By: Dika
CCFC (Chin Christian Fellowship of Canada) Conference vawi 4-na tur chu July 2-6, 2009 hian Canada rama khawpui thianghlim leh nuama chhiar; Calgary ah nghah a ni a. Inkhawmpui rim a han nam tak tak chuan, tualchhung mipui te pawh a pui-apangin kan helhhlawh emaw ni, mahni chanvo theuh hlen tumin kan phili thawthang a nih ber hi maw, pawimawhah han in phone hlawm pawh ni ila, tuk dang ang lo takin phone vuantu a bar pawh kan awm ta meuh lo, khawmpui rimin a mi urh dan chu a lo dang zar mai.
Kum dang ang lo takin han ti ila, kuminah chuan hmun/ram hrang hrang atangin rawngbawltu lawk tak tak te kan nei dawn a. Hetiang hian:-
1. Rev. Vanlalsiama (CBC, Vancouver)
2. Pastor Henry Leng Nawl Thang (CCF, Regina)
3. Pastor Mang Khan Khup (CCF, Toronto)
4. Rev. Gord Martin (VMC)
5. Rev. Jay Gurnett (VMC)
6. Rev. Tim Nielsen (City Church, Winnipeg)
7. Rev. Dr. Rohmingliana (Burma)
8. Rev. Pa Ni Maung (Bangkok, Thailand)
9. Rev. Je Hu (CCC, Kitchener)
10. Rev. Thla Awr Bawi Hrin (USA)
Tin, kum dang ang bawkin intihsiakna chi hrang hrang neih tum a ni a. Fellowship/Church pakaw inzawmkhawm atanga kalkhawm tur a nih angin thalai rualten huhoa hlapui rem, mimal fakna hla, mi pahnih fakna hla, mi pathum fakna hla hmangin intihsiakna an nei ang a. Sports lamah pawh Zofate infiamna huang atanga a kimchang thei ang bera buatsaih tum a ni. Hmanniah Pu Lalmuankimate nupa nen kan inkhawmpuina BiakIn tur te, sports kan hmanna tur te kan va fang kual a, ti a ti za zar mai, a hnuaiah thlalak thenkhat ka han zep tel a ni.
Awle, Zofate hi khawvel hmun hrang hrangah kan awmdarh ta hle mai a, a remchang ang anga hetianga inhmuhkhawmna hun tha nei thei tura kan awm te hi, Pathian malsawmna leh kaihhruaina tak tak a ni a, a lawmawm thin hle a ni. ZOIN inlengte kan inkhawmpui hlawhtling taka kan hman theihna turin tawngaimiten min lo tawngtaipui kan mamawh tak zet a, khawngaihin min lo tawngtaipui dawn a nia . Tin, a thei apiang chuan min rawn telpui turin kan sawm bawk cheu a ni, tiin keini Calgary lama in unauten inkhawmpui rim kan nam tak tak tawh thu hi kimchang lo takin ka han thailang a ni. Ka lawm e.
