Inneih Hmaa Sex Hman

By: Vanlalhmingsangi, Tahan
Tunlai khawvel changkang tawh tak karah kan cheng a, kan naute leh kan fate pawh he changkanna khawvel paltlang zelin an rawn puitling cho a. Kristiante zingah, a bik takin keini tlangmite zingah mipat-hmeichhiatna hi fate zirtir tul tih lohna leh zahthlaka ngai tlat kan la thahnem zawk a, tin, sawi thiang loa ngai pawh kan la awm cheu a ni.

Mahse, kan fate hi nu leh paten sex lamah zirtirna pe lo mah ila, thiante ka atang leh khawvel changkannain a ken tel media chi hrang hrang atang an hre leh tho tho thin. Ramsa pawhin zirtir ngai lovin a hunah chuan inthlahchhawn nan sex an hmang mai thin kan ti. Amarawh chu, ramsate chuan inthlahchhawn nan a hun takah sex an hman laiin mihringte erawh chuan nawm chenna chi khatah kan ngai thin hi ramsate leh mihringte inan lohna lian tak pakhat chu a ni.

Bible hunlai khan “fa tam tak neih hi malsawmna”-a an ngaih avangin nawmchenna ai mahin fa neih nan leh thlahte tih pun nan nu-paah an insiam a tih theih awm e. History kan thlir pawhin indo deuh reng ramah chuan fa neih teuh teuh a tul thin avangin indonaa kal tur fapa neih teuh teuh kha an duh ber anga sawi a ni thin. Fa nei thei lo chu Pathian anchhia dawngah an inngai thin a nih kha. Zabi 21-na a rawn her meuh chuan fa neih teuh chu sawi loh, fa pai lo zawnga sex hman dan kan inzirtir tawh zawk mah a. Mipat-hmeichhiatna hi a ni lo zawnga hman chuan kawng dik lo min thlentu a nih theih avangin kan khawtlang leh kohhran pawhin “mipat-hmeichhiatna” chungchang kan buaipui tan ta hle a ni.

Khawvel pum huap ram changkangte dan siam hriat avangin mi thenkhatten sex hman chungchanga dikna chanvo hi human rights dang ang thoin, mi mal dikna chanvoah an dah lian hle a. Sex hman chungchangah mi mal duhthlanna chu lal taka dahin, sex hmang tur leh hmangtu, mi pahnih remtih dunna a nih a, tihluihna tel lo a nih phawt chuan nupui pasal neih hma, nulat tlangval lai pawha hman thiangah an ngai a. Engpawh ni se, nupui pasal inneihna huangchhungah chauh sex hman hi a himin a tha a, chutah chuan sexual rights in a tum dik tak, inzahtawnna te, inhmangaihna te leh lungawina tak tak chu a hmuh theih chauh a ni.

Zalen tak leh thlahdah taka sex hmang mai maituten eng anga lungruala ti pawh ni se, hetiang hi an hmu ve ngai lo a ni. Mimal zalenna kan dah pawimawh em em laiin chu zalenna ngei mai chu a ni lo zawnga hman tum tlat pawh kan awm. Chumi zingah chuan sex hman zalen tumna hi a hluar ber zingah a tel a. Tum khat chu kan thian pakhat Asia ram ami tho chuan inneih hmaa sex chungchanga ka ngaih dan min zawt a, inneih hmaa sex hman hi keini tlangmi Kristiante chuan sual lian taka kan ngaih thu leh nupui-pasal neih hma chuan invawn thianghlim tlat kan tum thu ka hrilh a. Kan thiana chuan “hun lai hawl (middle age) daih tawh ngaih dan in la zui a nih chu, chuti ang ngaih dan chu tunlai khawvelah a thing tawh lutuk” tiin min chhang et a.

Ni e. Sap ram chauh loah pawh keini Asia khawmuala cheng ngeite zingah inngaihzawng tawh chuan sex hman talh hi a tura ngai kan ni deuh vek tawh niin a lang. Hman lawkah kha chuan inneih hmaa sex hman chu “sual” tiin thil zahthlak tak leh mualphothlak takah kan la ngai a, mahse, hriat loh karah kan thil hmuh leh hriatten innei lo pawha sex hman a pawi lohna kan rilruah a lo tuh der tawh a ni.

