By Valtea, Melbourne
Siamtu zarah damtein kumthar hun lawmawmah kan chuangkai leh a, rilru thar leh beiseina tharin kan hunte Pathian hnenah i hlan ang u. Kum kal ta chu ngai em emin kan thlir liam a. Kan hlimlai leh lawmlai nite chu hre rengin, hriat reng tlak loh kan tihsualte chu i manghngilh ang u.
Kum thar thutiam kan nei theuh tawh awm e? “Kumin chhungah bible ka chhiar zo vang,” tih emaw? “Zu, zuk leh hmuam ka sim ang,” tihte pawh a ni hlawm ngei ang. A then tan chuan thinrim ut ut leh tihtauh nghawng nghawng ching tawh lo turin an lo intiam ve ngei ang le. Chung thutiam bakah chuan tlem belh tur i han ngaihtuah teh ang u.

Rilrua suangtuahna tel lo chuan khawimah hi a thlen theih tak tak loh avangin zalen takin i suangtuah ang u. Tiam chin nei lovin duhthu i sam ngam ang u. Nih chak nei miah lo nun chu a mu tello theirah ang maiin a tawihral leh mai thin.

Hna hi mi tizahawmtu a nih bakah chakkhai mamawh min phuhruk saktu a ni a, khawvela mihring awm zawng zawng hi che miah lovin chawl thut ila a rapthlak ngawt ang le! Pathian pawh hian kawla ni chhuak chhiar a, thlan tla zawih zawih a hnathawk tur hian min lo duang reng asin! Kan puan vente tichhingin mahni tan, chhungkua leh khawtlang tan leh Pathian tan i thawk tan ang u.

Pathianin mihring tan chawlh ni a lo ruat a, Amah fak leh chawimawi nan. Chu mai bakah kan hnathawh karlakah chawlh kan mamawh a ni. A changa picnic kalte, cinema en leh music ngaihthlakte emaw, zawhte ang mai a, chhing diar diar a mut zawite hi kan taksa hian a mamawh em em a lo ni. Thawh tam kan duh chuan kan chawl thiam tur a nih hmel hle.

Lehkha chhiar hi uar tan ve tawh ila, kan tangkaipui hle lo vang maw? Mifing leh thil chik mite robawm chu keu vein hringnun kan hman chhunga kan mamawh tinreng dahkhawmna lehkhabu hi chhiar i
uar sauh ang u. Kan tan thian thaber a ni a, hlimna min thlentu a ni.

Nuih pawh hi kan lo mamawh reng alawm maw le! Kan phurrit mi chhawk zangkhai a, taksa tan leh thlarau tan a tha mai ni lovin a lo mamawh ngawih ngawih a ni. Mi tumhmuk thin tan phei chuan thian hlim thei tak zawn a, thawl tak a nuihpui hawk hawk a tul viau ang le.

Ngaihtuahna ril hman hun i bithliah teh ang u. Tun hma, tun hun leh hmalam thlirin uluk takin ngaihtuahna hun hmang thin ila. Thui tak kan dawn loh chuan holam deuhvin kan kual kan kual reng mai dawn a ni.

Insawizawi pawh hi kan mamawh tawk tal chu i ti tan ve tawh ang u hmiang. Kan nun harh thar nan leh hrisel leh zual nan i infiam thin ang u. Hna thawh ringawt hian kan rilru leh taksa hi a lo chawlawl zo thei hi a ni a, thiante leh chhungte nen i chai thin ang u khai.

Lehkha ziahte pawh hi tan i la zual sauh ang u. Kan hriatrengna ai hian chhinchhiah nan a tha zawk a. I fin, remhriatna leh thiamna midang tan i hlui theihna pakhat a ni. A chhiara chhiar hian hriatna a tizauva, ziah erawh chuan mi a tiphuisui thin. Kan nitin hun hmandan thleng hian Diary-ah i ziak thin ang u hmiang.

Tute pawh hian thian kawm kan mamawh a ni. Thiantha tel lo chuan khawvel hi chi tel lo ang maiin a da duap mai a. Kan hlim, kan lawm a min duhsakpuitu leh kan mangan laia min hnemtu kan mamawh a ni.

Hmangaihna tel lo nun ringawt zawng thlaler ramro aiin a khawro thin a. Kan u leh nau, chhungkhat lainate leh ran vulhte thleng hian i hmangaih thar leh ang u. Huatna kha tak aiin a ropui a, hring nun tivultu, a lova kan nun theih miah loh a ni si a. Hmangaih tur i zawng ang u.

Khawvelah tawngtaina aia thil tithei leh chak a awm lo. Min Siamtu engkim tithei kan biakna a ni a. Vanram min hruai thleng theitu a ni. Kan phurritte hlanin chakna thar i dil zel ang u. Pakhat leh pakhat intawngtai sak tawnin, hlim takin hringnun kan chan chhung hun hlu hi i chen dial dial ang u.