buaithlak hlein ka ring. Pa tan chuan rinawm loh mai kha awl tak tur a ni. Mipa tam tak rinawm lohna hi an nupui te vang a ni thei ang em? Nupaa rinawm dun a tul hle mai. Nu thenkhat chu an pasalte hlawh atangin a rukin bank account an hawng ngam nia! Chutiang mi chuan ei theih a piang an ei duh ngei ang. Thianghlim lo mah se, sum hmuhna tur a nih chuan an duh zel mai thei a ni. Kan ramah hian NU rinawm engzat tak awm ang maw le? Kan ram mamawh chu nu tha, nu rinawm te hi an ni ngei mai.
thulakna: Kristianthalai, March 2006.