Kan pipute hun atang tawhin sex lama invawng tura infuih thin hnam kan ni a. Hei hian thianghlimna kan ngaihhlut zia leh inthlahdah kan ngai thei lo tih a tar lang chiang hle. Tun aia khawtlang kan inhriat chian lai (mihring kan tlem zawk lai kan ti mai dawn nge?) phei chuan nula/tlangval ngai nih hi thil zahthlak tak a ni a, khawtlangah leh kohhranah an tui tla thei tawh thin lo a nih kha. Tunlaiah sapho nun dan kan copy a, kan hriat chhun leh a tha lo lam – sex thlah zalen Hollywood star-te chet dan chauh kan entawn a nih zawngin kan tisual chhiava ang. Kristian ni tawh hrim hrim sap emaw vai emaw tlangmi emaw zingah sakhuana la thu tak leh Bible leh Pathian Thu ringtute chu sex lamah pawh an fimkhur reng tho a ni.

Mi ramah chuan engti ang pawhin sex lo hmang pawh ni se, keini anga khawtlang nun mumal an nei tawh lo va, mahni chauh inhriat hlurna khawtlanga cheng an nih laiin keini ve thung erawh chu kan la inhrechiang hlawm a, khawtlangah leh kohhranah kan thil tihte a lang hma bik a, sawi kan hlawh zel a ni. Keini khawtlang tan chuan inneih hmaa sex hman loh hram hi rilru leh taksa tan a him ber zawk a ni. Khawtlangah mipat-hmeichhiatna vanga sawi kan hlawh a nih chuan hmingchhiatna putu chuan kumkhuain inthlahrung takin nun a hmang tawh mai a ni.

Pi Vanramchhuangi (Ruatfela nu) thu ziak Sex Education (Tleirawlte Tan) tih buah nupui pasal inneih hmaa sex hman that loh chungchang tawi tein a tar lang a, chungte chu kan hriat atana pawimawh zualte tarlan a ni a, thu thenkhat pawh belh zeuh zeuh a ni:

1. Nupui pasal inneih hmaa sex hmangte hi an inneihna a hlawhchham duh khawp a. Inhmangaihna chu dam chhung daih tur a nih laia rei lo te nghah pawh harsa kan tih viau chuan kan inhmangaihna chuan a daih rei bik dawn lo tihna a ni thei.

2. Inneih hmaa sex hman hian tum loh puia naupaina a thlen thei a, tum aia hmaa nupui-pasal inneih a tul thei. Chu chuan zirna a chhunzawmtir thei lo a, nih tur ang an nih loh phah thei bawk. Mipa lamin a neih duh loh phei chuan sawn thlaknaah a ni a, hmeichhe tan sawn paina leh hming chhiatna rapthlak tak a thleng thin.

3. Thianghlimna kan hloh tawh chuan a lak let leh theih tawh lo a, kan hlutna a tlahniam sawt thin. Sex kan hmanpui ni lo midang nupuiah emaw pasalah emaw kan neih phei chuan rinhlehna nen nun hman kumkhua a tul thin a, chu chuan chhungkua dinna kawngah hlim lohna nasa tak a thlen thei.

4. Kan ngaihzawngten sex hmanpui tura min sawm fo a nih emaw keimahniin kan sawm a nih pawhin kha inhmangaihna kha “hmangaihna dik tak” ni loin sex hman duh vang maia inkawp kan ni mai thei. Inngaihzawn laia sex hman phut tlatte hian nupui pasal neih hnuah pawh mi dang ngaihzawn an ching ngei ang.

5. Sex thlahdah vang leh nupui pasal tan chauha sex serh thianghlim lo tan natna tha lo leh enkawl dam theih loh natna kai theihna chance a tam bik em avangin rinawmna hi a him ber tho tho a ni. Tunlaiah nupui zawk emaw pasal zawk emaw sex thlahdah vang maia mahni kawppuite natna tha lo hnawih/kai ve ringawt an tam ta. A vanduaithlak thin hle a ni. Nupui/pasal turten natna an neih leh neih loh inneih hmaa test nei duh lo bur tam tak kan awm a, hei hian kan rilru tet zia a tarlang nghal bawk.

