Hun Hman That

By; Malsawmdawnga, Malaysia
Hun hi rangkachak leh tangkarua leh sum leh pai tam tak ai pawha hlu a ni.Mihringte hi hun chhungah hian kan cheng a, hun leh hringnun hi a inzawm tlat a tih theih bawk awm e. Hun hi awm ta lo ngawt se hringnun hian awmzia a nei hauh lovang. Chuvangin hun hi Pathian thilthlawnpek ropui tak a ni a tih theih ang. Mi thenkhatin engmah tih nan hmang lova hun an khawhral mai mai laiin, thenkhat erawh chuan thil tha tih nante, mihringte mamawh thil tangkai tak tak hmunchhuah nan an lo hmang thung a. Hun kan hman dan hi a lo va inang lo thei tak em?

Mi ropui kan tih hote hi hun tha an neih bik vang emaw, hun tha an chan bik vang emawa ropui an ni hauh lova. An hun neih chhun te te thil tangkai leh thil tha tih nana an hman vang chuaha ropui an ni. Nangpawh chhiartu duh tak, i hun neih chhun te te kha thil tha leh tangkai tih nan han hmang zel chhin teh, mi hlawhtlingah leh zahawmah i chhuak ngei ang.

Benjamin Franklin-a chuan “Hringnun hi i hmangaih maw? I hmangaih a nih chuan hun khawhral suh. Hringnun siamna hmanrua a ni si a” a ti hial a. Chuvangin hun hman that tihin a kawh chu mahni nunna hmangaih tih leh mahni tana Pathian malsawmna lo thlen theihna tura kawng sialna a ni. Hun hi a hlu a, aman pawh a tam asin. Hun hlutna hre lova khawhral mai maitute hian mahni hlutna pawh an inhre lo fo. Thufing pakhat chuan “Hun inchi khatah rangkachak inchi khat a awm a, rangkachak inchi khatah hun inchi khat mah a awm lo” a ti a. Anih chuan a thlawna hun khawhral mai maitu chuan rohlu tam tak a paihral a ni tih inhre rawh se. Phe Mit-a pawhin “Hun hi aman thliah theih a ni lo. I hun chu a tha thei ang bera i hman chuan chu i hun man chu sang tak a lo ni ang” a ti bawk a ni.

Hringnuna mi hlawhtling kan tih tam takte pawh hi an vanneih bik vanga hlawhtling an ni ngawt lo. Mi awm mai mai laia thil tha an tihnate, mi mut mai mai chhuanga rim taka an thawhna chuan a tawpah hlawhtlinna tlangchhipah a hlangkai thin a lo ni. Nakin hun atan beiseina nei lo leh inbuatsaih nachang hre lo tute hi a thlawna hun khawhral mai maitute an ni duh chawk a. Mi thenkhat chuan nakin hun atana hlawhtlinna turin hmathlir tha tak tak kan nei thin a. Mahse a tam zawk chuan kan hmathlir anga kan hlawhthin theihna turin vawiinah engtin nge kan nun ang tih erawh chu kan mangnghilh fo thin a ni. A enga mah hmaa nawm kan tum hmasak tlat thinna hian kan hmathlir tha tak tak a tichhe fo va. Hringnunah hian hmathlir tha chauh hi a tawk lo va, chu chuan kailawn a mamawh a. Chu kailawn chu vawiina hun hman thatte, taima taka thawh peihte leh hreawm tawrh peihte hi a ni.

Oprah Winfrey-i chuan “Keiman chiang taka ka hriat chu i hun hman dan chuan mi engang nge i nih tih a tilang tih hi a ni. Keimah leh keimah mi lothlawn ni lo turin, hun a thlawna khawhral lo turin theih tawp ka chhuah a ni.” a ti a. Nakinah engang mi nge kan nih ang a, engang dinhmunah nge kan awm dawn chu tuman kan sawi thei lo na a, mahse zaa sawmnga chu vawiina hun kan hman dan [Nun dan] hi a hriltu a ni tlat. Tumna sang tak kan neih leh neih loh pawh vawiina hun kan hman dan hian a tilang a ni.

Unau duh tak, hun hman that tih hian darkar khat pui pui hian a ni lo asin. Minit khat,sekawn khat te te inbelhkhawm atangin a ni zawk. Hun kal tawh avangin lungngai duh suh la, i tan tun hi hun tha a ni e. Hun kal tawh chu kohkir rual lohvin a liam tawh a. Hmalam hun lah a lo la thlen loh avangin kan tan zawmzia a nei hek lo. Tun hi kan tan hun tha leh hlu awmchhun a ni a. Hun kal tawh thlahna leh hun lo kal tur hmuahna tha ber chu tun hun hman that hi a ni. Tun hi nakin siamna hmanraw tha ber a ni bawk. Hun hman that tih hian thil danglam teh chiam a lo ni lo, a remchan dan ang anga thil tha leh tangkai tih hi hun hman that tih awmzia chu a lo ni e.

(He thuziak hi Zo Kawtchhuah chanchinbu kum 5-na champha June 14, 2009 a thu inziaksiak lawmman pakhatna dawngtu thuziak a ni. Kan lawmpui e.)
Source : Zo Kawtchhuah