Inphum leh Inhal (???)

By: Pu Lallianchhunga, Yangon
Hringnun khawvelah hian tumah kum hlun tur kan awm lo. Nihphung pangngaia kan thih chuan kan lei taksa chu “Phum” emaw “Hal” emawa vui liam tur theuh kan ni. Lei chu leiah Pathian thu angin a chang ngei dawn.

Meiah emaw Tuipuiah emaw kan thih chuan a nihdan tur angin awm a ni a, duhthlan theih a ni lo. Mi thianghlim tam tak Kristaa muhil tawhte (Martarte) pawh kha chutiang chu an ni a, Lalpan a hun takah a hnenah a chawlhtir a ni.

Hnam tin zingah leh sakhaw hrang hrang zingah inhal leh inphun an awm. Hnam changkan apiangin an inhal emaw tih tur a ni. Kristian zingah pawh inhal tam tak an awm. Major Thangvela, Salvation Army nen kan inkawm a, an Kohhranin “hal” an pawm thu, inkhawm kaihhruaina bu-ah pawh “Phum” leh “hal”-a inkhawm kaihhruai dan an neih thu leh Capt. Rothianga pawh “Hal”-a vui liam a nih thu min hrilh. Methodist (Upaper Myanmar) Pastor Rev. Hrangsailova pawh Sapram (England)-a a cham (A zin) laiin an Kohhran member thi vuinaah an tih dan va hmuh leh hriat tum fawmin a kal a, meia hal (electric-a hal)-a vui a nih thu min hrilh. Chutiang zelin Kohhran dangah pawh an tih thu kan hre tho va.

Yangon-ah pawh hian kan mite sipai tang mek thi chu a ram danin meia hal an ni zel a, kan ngaithiam zel. Mahse, sipai ni lo chu “phum” ngei tura ngaihna kan nei hi kan ti dik lo niin ka hria. Leirawhchan nena thlan rem turin tun hunah cheng nuai thum/li sen a ngai. Mi tam tak, kan natti’n damdawia inenkawl nan leiba kan nei a. Kan thi a, thlan man nen phei chuan leiba a pung duh hle. Leirawhchan rem lovin inphum ila, bul hnaiah thlan tha tak a lo awm a, inthlauhthlakna a na lutuk bawk si. Inhal chuan senso sawi tham a ni lova, hausa leh rethei inthlauhthlakna a awm lo. Mi thenkhat chuan “Vap” te an lain an insawngbawl leh a, hei pawh hi thil chuangtlai mai a ni a, thil tul niin ka hre lo.

Chuvangin, kan ram dinhmunah khawpuiah te kan invui dawn a nih chuan mi zaa sawmkua (90%) atan chuan “hal”-a invui hi a tha ber. Mi hausa leh khawsa thei deuh te pawhin “Ka thei e” tia thlan ropui taka rem ai chaun mi retheite ngaihtuahin a “hal” zawnga rilru neih hi hun tak a ni ta. He photo No. 176, (Magazine-a chuang a ni) Rev. S.T Hau Go-a pawh hi miretheite ngaihtuah avang leh mite entawn(Zir zawm) atana “hal”-a vui liam an nih thu mi zawng zawng hriat a ni. A theite mahin he rilru an put chuan keiniho phei chuan kan inngaihtuah ngun a ngai hle a ni.

Mithenkhat, mite nunna leh damna duhsaktute phei chuan “Hal” sawi loh, an thih hnua an taksa pumin mite tan an pe a, Doctor-te an hriattirsa zawk thin a ni. He thu(Article) ka ziah dawn hian ngun takin ka ngaihtuah a, mite tana ziak mai chi niin ka hre lova. Ka rilruah thuthlukna siamdiama ziak ka ni. He thuziak leh Siallam kum 128 Jubilee magazine hmang hian Lalpan chhiartu zawng zawngte taksa leh thlarau lam malsawmna vur(h) theuh che u rawh se.
Thulakna: Siallam Khua Kum 128 Jubilee Magazine—(1876-2004)