6. Hmeichhia chu rai thei a nih avangin inneih hmaa sex hmangte zingah hmeichhiaten rai hlau leh midang hriat hlauthawng taka sex an hman avangin sex hmanin an rilruah hlimna tak tak a thlen chuang lo.

7. Mipain nupui neih hmaa hmeichhe dang lakah sex a hman pawhin nupui a neih hnuah a nupuiin a virgin leh virgin loh a hrethiam ve tawh thin lo. Hmeichhia chuan inneih hmaain sex a lo hman tawh chuan pasal neih hnuah pasalin a hmuhsit a, a ngainep mai thin. Chuvangin sex hmang ro roah hmeichhe chan a chhe zawk fo thin. Chumi ruala kan hriat tur chu virgin ni chung pawha accident vang emaw pian ken a ni emaw vanduaina dang vanga hmeichhe serh ping kher lo tam tak a awm thei tih hi kan hriat a hun ve tawh.

8. Kan society-ah mipa tan virgin hi thil zahthlak anga ngaihna pawh a awm thin. Mahse hmeichhia chauh hi Pathianin thianghlim turin a ruat bik lo a, mipa pawh thianghlim turin a ruat a ni. Mipa leh hmeichhiaah sex hman khaw loh hi a pawi dan a intluk reng a, hmeichhiaah chuan a lang chhuak nghal a, mipaah chuan a lang chhuak nghal lem lo va, mahse a lanchhuah hun a awm leh nge nge thin.

A hminga Kristian mai kan ni lo a, sakhaw dang biate leh Pathian ring lote entawntlak ni tel tura Kristian kan ni. Sex lama invawn thianghlimna kawngah Kristiante hi sakhaw dang biate tan cho rual loh kan ni thin a, chu chuan Kristiante a tihming tha a, hei hi chhawm nun zel atan awhawm tak a ni. Pathian chuan nupa kara sex hman hi thianghlimah a ruat laiin nupaa insiam hmaa sex hman hi “sual”-ah a ngai a ni. Timothea, tlangval hmeltha tak leh fel tak hnena Tirhkoh Paula’n a fuihna thu hi kan thalaiten kan zawm ve theih a beiseiawm hle:-

Miin chung thil lakah a inthiarfihlim chuan, bungbel thianghlim, Lalpa hman tlak, hnathawh tha tinrenga inpeih sa, ngaihhlut tur mi a ni ang. Nimahsela, tleirawl chaknate chu tlansan la, thinlung thianghlima Lalpa lam apiangte zingah chuan felna te, rinna te, hmangaihna te, remna te um ve rawh (II Tim. 2:21, 22).

Mi puitlingte chuan mahni an in-control thei a, thil tha lo tih chakna rilru pu thin mah se an tlansan thei thin. Tleirawl leh thalai zingah rilru puitling tak pu, mahni in-control thei tam tak an awm a, tleirawl leh thalai nih mai vanga “a la tleirawl a, a awm a lawm” tih mai theih a ni lo. Chuti ang bawkin, kum puitling tawh, mahse rilru control thei lo mi tam tak an awm tho a ni. Tirhkoh Paula chuan thinlung thianghlim leh mi insum thei leh Pathian tihtu apiangte chu mi fel, mi rinawm, hmangaihna ngah leh remna duhmite tiin a sawi a, chuti ang mi ni tura tumna kan neih phawt chuan tu pawhin kan tih theih thu min hrilh a.

Chuvangin, kum lama la naupang tak, mahse chakna lak atanga inthliar fihlim thei tlangval Timothea felna tarlang pahin chu a nungchang thatna chu chhawm zel turin Paula chuan keini pawh min chah a ni. Keini pawhin Timothea nungchang ang chu kan chhawm thei ve ngei tur a ni.