Huivalenthiam Debate, 2009 Zawhfel a ni ta!!!

June 28, 2009

By: Vanlal Dika, Canada
Huivalenthiam Debate, 2009 chu thla hnih chhungin hlawhtling taka zawh fel a ni ta. Debate hunpui hi kan Secretary Pu Vanlal Zawma’n hneh takin a kaihruai a, sawitu leh hnialtute pawhin an hun zo takin an hmang bawk a, endiktu—Pu Lalhruaia-USA, Rev. Dr. Rodawla-USA, leh Pu Zonunmawia-USA (Debate endiktu leader)-te pawhin ramritiam angin chik tak leh felfai takin endikna an nei bawk a, a hlimawmin chhiartu member lam pawh kan thawm a ring hle.

2009 Huivalenthiamgroup hnarkaituten tlawmngai tura hunpui changtu an ruatten an hun hlu tak leh an thiamna an rawn thawh avang chauhva he hunpui hi hlawhtling taka hman a ni a, an chungah lawmthu kan sawi a ni. A hnuaia kan tarlan ang hian endiktute aiawhin Pu Zonunmawia’n khaikhawmnna a rawn nei a….

—Pu Zonunmawia, Debate Endiktu Leader
Kan Debate chu a ropui hle mai. Hotuten thupui an thlang thiam a, sawitu leh hnialtute pawh an lehkha ziak atangin lehkha ziak thiam tak tak an nih zia a hriat theih. An sawi thiamin an hnial thiam a, rilru an hneh thin hle. Lehkha inziak siak kan ni lo va, inhnialfiam kan nih zawk avangin thuziak dan, literature lam leh letter fond leh size an hman dante chu kan sawi tel lo vang. An thuziak zawng zawng chu he link 2009 HuivalenthjiamDebate.ZOIN ah hian kan rawn thawn tel e.

Hotute dan zam sa en chunga endik a ni a. Thumal 1000 atanga 1300 aia tam lo ziak tur tih a ni a. He dan zawm thei tu chu Nl. Ngurtei chauh a ni. A chungah lawmthu kan sawi. Midang zawng chuan thumal 1300 aiin an ziak tam vek. A thenin an ziak chuang tam vak loh laiin a then chuan an ziak chuang tam hle. A hnuaia mi ang hian:

Thupui: “MAHNI NGEIA NUPUI/PASAL ZAWN A THA”

Sawitute:
1. Tv. Josephsaia: 1679 (thumal)
2. Nl. Lalhlimpuii: 1551 (thumal)
3. Pu Vanlalthlahlova Chawnghlut: 3023 (thumal)

Hnialtute:
1. Tv. B. Vanlalvula: 1389 (thumal)
2. Nl. Zabiaknguri: 1275 (thumal)
3. Pu David Mana Khiangte: 1412(thumal)

Endiktute endikna atangin an sawi that dan a inang tlang hle. “Mi pakhatin ni 7 chhungin a chhang ngei tur a ni” tih dan kan nei a, mahse ni 7 chhunga rawn chhang hman lo mi 2 te kha an tlai chhan a that em vang leh nula an nih ve ve avangin endiktuten kan ngaidam ta mai.

Chhiartute tan chhiar nuam tur tawngkam mawi tak tak an hmang a. Mimal inbeih chiamna a awm lo va. Thulakna nei tha deuh leh nei tha vak lote an awm bawk. An hma a sawitu hnial fuh tha deuh an awm laiin a then chuan an hnial fuh em em lo deuh bawk. An hnunga mite chhan tur zawhna pahnih/khat tal tuman an hnutchhiah lo. A thenin Debate Chairman chauh chibai an buk laiin a then chuan hawihhawm takin endiktute leh mipuite pawh chibai an buk tel ve a.

Sawitu leh hnialtute thuziak a malte tein i han thlirho teh ang u! Kimchang takin mi pakhat thu ziak kan sawichhawng seng dawn lo va, a tlangpui chauh kan tarlang ang.

Sawitu hmasaber, Tv Josephsaia, Qatar:
A ni hian a sawi tha hle. Hmangaihna lungpui chunga chhungkua din chungchang a rawn sawi a. Hmangaihna university pass fel diam a tul hmasak thu thiam tak leh uar takin a a rawn sermon a, chhiar a nuamin rilru a hneh hle. Mahse a point hmasabera Bible tlawhchhana Adama nupui neih dan a sawi hi “Mahni ngeia zawn a tha” tih lam a ni chiah lo deuhin a lang. Achhan chu nupui atana thlan tur hmeichhe dang la awm lohna khawvela cheng Adama hian Pathian pek Evi chu nupui atan lawm takin a pawm mai niin a lang zawk. Hmanlai Mizo nun phunga kan hmeichhiaten right an neih tlem zia a rawn tarlang a. “Nunna Kawngpui Thuamah” tih lehkhabu a Thangteii pasal neih dan a rawn tarlang leh a, a ropui hle mai. Nupui pasal zawn chungchangah YZTP thalaite nunah inrimna hun a tlem tawh em vanga nu leh paten an fate nupui pasal an lo ngaihven pui thin thute a rawn ziak a, rilru a hneh khawp mai.

Hnialtu hmasaber, Tv. B. Vanlalvula, Malaysia:
A hma a sawitu a hnial fuh chat chat hle. Bible tlawhchhana Adama leh Evi inneih dan, Isaka leh Rebeki inneih dan, leh Samsona nupui neih dan a rawn tanchhan hi a fuh hle. Mizote chu inrim ve thin mah ila kan nulate hian an mizia diktak an lo thup nasat thin zia leh inneih hnua a lanchhuah leh tho thin ziate, chuvanga nu leh pate nen tangrual a nupui pasal zawn a that zia thiam takin a rawn sawi. Japan thufing leh Russian thufingte a rawn tanchhana a mawi khawp mai. Kan pate hun laia sipaia tangten mahni khaw lama nu leh pate nupui zawn saktura an tihten hnam dang kawl leh shan nula hmel tha tak tak neite aiin an tihfuh zawk zel thu a rawn sawi a. Mahse heihi research hmuhchhuah a nih chuan a statistic chiang taka tarlan theih ni se a point a rit leh zual ngei ang. Mahni khaw lama nu leh pate zawn saka nupui neite khan engti chiahin nge hnamdang nula nupuia neite aia an tihfuh zawk dan hi hrilhfiah zau deuh theih ni se, a tha leh zual ang.

Sawitu pahnihna, Nl. Lalhlimpuii, Burma:
Kan ramah harsatna chi hrang hrang a thlen vanga Mizo val rual ram danga feh chhuak ta suau suau mai chanchin atangin a rawn sawi tan a. A ni taka, kan ramah hian harsatna chi hrang hrang, hmuh theih mai leh hmuh theih mail loh harsatna, ei leh bar harsatna, zalenna awm lohna harsatna, mihring dikna chanvo laksak vekna harsatna, thil diklo tih pawisak lohna inzirtirnate a thleng mek a ni. Keimahni ram, kan pianna ngei ram aiin mi ram kan duh zawk vang ni hauh lovin heng harsatna chi hrang hrangte avang zawk hian mi ramah kan feh chhuak ruih ruih mai chu a nih hi. Kan la fehchhuak chhunzawm zel dawn pawh niin a lang.

Awle, Mahlimi thu ziakah lut leh ila. A hmaa sawitu a hnial tam vak lo va, mahse nu leh pate nupui/pasal inzawn sak vanga upat hnuah pawh inthen leh thote chanchinte, inthen lote pawhin nunpa nun hrehawm taka hmang an awm thute tanchhanin hmangaihna avang chauha nupui/pasal inneih a pawimawh zia thiam takin a rawn sermon a. Nupa inkara hmangaihna pawimawh ber zia uar takin a rawn sawi a, rilru a hneh hle. Chuvangin, Mahlimi hian hmangaih taktu a tawng tawha, a hmangaih tak a tawn tawh vanga hmangaihna pawimawh zia sawifiah thiam bik nge a niha, hmangaih taktu a mamawh vang zawk tih pawh hriatthiam a harsa ta! Tlangvalte tan finfiah thuai chi a ni ang.

Hnialtu pahnihna, Nl. Biaknguri, Pune, India:
A hma a sawitu a rawn bitum nghal chat a, a rawn hnial fuh hle. Inngaihtuah chiang vak lo va nupui/pasal inneite inneih ziktluak loh vanga naupang nu leh pa neilo an tam tak thu a rawn sawi a. Bible chhunga Ruthi chu a piin pasal a zawn sak a, a fuh ziate leh Isua thlahtu zinga hmeichhe ropui tak pakhat a rawn nih tak zia a rawn sawite chuan rilru a hneh hle. Nupui pasal kan inneihin inneite mi pahnih chauh kha an innei a ni mai lo va, chhungkaw pahnih chu chhungkaw pakhatah an insiam ta zawk a nih zia leh nu leh pate remtih puina nena nupui/pasal inneite chungah chhungte ve ve nen inzawmna tha zawk an neih zia thiam takin a rawn sermon bawk. Chhungkaw hnih chu chhungkaw khatah kan insiam tih lai tak hi kan Mizo hnam value leh kan hnam dan mawi tak pakhat niin a lang. Keini ringtute chuan nupui/pasal inzawn chungchangah pawh nu leh pate thu zawm a that zia sawiin tlangkawmna tha tak nen a titawp a, Ngurteii hi lamtang atan a duhawm dawn khawp mai.

Sawitu pathumna, Pu Vanlalthlahlova, USA:
Pu Vana hian sawifiah a tum lutukna lamah beisei aiin a rawn sermon rei ta deuh. Sermon rei lote chauh rawihnawn an nih dawn chuan Pu Vana hian rawihnawn a hlawh lo mai ang tih hlauhawm khawp mai. A thuziak hmang atang ringawt pawhin thil thui tak ngaihtuah mi a nih zia leh Pathian thu zir mi anih zia a chiang reng mai. Nupui pasal tur thlan dan lam a sawi uar hle. Thulakna chi hrang hrang hmangin nu leh pate hi setanan a hman theih ziate leh kan right/duhthlan theihna zalenna min chhuhsak kher tur an nih loh ziate a rawn sawifiah hle. “Duhzawng pawh zawng hmu theilo/zo lo hi mi eng ang mi nge an nih?” tih subheading hmanga a ziak laiah hian nupui pasal nei hma lo deuhte leh la nei remchang lote a ngam siah siah hle mai a. Mi khawngaihthlak an nih ziain a rawn chhunzawm a, a kap na lutuk deuh em aw a tih theih. A hma sawitu a hnial tam lo hle a mahse nupui/pasal zawn chungchanga nu leh pate thu zawm a tul loh zia thu erawh a sawi uar hle. Amaherawhchu, a rawn hnial dan, “Nu leh Pa-te thu a kawi a kila zawm vek tum hi tunlai khawvelah a finthlak ber loh!!” tih lai hi inzirtirna tha ber a ni em tih erawh ngaihtuah nawn leh deuh a that hmel. Engpawh nise a tlangpui thuin a sawi tha a, a ropui hle mai.

Hnialtu hnuhnungber, Pu David Mana, Australia:
A hma a sawitu a rawn hnial nghal chat mai. A point a rawn paihthla nghal hmak hmak mai. Nu leh pate chawimawi tur leh sawichhe lo va chawimawi zawk tur kan nih zia Bible min zirtirna chu Bible chang tarlangin a rawn sawi uar hle. Zo fate khawvel hmun hrang hrangah kan vak darh tan ta a. Hnamdang nupui/pasal inzawn dan entawn mai lo va kan pipute nupui/pasal inzawn dan kha chhawm nung zel tura tawi fel tak maia a rawn sermon chhunzawm chuan rilru a hneh hle. A hma chiaha sawitu mai ni lovin a tir lama sawitute thlengin a rawn hnial tel a. Nu leh pate thu zawm chu malsawm dawnna a nih ziatein a rawn tlangkawm ta a ni. A ropui hle mai.